1
Yaweh atuba nda Moize ndenden:
2
"Eshuu enteang, ne ngwon enteang, ayakie yie tabenakulu, evuru e kapo ondii o nsanga.
3
Neti, ayatsug yie sanduku e ntiegn, mpi ayatsug yie eleam ne sanduku enagn.
4
Ayajie yie mesa, mby ayatsug yie ne ndongo. Ayajie yie mwinda, mpi ayawong yie wamwinda inkeankum.
5
Ayatsug yie kunda e wolo djwi na ananagn a nsuu ne nteang e sanduku e ntiegn, mby ayadzub yie eleam ne mbwung e tabenakulu.
6
Ayatsug yie kunda e empeab ne nteang e nshwe ne tabenakulu, evuru e kapo ne ondii o nsanga.
7
Ayatsug yie mpuug eninen enagn ne ngnina e evuru e santu ti kunda, mby ayatsug yie vay neti,
8
Nelien ne nteang e evuru e santu, ayatsug yie eleam edzub ne mbwung ewo.
9
Ayavey yie vir a lusakumuna, okwi ne tabenakulu ti ne vim ankeankum ali neti, mby ayakum wo vim a santu, ti wampuug iwo inkeankum mpi ayakum wo i santu.
10
Ayakwe yie vir ne kundae empeab ti ne wampuug iwo inkeankum, mpi kunda ayakum wo santu.
11
Ayakwe yie vir ne mpuug eninen enagn ti ne ebaay ewo e ngie, mpi ayakum wo e santu.
12
Ayatum yie Aaron ti aman ande ne mbwung e evuru e santu, mby ayayog yie wo na vay anagn.
13
Ayalwer yie Aaron ileam i lusakumuna, ayokwe yie vir, mpi ayakum nde osantu, djwi asayia ko wur ekie otshia o nganga-Nzambi.
14
Ayabin yie aman ande mbeama na yie, ayalwer yie wo wasimisi.
15
Mpi ayakwe yie wo vir kamsi esikwe yie tea wo, djwi wasakiaka ko otshia o nganga-Nzambi. Lusakumuna e vir esakwe yie enagn, asisawo tsuga otshwag tii ya aman awo, ti ankean awo...
16
Moize akie inkeankum iyokabi Yaweh na nkie; akie ko oshin onagn.
17
Eshuu enteang, e ngwon enteang, e mvwe ozole, s'ayim nde tabenakulu.
18
Moize ayim tabenakulu, atsug ibaay iwo ngie, atsug abaya ti etandala, ayim ataga.
19
Ashima evuru e kapo ne tabenakulu, mpi atsug nseam ne dzug iwo, ko oshin oyitubi Yaweh nda Moize.
20
Avey ntiegn atsug neti e sanduku, avey ti ebaay ewo e dzug, ayab ne dzug i sanduku.
21
Avara sanduku ewo ne tabenakulu, atsug eleam e mbag onduu, mby s'adzub nde sanduku e ntiegn, oshin oyitubi Yaweh nda Moize.
22
Atsug mesa ne evuru e kapo, etay e nordi e tabenakulu, nelien e eleam emidzub wo.
23
Mby atsug mampa ne esag, ne nteang e Yaweh, oshin oyitubi Yaweh nda Moize na nkie.
24
Atsug mwinda ne evuru e kapo, elira na mesa, etay e sudi e tabenakulu;
25
mpi awong wamwinda ne nteang e Yaweh, oshin oyitubi Yaweh nda Moize na nkie.
26
Atsug kunda e wolo ne evuru e kapo, ne nteang e eleam emidzub nde.
27
Mby apiey tshiya ne ananagn a nsuu, oshin oyitubi Yaweh nda Moize na nkie.
28
Atsug eleam ne mbwung e tabenakulu.
29
Atsug kunda e empeabne mbwung e tabenakulu, ne evuru e kapo, mby akie empeab, apea ti makabu, oshin oyitubi Yaweh nda Moize na nkie.
30
Atsug mpuug eninen ne kati-kati e ondii osanga wo ti kunda, mpi atsug vay a ngyog neti.
31
Moize ti Aaron nda aman ande wasuy mbwo na nkuu neti,
32
ntangu emishwe wo ne evuru e kapo, wativanga mbeama na kunda, wayog, oshin oyitubi Yaweh nda Moize na nkie.
33
Atsug iyawiya ne nteang e tabenakulu ti kunda, mby atsug eleam ne epfug e nshue ne iyawiya. Eli ndug Moize wur eyishiri etshia enagn.
34
Mby mafuba edzub evuru e kapo enagn, mpi nkembo e Yaweh eyura tabenakulu.
35
Moize akafikug nshue ne evuru e kapo ve, djwi mafuba ayiwo ne dzug iwo, mpi nkembo e Yaweh etiyuo ne tabenakulu.
36
Ntangu enkeankum elekienikiwo, aman Israel aletshikiwo, yug mafuba itivean ne dzug i tabenakulu.
37
Mpi yug mafuba itolim ve, wapalim kog ve, asilim wo ko yug mafuba itivean dzug.
38
Mafuba i Yaweh ayikiwo mbiiy enkum ne dzug i tabenakulu; mby otshuu onkum ayenikiwo ekb e tshiya, ne vy aman Israel ankeankum, ne ekien ewo enkeankum.