¹ Nteang nteang ayiwo Otuba, Otuba ayikiwo ondii omog na Nzeam, Otuba ayiwo Nzeam. ² N'itsin Otuba ayinde ondii omog na Nzeam. ³ Vim ankum asalamiwo n'Otuba mpi kaku vim emog ve eyikiwo ekwon otuba. ⁴ Luzingu ayiwo ne kati ende, mby luzingu ayiwo mwinda e vear. ⁵ Mwinda epiey ne kati e mpib, mpib ewo ekaleang n'ongyama. ⁶ Nzeam s'atumnde wur emog, dzin inde Yoane. ⁷ Ayinde djwi na nkum ntiegn e mwinda, djwi ne mbug ende, vear ankum wadjir. ⁸ Yoane akayia mwinda ve, kansi apwinde ko djwi na mpea ntiegn djwi na vii alir mwinda. ⁹ Mwinda ewo ayiwo mwinda e vi-a-vii, djwi ntangu emiyiande ne buu, apea oveanga ya wur enkum. ¹⁰ Ayinde n'okiri, mpi akiwo okiri ne mbug ende, mpi okiri ekojia ve. ¹¹ S'ayinde etay atwung ande mpi atwung ande wakaleang ongyama ve. ¹² Kansi vear ayovey, vear ayidjir ne dzin inde, amapea ekub djwi wakum aman a Nzeam. ¹³ Aman awo wakawur n'aluung ve, to mpi wakawur na luzolo e wur ve, kansi na luzolo e Nzeam. ¹⁴ Mby Otuba s'akum nde wur, mpi apiernde ne kati esu. Aywinde na ngrasia ti na masonga. Ayen su nkembo ende, nkembo ewo kamsi nkembo e Mon k'emog eyum ya Tea Nzeam. ¹⁵ Yoane apinde ntiegn ende, s'adzamikinde ndenden : "Ene eli wur eyokabagnime memen 'wur eleseye mby eme amitigna ngya, djwi nde, ayinde nteang eme.'" ¹⁶ Oniang sankum simivea vii ankum amiyuo ya nde, ngrasia na ngrasia. ¹⁷ Djwi nsiku, Moize wur eyipii, kansi ngrasia ti masonga ayiwo ya Yezu Kristu. ¹⁸ Kaku ata wur emog emiyen Nzeam ve. Mon k'emog e Nzeam, nde wur eyi n'ipfugn i Tea, ndug wur emilag vear Nzeam. ¹⁹ Ene eli ntiegn e Yoane ntangu eyitum Wayuda vear etay e wanganga - Nzambi ti Walevi yum Yeruzalem djwi n'ongywe nde wuwun: "Yie oli nagn ?" ²⁰ Akatun ve mpi akeara ndenden nde, epa ali Kristu ve. ²¹ Wog enagn s'oywiwo: "Mby oli nagn? Nge oli Elia ?" Nde s'akearinde: "kaku". Wakea ongyue diaka: "Oli ngunsa?". Akeara ndenden, "Kaku." ²² Mby wakea ntuba wande wuwun: "kabaka, oli nagn, djwi su sitsu nkaba vear ayitetum. Yie yemie otuba yiyen nge djwi na yie ? ²³ Akeara ngean: "Me ndi otuba o wur eletsug elie ne buu e ndzum: 'Wongagni mbug e Nzeam', oshin oyitubi profeta Ezai". ²⁴ Vear ayitum wo anagn ayiwo Wafarize. ²⁵ Wokea ongyue diaka: "Djwi na nge elepii yie mbotika yug epa oli Mesiya ve, ata Elia ve, ata ngunsa ve ?" ²⁶ Yoane akeara ndenden: "Me ndepii mbotika e vay, kansi ne kati egnu, eli na wur emog epijiagnu ve, aleye ne mby eme; ²⁷ mpikug ata na ngama eshing e sabata inde ve. ²⁸ Vii ane ankum alog wo ne Betania, ne nky e nzey e Yordani, ondii oyipiki Yoane mbotika. ²⁹ Mpimpign enagn, ayen Yezu aleye etay