¹ Wankum, peagni ampfum agnu vim akug na wo. Jiagni gnugnun gnu ko olagni na Nkum ne dzug. ² Tsugagni inaagn ne bisamu. Yiagni n'oker mpi kearakagni nsag-na-viye ya Nzeam. ³ Samagni mpi djwi na su, djwi Nzeam atengami mbug e ndong mpi e nkab oshwong oziy e Kristu. Djwi na nde, ndi ngitshung ne bolog, ndi ngitshung n'eshing. ⁴ Mpi samagni djwi njii otuba nge esitubame djwi na ndong vii awo. ⁵ Kienagni na waagn etay e vear ali empaagn, mpi oyafangagni ntangu mpama ve. ⁶ Ntangu enkum, otuba ognu oyi na mawete. Tsugagni ivim okwa n'otuba djwi ojiagni oshin nge esikearagnu mvutu ya wur na wur. ⁷ Djwi na vii andir me, Tishikus asokabagninde. Nde ali otwung oso o ngaagn, ali mon otshia o wuo mpi mpfum n'otshia o Nzeam. ⁸ Djwi na wo, s'emotum me etay e gnu djwi okabagni vii ankum atelirsu n'ondu, mpi n'ompeagni kikesa n'itura ignu. ⁹ Ntatum wape, nde ti Onezimi, otwung o kieleka mpi e ngaagn, ali emog ne kati egnu. Asokabagniwo vii ankum aleleg nendien. ¹⁰ Arisitarkus, ewur eme e bolog, atotumagmi mbea, oshin omog ti Malako, otwung o Barnabasi eyokabagnime memen "Yug amiyia etay egnu, yamagninde", ¹¹ mby Yezu eviewo Yustus atotumagni ko mbea. Ne kati e waYuda imikum akristu, ko wog wasar vear atsankie wame djwi n'ekub e Nzeam. Ampikiwo kikesa entsign. ¹² Epafrasi atotumagni mbote. Ali mon gnu mpi mpfum e Yezu Kristu. Ntangu enkum atsande ontsugagni ne bisamu djwi oyiagni biu ne vii a Nzeam mpi ojiragni na nkie ntangu enkum vii aleang Nzeam. ¹³ Wog enagn, ndapea ntiegn djwi na nde, memen atsande nkie otshia biu djwi na gnu, djwi na vear a Laodisea ti vear a Yeropolisi. ¹⁴ Luka, munganga esu e ngaagn ti Demasi watotumagni mbea. ¹⁵ Peagni mbea ya atwung ali ne Laodisea, ti Nimfa, ti ya vear a evuru e Nzeam etsa nsama n'evuru ende. ¹⁶ Yug omishiragni ntanga onkean one, tumagni onkean owo ko n'evuru e Nzeam eli ne Laodisea mby gnu ko otangagni onkean omitumame Evuru e Nziam e Laodisea. ¹⁷ Kabagni Arsipusi ngean: "Osug n'otshia eyopii Nkum, pea djuung inkum n'otshia owo." ¹⁸ Ndopeagni mbea, mug Polo, n'ewuo eme memie. Kanagni eshing emintshung wo ne bolog. Ngrasia e Nziam eyi ya gnu.