¹ Ne itsin, Nzeam akiinde olung na buu. ² Buu ayikiwo ko epuu, kaku oshin vim esiyer wo na wo ve. Mpib ayiwo ne dzug i buu enkum, mby Mpeve e Nzeam alesiabikinde ne dzug i vay. ³ Nzeam atuba ndenden: "Oveanga oyii!" Mby oveanga s'ayii wo. ⁴ Nzeam ntangu emiyen nde oveanga eli wuo, s'angami nde oveanga ti mpib etay n'etay. ⁵ Nzeam avie oveang mbiiy, mby s'aviinde mpib otshuu. Ekwo elog, eshuu ekeam ne suka enagn: enagn eshuu e nteang. ⁶ Nzeam atuba ndenden: "Wuo vay na vay anam etey na wavay amuu." ⁷ Mby s'akiinde ko oshin onagn, anama vay ali ngie ti vay ayike ne dzug. ⁸ Nzeam s'aviinde etign e dzug olung. Mby ekwo elog, eshuu ekeam ne suka enagn: enagn eshuu ozole. ⁹ Nzeam atuba ndenden: "Vay ankum ali ne ngie olung eyii ondii omog, mby nky e vay mpi eyii." Eyia mpi ko oshin oyitubi nde. ¹⁰ Nzeam avie nky vay anagn buu, avie wavay anagn nzey. Nzeam ayen ndenden vii anagn ali wuo. ¹¹ Mby atuba ndenden: "Buu epur nkaya i mvu, adjiu eshin n'eshin, esiwur atub, ti mbeam isikeawo mfuy ne buu." Eyia mpi ko oshin onagn. ¹² Buu epur nkaya i mvu, adjiueshin n'eshin ili na mbeam i mfuy, ti eshung etsangwur atub, eli ti mbeam eshin n'eshini mfuy ne buu. Nzeam ayen ndenden eli wuo. ¹³ Mby ekwo elog, eshuu ekeam ne suka enagn: enagn eshuu otatu. ¹⁴ Nzeam atuba ndenden: "Wuo eyii na vim epea oveanga ne dzug, djwi na nama mbiiy ti otshuu, enagn asiyiawo kidimu eyakabaka ntangu, nshuu, na mvwe. ¹⁵ Vim awo mpi eyike ko ne dzug olung djwi epiike oveanga ne buu." Eyia mpi ko oshin onagn. ¹⁶ Nzeam s'akinde vim ape anen-anen epea oveanga, eninen epea oveanga mbiiy enkum, mby ekieg epea oveanga otshuu onkum; akie mpi na weer. ¹⁷ Nzeam atsug wog ne ntn e dzug olung djwi epii oveanga ne buu, ¹⁸ djwi epii oveanga mbiiy enkum ti otshuu onkum; djwi na nama mbiiy ti otshuu. Nzeam ayen nde eli wuo. ¹⁹ Mby, ekwo elog, eshuu ekeam ne suka enagn: enagn eshuu oya. ²⁰ Nzeam atuba ndenden: "Vay apur wagnam entsign esizinga neti, ti wamfuru waleyimike ne buu ti dzug." ²¹ Nzeam s'akinde wanse ti wagnam inkum ilekien, ti ne vay, apur wanse ti wagnam eshin n'eshin, akie ti wamfuru eshin n'eshin ileyim na apabu awo. Nzeam ayen nde eli wuo. ²² Nzeam asakumuna vim anagn, ndenden: "Wuragni, yiagni entsign, yuragni to ne wavay, ti wamfuru wakum entsign ne buu." ²³ Mby ekwo elog, eshuu ekeam ne suka enagn: enagn eshuu otanu. ²⁴ Nzeam atuba ndenden: "Buu epur wagnamizinga neti eshin n'eshin, wagnam ikieg, wagnam ikeara n'ipfugn ti wagnam ikien ne buu eshin n'eshin." Eyia mpi ko oshin onagn. ²⁵ Nzeam akie wagnam ne buu eshin n'eshin, wagnam ikieg-kieg ti wagnam inkum ikeara n'ipfugn eshin n'eshin. Nzeam ayen nde eli wuo. ²⁶ Mby Nzeam atuba ndenden: "Siki wur ne ignignig isu, ayii kamsi oshin oli su, ayii nkum e wanse ne vay, wamfuru ne dzug, wagnam, ti buu enkeankum, ti wagnam ikum ikeara n'ipfugn ne buu. ²⁷ Nzeam s'akinde wurne ignignig inde, okie n'ignignig i Nzeam, akie ompeam ti onkear. ²⁸ Nzeam asakumuna wo, mby atuba nda wo ndenden: "Wuragni, kumagni entsign, yuragni buu; yiagni ankum ne buu, yiagni ankum a wanse ne vay, wamfuru ne dzug ti wagnam inkum ilekien ne buu." ²⁹ Mby Nzeam atuba ndenden: "Yenagni, mean ntopeagni adjiu ankum ali na mbeam i mfuy ne buu, ti eshung enkum eli na atub atsa mpur mbeam i mfuy ne buu: enagn eli vim ayalakagnu. ³⁰ Ata wagnam inkum, wamfuru inkum ne dzug, ti adjiu anagn eli djwi na oliu owo." Eyia mpi ko oshin onagn. ³¹ Nzeam ayen ndenden inkum imikie nde eli wuo entsign. Mby ekwo elog, eshuu ekeam ne suka enagn: enagn eshuun isom.