¹ Yaweh atuba nda Moize ndenden: ² "Eshuu enteang, ne ngwon enteang, ayakie yie tabenakulu, evuru e kapo ondii o nsanga. ³ Neti, ayatsug yie sanduku e ntiegn, mpi ayatsug yie eleam ne sanduku enagn. ⁴ Ayajie yie mesa, mby ayatsug yie ne ndongo. Ayajie yie mwinda, mpi ayawong yie wamwinda inkeankum. ⁵ Ayatsug yie kunda e wolo djwi na ananagn a nsuu ne nteang e sanduku e ntiegn, mby ayadzub yie eleam ne mbwung e tabenakulu. ⁶ Ayatsug yie kunda e empeab ne nteang e nshwe ne tabenakulu, evuru e kapo ne ondii o nsanga. ⁷ Ayatsug yie mpuug eninen enagn ne ngnina e evuru e santu ti kunda, mby ayatsug yie vay neti, ⁸ Nelien ne nteang e evuru e santu, ayatsug yie eleam edzub ne mbwung ewo. ⁹ Ayavey yie vir a lusakumuna, okwi ne tabenakulu ti ne vim ankeankum ali neti, mby ayakum wo vim a santu, ti wampuug iwo inkeankum mpi ayakum wo i santu. ¹⁰ Ayakwe yie vir ne kundae empeab ti ne wampuug iwo inkeankum, mpi kunda ayakum wo santu. ¹¹ Ayakwe yie vir ne mpuug eninen enagn ti ne ebaay ewo e ngie, mpi ayakum wo e santu. ¹² Ayatum yie Aaron ti aman ande ne mbwung e evuru e santu, mby ayayog yie wo na vay anagn. ¹³ Ayalwer yie Aaron ileam i lusakumuna, ayokwe yie vir, mpi ayakum nde osantu, djwi asayia ko wur ekie otshia o nganga-Nzambi. ¹⁴ Ayabin yie aman ande mbeama na yie, ayalwer yie wo wasimisi. ¹⁵ Mpi ayakwe yie wo vir kamsi esikwe yie tea wo, djwi wasakiaka ko otshia o nganga-Nzambi. Lusakumuna e vir esakwe yie enagn, asisawo tsuga otshwag tii ya aman awo, ti ankean awo... ¹⁶ Moize akie inkeankum iyokabi Yaweh na nkie; akie ko oshin onagn. ¹⁷ Eshuu enteang, e ngwon enteang, e mvwe ozole, s'ayim nde tabenakulu. ¹⁸ Moize ayim tabenakulu, atsug ibaay iwo ngie, atsug abaya ti etandala, ayim ataga. ¹⁹ Ashima evuru e kapo ne tabenakulu, mpi atsug nseam ne dzug iwo, ko oshin oyitubi Yaweh nda Moize. ²⁰ Avey ntiegn atsug neti e sanduku, avey ti ebaay ewo e dzug, ayab ne dzug i sanduku. ²¹ Avara sanduku ewo ne tabenakulu, atsug eleam e mbag onduu, mby s'adzub nde sanduku e ntiegn, oshin oyitubi Yaweh nda Moize. ²² Atsug mesa ne evuru e kapo, etay e nordi e tabenakulu, nelien e eleam emidzub wo. ²³ Mby atsug mampa ne esag, ne nteang e Yaweh, oshin oyitubi Yaweh nda Moize na nkie. ²⁴ Atsug mwinda ne evuru e kapo, elira na mesa, etay e sudi e tabenakulu; ²⁵ mpi awong wamwinda ne nteang e Yaweh, oshin oyitubi Yaweh nda Moize na nkie. ²⁶ Atsug kunda e wolo ne evuru e kapo, ne nteang e eleam emidzub nde. ²⁷ Mby apiey tshiya ne ananagn a nsuu, oshin oyitubi Yaweh nda Moize na nkie. ²⁸ Atsug eleam ne mbwung e tabenakulu. ²⁹ Atsug kunda e empeabne mbwung e tabenakulu, ne evuru e kapo, mby akie empeab, apea ti makabu, oshin oyitubi Yaweh nda Moize na nkie. ³⁰ Atsug mpuug eninen ne kati-kati e ondii osanga wo ti kunda, mpi atsug vay a ngyog neti. ³¹ Moize ti Aaron nda aman ande wasuy mbwo na nkuu neti, ³² ntangu emishwe wo ne evuru e kapo, wativanga mbeama na kunda, wayog, oshin oyitubi Yaweh nda Moize na nkie. ³³ Atsug iyawiya ne nteang e tabenakulu ti kunda, mby atsug eleam ne epfug e nshue ne iyawiya. Eli ndug Moize wur eyishiri etshia enagn. ³⁴ Mby mafuba edzub evuru e kapo enagn, mpi nkembo e Yaweh eyura tabenakulu. ³⁵ Moize akafikug nshue ne evuru e kapo ve, djwi mafuba ayiwo ne dzug iwo, mpi nkembo e Yaweh etiyuo ne tabenakulu. ³⁶ Ntangu enkeankum elekienikiwo, aman Israel aletshikiwo, yug mafuba itivean ne dzug i tabenakulu. ³⁷ Mpi yug mafuba itolim ve, wapalim kog ve, asilim wo ko yug mafuba itivean dzug. ³⁸ Mafuba i Yaweh ayikiwo mbiiy enkum ne dzug i tabenakulu; mby otshuu onkum ayenikiwo ekb e tshiya, ne vy aman Israel ankeankum, ne ekien ewo enkeankum.