¹ Zaki wur otshia e Nzeam ti e Nkum Yezu Kristu, ya ekuu djum n'ipe emipaagn etay n'etay, mbea egnu. ² Vey kamsi vim osiang, atwung ame, yug oleyenagni mpay eshin n'eshin. ³ Olajaigni gnugnun oshin o mpay inagn eli na ntesa lukwikilu egnu, ekug oyiagni na biu. ⁴ Kansi sianga okwung ekwung yie enagn, ekug n'etshia ewo, djwi oyii wur e wuo, wur ekug, opakwon ata vim emog ve. ⁵ Kansi, yug wur emog ne kati egnu akwon waagn, awigni ya Nzeam, nde etsampea ya wur enkum kaku epwon ve, mby asopea nde wog. ⁶ Kansi awigni na lukwikilu, akwon ntsug itura ipe-ipe. Djwi wur etsa ntsug itura ipe-ipe ali kamsi vay a nzey elevari opepe etay n'etay. ⁷ Wur oshin onagn apibansi ve ndenden ayaveande vim ya Nkum. ⁸ Wur oshin onagn ali na nginu ipe, apazira ne mbug inde inkum ve. ⁹ Otwung eli omva ayii n'osiang onde oshin emojir wo, ¹⁰ Nkea otsun ayii n'osiang o nkra ngie, djwi ayakien nde kamsi nkaya i bintuntu. ¹¹ Vuna etipwe, etikum dzug epa mbiiy e biu, nkayaitiyum, bintuntu itilog ne buu, emieng e bintuntu etishir. oshin omog eyashir nkea otsun na vii ande ankum. ¹² Lusakumuna ya wur etshung etura ne ntangu e mpukumuna, djwi ntangu emotesa wo, atinunga, asivea nde ifutu indene luzingu, elaga eyipii Nkum ya vear oleang nde. ¹³ Kaku wur esikug ntuba ve, yug ali ne mpukumuna, ndenden: "Eli Nzeam wur emimpea mpukumuna ine", Djwi wakug ndogo Nzeam ne mpukumuna ve, nde ndemie mpi apitsintum wur ve ne mpukumuna. ¹⁴ Kansi wur na wur atsande ndog ne mpukumuna ko n'oshin esotum mpuy inde i djuung. ¹⁵ Mby mpuy i djuung inagn, ntangu esivey nde djim, awur disumu, mby disumu ntangu esifuye wo, ewur ewa. ¹⁶ Wur apodjimagni, atwung a ngaagn. ¹⁷ Ikab inkum i wuo na ngrasia enkum e wuo atsawo ngyim ko ne dzug. Eyim ya Tea etsampea oveanga. Ya nde, kaku apisongi vii ande, ata otuba onde ve. ¹⁸ Nzeam ason nde na ntewur su n'otuba onde e masonga, oshin onagn asikum su aman a nsom eteang ne vim ankum ayikinde. ¹⁹ Jiagni wuo, atwung a ngaagn, wuo wur enkum ayii osar na ngyug djwi, kansi okwog na ntuba, okwog na ngyug nkier. ²⁰ Djwi nkier i wur ipitsinkie wuo ve na masonga i Nzeam. ²¹ Wog enagn, ntangu efanga gnu masumu inkum, na nkier, osaveyagni otuba o Nzeam okwog-okwog, wasafuy ne kati egnu, asikug wo mvuga moyo egnu. ²² Kiagni vii atuba Nzeam, epa oyugakagni ko n'atii ve, djwi okajingagni gnu gnemie n'oshin osibansaka gnu. ²³ Djwi, yug wur ayug ko otuba kansi apikii ve, ali kamsi wur esilir elung ende ne tala-tala oshin eyokii wo. ²⁴ Mby ntangu esishir nde ndir, akien, ajing oshin oyikinde. ²⁵ Kansi wur esitum elit ende wuo-wuo ne wansiku ipuba vear n'eshing, wur esitsug inaagn, epa ko ngyug n'atii mby ajing ve, kansi esikie otshia ewo, ndug enagn eyayia na lusakumuna n'etshia ende. ²⁶ Yug eli na wur ebansa ndenden ali wur otshia e Nzeam, kansi apitshung oshing n'elim ende ve, aledjim etura ende, otshia onde e Nzeam eli mpama. ²⁷ Otshia o Nzeam eli kaku mbin, kaku itono ne nteang e Nzeam Tea su, otshia ewo eli na ntsa ndiraka aman itsig ti wansakwe ne mpay iwo, mpi na ndurmbin i buu.