¹ Opean, atwung, samagni djwi na su, djwi otuba o Nkum opagn etay enkum mpi evey lokumu kamsi oshin oliwo etay egnu. ² Samagni djwi silim ne mbwo i vear apwo, i vear a nkier djwi wankum kakuwo na lukwikilu ve. ³ Kansi Nkum apitsindjim ve asopeande biu mpi asowumagninde ne nteang e nkea waagn epwo. ⁴ Sili n'ekaagn ya Nkum susun olekiagni mpi ayakieakagnu vii ayokabagnisu. ⁵ Nkum avari itura ignu etay lutondo e Nzeam mpi inaagn i Kristu. ⁶ Atwung, siwigna ya gnu ne dzin i Nkum esu Yezu Kristu, na ngya etey n'otwung onkum oli n'epier epwo mpi epilani along ayiveygnu ya su. ⁷ Ojiagni gnemie oshin nge efwete gnu ndjie epier esu, djwi sikazinga ne kati egnu n'oyug ve. ⁸ Kaku vim a nda a wur emog ve ayilisu ngor sikwon mfuta, kansi ne kati e mpay ti mbangika, akikisu etshia, na mbiiy na otshuu, atunikisu djwi wur emog ne kati egnu akavara odzuru osu. ⁹ Yug akiisu ngwign ekayia ve djwi azangisu kiyeka, kansi akiisu ngwign djwi n'ompeagni mbanu djwi osadjiagni. ¹⁰ Ntangu eyikiso etay egnu, okabakagnisu ngean: "Wur etun nkie otshia akwon nda mpi." ¹¹ Djwi sitiyug oshwong wuwun ne kati egnu eli na vear alekii vii apwo, vear apileang nkie otshia ve mpi aletsug onen ko ne vii a mpama mpama. ¹² Situba ya vear anagn mpi siling ya wo ne dzin i Nkum Yezu Kristu na nkie otshia na ngemba mpi na nda ko asagn awo nkeang ewo. ¹³ Kansi gnu, atwung, oyalemagni ve na nkie vii a wuo. ¹⁴ Yug wur amitun ndemfuka ne vii amitubasu n'onkean one, kiragniwo wuo, oyafiyiagni ewur ti nde ve, djwi asatsiga na nsogn. ¹⁵ Oyoveyagni kamsi mbeni ve, kansi gniangagni nde kamsi otwung. ¹⁶ Nkum e ngemba ndemie opeagni ngemba ntangu enkum mpi n'oshin onkum. Nkum ayii nda gnu gnankum. ¹⁷ Ene eli mbea eme, Polo, ndopeagni mbea n'ewuo eme memie, ene eli ekea eme etsamentsug n'enkean eme enkum. ¹⁸ Ngrasia e Nkum esu Yezu Kristu eyi ya gnu gnankum.