ende. Yoane s'atubinde ndenden: "Yenagni mon imeme i Nzeam etsandima masumu i vear a buu. ³⁰ Ene eli ndug wur eyitubime memen: 'Wur emog aleseye mby eme, wur ewo ayinde nteang eme.' ³¹ Nkojia nteang ve, kansi me ayime mpea mbotika e vay djwi wojinde n'Israel." ³² Yoane apinde ntiegn ene: "Ayenme Mpeve alekri yum dzug kamsi nkodima, mby ayia ngima ne dzug inde. ³³ Nkojia nteang ve, kansi wur eyintum na mpea mbotika ankabinde ndenden: 'Wur eyayen yie Mpeve etikra ya nde mpi etiyima ne dzug inde, enagn ndug wur eyayia mpea mbotika e Mpeve Santu. ³⁴ Ayenme, s'apime ntiegn memen ali Mon e Nzeam." ³⁵ Mpimpign enagn, Yoane ayinde kokog ti walongoki inde ipe, ³⁶ aleyenaka Yezu aleleg, s'atubinde ndenden: "Yenagni Mon imeme i Nzeam !" ³⁷ Ntangu emiyug walongoki ipe inagn otuba o Yoane, s'adjiwo Yezu. ³⁸ Ntangu emikea ntshim Yezu mpi emiyen nde ndenden walesodji, atuba nda wo ndenden: "olingagni nge?" Wokeara wuwun: "Rabi, atsayie mpier n'onkagn?" ³⁹ Yezu akeara ndenden: "Yagagni mpi yenagni." Mby s'atshiwo mpi s'ayen wo ondii ognemiki Yezu. Asatsigawo eshuu enagn wa nde. Vun ayiwo etikum mbeama na ntangu djum e Wayuda (djum n'isom). ⁴⁰ Andre, otwung o Simoni Petelo ayinde emog ne kati e vear ape ayiyug otuba o Yoane mpi ayisadjie Yezu. ⁴¹ Ndug wur enteang eyisangi nda otwung onde Simoni mpi eyokabi ndenden: "Sitiyen Mesiya", eling ntuba Kristu. ⁴² Mby s'ovarinde etay e Yezu. Yezu ntangu emolirnde, atuba nda nde ndenden: "Yie oli Simoni, mon e Yonasi, ayoviakawo Sefasi (eling ntuba Petelo). ⁴³ Mpimpign enagn, Yezu alingikinde ntsa Galilea mpi asanga nda Filipu. Atuba nda Filipu ndenden: "Ondani." ⁴⁴ Filipu ayinde wur e Bethsaida, wiya emog nda Andre ti Petelo. ⁴⁵ Filipu asanginde nda Natanael, okaba ndenden: "Sitiyen wur eyifugn wo n'onkean o nsiku i Moize mpi eyikab wangunsa, eli Yezu e Nazarete, mon e Yozefo." ⁴⁶ Natanael okeara ndenden: "Vim e wuo ko asikug wo mpwe ne Nazarete?" Filipu okeara ndenden: "Yag, oyen." ⁴⁷ Yezu, ntangu emiyen nde Natanael aleye etay ende, oyegne ya vear mpi atuba ndenden: "Yenagni mon Israel eli kaku ata vii apwo ya nde." ⁴⁸ Natanael okeara ndenden: "Yie onjia me n'onkagn?" Yezu okeara ndenden: "Nteang Filipu n'omvie ntangu eyikiyie ne ngie oshung o figi, oyenme. ⁴⁹ Natanael okeara ndenden: "Rabi, oli Mon e Nzeam, oli ntotila e Israel. ⁵⁰ Yezu okeara ndenden: "Ko djwi emokabame memen oyenme ne ngie oshung o figi mby s'amidjiryie. Ayayen yie vii anen anen alenga ane. ⁵¹ Mbiy okaba ndenden: "Vi-a-vii, bana lwo ene, ayayen gnu olung otingam, banzio i Nzeam wavean wakra ne dzug i Mon-wur.