¹ Djwi na vii alir eshu eyayia Nkum esu Yezu Kristu mpi oshin oyasanga su ti nde, siwigna ya gnu, atwung asu, ² na nkwon ngyia etura ne dzug ne dzug, wakwon ondjimagni djwi na mpeve emog, djwi n'oshwong omog to otuba omog, to mpi n'onkean omog osikug wo ondjimagni wuwun eyum ya su, ekab wuwun eshu eyayia Nkum emikug. ³ Wakwon ondjimagni n'eshin enkum djwi ekug nteang vii a ntun Nzeam atoyia, wayen na viy wur etwe Nzeam, mon emijing mbug. ⁴ Nde ali mbeni eyatun vii ankum a Nzeam to mpi eyatun wafukumini Nzeam. Nsuka ewo, ayatsande nkeanse ne tempelo e Nzeam mpi atubi ndenden ndug ndemie wur eli Nzeam. ⁵ Opikanagni ve gnugnun ntangu eyikime etay egnu, okabagnime vii ane? ⁶ Opeane, ojiagni vii nge alokir, djwi ayi mpwe ko ne ntangu ende enagn. ⁷ Djwi diswekamo e vii apwo etibana, esakwung ko wur elokir enagn akien. ⁸ Mby mbeni e Nzeam ayapwende, Nkum Yezu ayodjag nde ko n'opepe eyum n'odzum onde. Nkum ayofebe nde mpi ayomearande ntangu eyakab wo wuwun eshu ende etivanga. ⁹ Opwe eyapwe mbeni ayayiawo na biu o Satana, ti bidimu eshin n'eshin ti vii oyang, ¹⁰ ti oshin onkum eyadjimaka nde vear na nkie ipwo. Vim ane ankum ayalog wo djwi na vear aletsu ewa, djwi wakafivea ngaagn e masonga djwi ekakeamvuga wo. ¹¹ Wog enagn, Nzeam s'amatumande biu o njing mbug djwi wasadjir ko vii oyang. ¹² Nsuka ewo eli ko ayasama wo ewu e vear ankum akadjir ne masonga ve, mp ayiyenike osiang ne vii apwo. ¹³ Kansi su, ne dzin i Nkum, ntangu enkum sifwete nkeara nsag-na-viye ya Nzeam djwi na gnu, atwung ali Nkum amoleangagni. Djwi, Nzeam amosonagni yum ko n'itsin, djwi n'evug, djwi djuung ignu imikum santu ne Mpeve ti lukwikilu ne masonga. ¹⁴ Djwi na wo, s'oviagninde ne mbug along ayopeagni su djwi oviyagni nkembo e Nkum esu Yezu Kristu. ¹⁵ Wog enagn, atwung, yiagni ko biu. Kiragni ko along ayivey gnu ata n'otuba oso, ata n'onkean osu. ¹⁶ Opean, Nkum esu Yezu Kristu ndemie ti Nzeam, Tea su eyiteleang mpi eyitepii ngrasia ende, oshin o nkeya etura otswag otswag mpi ekaagn e wuo, ¹⁷ akeyi itura ignu mpi awong itura ignu djwi n'otshia o wuo mpi n'along a wuo.