¹ Ntangu emibana ngwur vear na buu, watikum entsign, mpi watiwuraka ti aman ankear, ² aman a Nzeam emiyen wo wuwun aman ankear a vear ali ne buu wali intieng ankear, s'asonikiwo ne kati ewo, ankear a ntsug ne ivea. ³ Mby Yaweh s'atubinde ndenden: "Mpeve eme epayiaka ntangu enkum ne kati e wur ve, djwi wur ali ko djuung i mpama, mpi ayasande pier ko mvwe nkama emog na omab." ⁴ Vear a tey-tey apwiwo ne ntangu enagn, ne ntangu eyikri aman a Nzeam etay eli aman ankear ne buu, ntangu emiwur wo ti wo; eli wog ankea biu ayipwi ne ntangu e ntama. ⁵ Yaweh ayen ndenden ipwo i vear itilega nkum entsign ne buu, mpi vii ajing wo ne itura iwo konso eshuu iletsu ko na nkie ipwo. ⁶ Yaweh s'ayen nde epwo ne oshin oyikinde wur ne buu, ayug nde ngy ne etura ende. ⁷ Mby Yaweh s'atubinde ndenden: "Ayashira me vear ankeankum ayikime ne buu, yim ya wur tii wagnam; wagnam ikeara n'ipfugn, ti wamfuru ne dzug; djwi ntiyen epwo n'oshin oyakiime." ⁸ Kansi Nowe aviynde ngrasia ne vy a Yaweh. ⁹ Yen okuu o Nowe. Nowe ayinde wur ewuo mpi ekug ne ntangu ende enagn, Nowe alekienikinde ti Nzeam. ¹⁰ Nowe awur nde aman ampeam asar: Sem, Sham ti Yafeti. ¹¹ Buu akum wo n'ipwo entsign ne nteang e Nzeam, buu ayiwo etiyuo to na vii apwo. ¹² Nzeam ntangu emilir nde buu, ayen vii apwo, djwi wur enkum apiy nde mbug inde ne buu. ¹³ Mby Nzeam atuba nda Nowe ndenden: "Ntitsug nsuka ne luzingu e vear annkum, djwi watiyura buu n'ipwo, yen ndadjag wo ti buu. ¹⁴ Yie, kie ashwa na oshung o gofer epishwi vay, ayatsug yie atwunu a mvuru ne ashwa anagn, mpi ayakwe yie okub neti ti nelien djwi eyii biu. 15 Yen oshin oyakie yie wog: Otey e ashwa ayayiawo metelo nkama emog na otean, onen ewo metelo omab n'itean, mby odzeang owo metelo djum n'itean. ¹⁶ Ayatsug yie madikisi emog, dzug iwo ayayiawo santimetelo otean dzug iwo, ayatsug yie epfug ne ompaagn e ashwa, ayatsug yie wa etaje isar neti. ¹⁷ Mby me, ayatum me mvuye e biu ne buu, djwi adjag vim enkeankum eli na egnim ne ngie olung; vim enkeankum eli ne buu asiwawo. ¹⁸ Kansi me, ndakie alien ame ti yie, ayashwe yie ne ashwa, yie ti aman ayie ampeam, wear yie ti aveari aman ayie. ¹⁹ Ne kati e vim ankum ali na luzingu, ne wagnam inkum, ayashweraka yie ne ashwa vim ape-ape, djwi wayii na luzingu ti yie, ayayiawo wum ti wear. ²⁰ Mfuru na mfuru eshin enkeankum, wagnam eshin enkeankum, ti wagnam ikeara n'ipfugn eshin enkeankum, ayayiawo etay eyie ipe-ipe, djwi yie awum wo ne luzingu. ²¹ Mby yie, vey vim anda ankum atsawo nda, wum wog mbeama na yie, djwi ti yie, ti wo, olelakagni." ²² Nowe mpi akie ko oshin onagn, akie inkeankum iyotum Nzeam.