¹ Ayiwo ne ntangu eyi Zerses ali n'ekub, alir yim India tii ko Etiopi, na ntn i buu nkama emog n'omab n'ishambia; ² mby vwi Zerses s'agnemikinde n'ekub ende e vwi ne Suse, wiya oluu. ³ Ne mvwe otatu eli nde n'ekub, akie okina, avie ankum ali ne mby ende ti vear ande otshia; ankum ayer-nkuu a Perse ti Medes, antsuru ti ankum a ntn i buu wayia ne nteang ende. ⁴ Ayegne otsun onde eli nde na wo n'ekub ende ti onen ekub ende ko ne ivim i nshuu imikiende, nshuu nkama emog na oniani. ⁵ Ntangu emileg nshuu inagn, vwi akie okina omuu e nshuu ishambia, djwi na vear apier ne Suse, wiya oluu, bana intsuru tii ko mon ilieng, okina owo ko n'iyawiya opeang o vwi. ⁶ Aman a mvuru i kapo iyikiwo, na wakapo i siy-siy, i djuung i vay afiem ti i bule, watitshung eshing e kwi-kwi, ti akwi a etiempar, wamiky ne dzug i shema, ne dzug abaya ti ne dzug atari a por-por. ⁷ Apikiwo veana na gnwa ne alongo a wolo eshin n'eshin, mpi veana a vwi ayiwo entsign kaku mpila djwi na nkab iyi vwi na wo. ⁸ Kansi wakapea wur veana na biu ve yug atun, ogniang vwi atubinde nda vear evuru ende na nkie oshin oleang wur na wur. ⁹ Wear e vwi mpi akie okina djwi na ankear ne kati evuru e vwi Zerses. ¹⁰ Etura e vwi ayiwo n'osiang djwi na veana, ne nshuu ishambia emikiewo okina, atum Mehuman, Bizta, Harbona, Bigta, Abagta, Zetar ti Karkas, vear ashambia atsankie otshia n'evuru e vwi Zerses, ekwongo ewo emiwaka, ¹¹ na njie ondii oli nde, wear nde Vatshi, ti impu ekub e vwi n'ote, djwi ankum ti vear ankeankum woyen, djwi ayinde n'entieng elung. ¹² Kansi wear e vwi akaleang ntsa ve, ntangu emitsa onkaba vear amidjag wo okwongo, vii amitum vwi. Mby vwi s'ayug nde nkier entsign. ¹³ Mby vwi s'atubinde nda ankea waagn atsa njia nduba ntangu. Ogmiang ewu e vwi, apumikiwo ko oshin onagn, ko ne nteang e vear ajia onkwon ti ajia ndwon vii. ¹⁴ Mbeama na nde ayiwo: Karshena, Shetar, Admata, Tarsis, Meres, Marsena, Memukan, wankea ashambia, ankum a Perse tu Medi, wog vear ayiyenike elung e vwi,mpi wog vear anteang ali ne mby e vwi. ¹⁵ Atuba ndenden: "Nsiku ewo nge esituba su djwi na Vatshi, wear e vwi, oshin okalemfuka nde na vii a vwi eyitum nde ankum anagn?" ¹⁶ Memukan akeara ne nteang e vwi ti ankum ali ne mby ende ndenden: "Vatshi, wear e vwi, ene epa mbala enteang emikiende eneang etay e vwi ve; ata ya ankum ane ankeankum, ti vear ankeankum ali ne wantn ili n'ekub e vwi Zerses. ¹⁷ Ogniang, vii amikie wear e vwi ene, ankear nkeankum asijia wo, wo mpi asileang wo waki ya awum awo, watubi wuwun: "Esikwon vwi Zerses avinde wear nde Vatshi na ntsa mpur elung ondiiolinde, akatsa. ¹⁸ Bana lwo ene, aveari a ankum a Perse ti Medi, ali ne mby e vwi, ayakiewo mpi ya awum awo, ayayiawo na itm ti nkier. ¹⁹ Yug vwi amileang, apur ko onkean o nsiku emuu, esitsug wo ne enkwon e Perse ti Medi, vear wapikug mpiy onkwon one ve, onkean o nsiku esifugn vwi ndenden Vatshi apikug mfipwe ve ne nteang e vwi Zerses, vwi afwete mpea ekub e wear e nkum ya onkear omuu eyolenga nde na wuo. ²⁰ Onkean o nsiku esifugn vwi enagn, wafwete njia wog ne okiri onde opfugn, ata ali oshin onkagn, mpi ankear ankeankum asipea wo lokumu ya awum awo, bana wur eli nkum tii ko wur e ngie." ²¹ Vwi ti ankum ali ne mby ende waleang nginu inagn, vwi s'afugn nde onkean oshinomituba Memukan. ²² Atum enkean ewo ne wantn inkeankum ili n'okiri onde, oshin ofugn vear na vear, mpi ne otuba o vear na vear, na ntuba ndenden ompeam nkeankum ali nkum n'evuru ende, mpi atubike otuba o vear ande.