¹ Nding ojiagni kibeni mbeagn e biu nge elelwime djwi na gnu, djwi na vear a Laodise, mpi djwi na vear entsign atongyen ntete na viy ve. ² Ndekii biu djwi wayii na kikesa n'itura iwo djwi wayi na lutondo ne kati ewo n'etura emog, wakug ngya na waagn e djwidjwi e njia oziy o Nzeam, eling ntuba Kristu. ³ Neti ende, otsun onkum e waagn ti ontiegn emizuba. ⁴ Ntuba ngwign djwi ekwon ngya na wur ata emog esiyia ondjimagni n'otuba oyang. ⁵ Ata me ndi etey na gnu ne djuung, kansi ne mpeve ndi ma gnu. Ndi n'osiang na ngyen oshin omiwong gnu vii ankum ne ndwong ti biu e lukwikilu egnu ya Kristu. ⁶ Oshin omijirgnu gnugnun Yezu Kristu ali Nkum, kienagni gna nde olwong omog. ⁷ Kangamagni ti nde kamsi oshung ne buu, tsugagni edzuu n'itsin ya nde, yimagni ne lukwikilu e djwidjwi oshin eyolongagni wo mpi ntangu enkum peakagni Nzeam nsag-na-viye. ⁸ Osugagni wur akayia ondjimagni n'otuba ontiegn e vear, oshin okab wo vii a vear, oshin oleang vii a buu ene, kansi epa oshin oling Kristu ve. ⁹ Djwi onen onkum o Nzeam ne djuung eli ne kati e Kristu. ¹⁰ Gnu, olagni ngiyuo na vim ankum ali ya nde. Nde wur eli nkum e biu inkum ti ikub inkum. ¹¹ Ya nde, obagagniwo mpi djuung, kansi epa ngibag i djuung na mbwo i vear ve, kansi mbag djuung eyum ya Kristu. ¹² Ne mbotika, opfugnagniwo gna Kristu ndwong emog. Mpi ndwong emog gna nde, omibiyagni n'ewa n'oshin oyikwikilugnu gnugnun biu o Nzeam emokea ombiya nde n'ewa. ¹³ Ntangu eyiwignu djwi n'ipwo ignu mpi djwi n'oshin okobagagniwo djuung, amokearagni ne luzingu ti nde mpi amitelolula n'ipwo inkum iyikisu. ¹⁴ Amibvuo enkeana eyitefugnike mpi eyitelogiki n'ewu, amilima wog mpi amikwog wog ne kulunsi. ¹⁵ Amilima biu i wankum ti ikub. Amapur nelien ti ne viy a vear djwi na ngyegne oshin emanungande ne kulunsi. ¹⁶ Wog enagn, wur apikug n'ombagagni ewu ve ne vii alir vim a nda to a gnwa, to djwi n'eshuu okina to djwi na ngwon empa, to mpi djwi na nshuu sabat. ¹⁷ Vim anagn ali kamsi agnigning a vim afwete ngya, kansi masonga i vii awo eli Kristu. ¹⁸ Kaku ata wur emog ve esikug onkumagni ifutu ignu, wur esodjimagni ndenden kakunde na lulendo to esokabagni ndenden asande nsama banzio. Oshin omog na wur ebansa ko vii ayiyen nde ti elekum omwong djwi na nginu inde i djuung. ¹⁹ Nde atokir ve nda ote, nda Kristu eli ote o djuung mpi etsandiy djuung opfugn, mpi etsansangisa eshim na ekiy djwi djuung inkum efwi oshin oleang Nzeam. ²⁰ Yug awignu ndwong emog gna Kristu mpi omilimagni ne mpfumi e vim a buu, djwi na nge eleang gnu wopeagni vim a buu: ²¹ kamsi vear atoseangi vii a buu ene ve : "oyavey ve, oyala ve, oyakir ve ?" ²² Vim anagn ankum, djwi vear walekii wog, eli vim afwete ngwa, oshin etuba nsiku mpi along a vear. ²³ Wansiku inagn wayen kamsi along a waagn, along akwon lulendo mpi atum wur na mpea djuung mpay. Kansi enkum enagn eli ko mpama, eli ko djwi na ndemfuka ti mpea djuung osiang.