¹ Ndasiamisa ansur a dibundu ali le kati egnu, me wur eli ku insur i dibundu, ewur otshia mpi ntumwa e mpay i Kristu ; mpi nde emog le kati vear eyayen nkembo eyayegnewo vear. ² Djwa la wo, ndosiamisa gnu, ansur a dibundu, na ngwunga ameme a Nziam ali kati la gnu. Liragni wo wuo, epa djwa walowignani la biu, kansi na luzolo egnu oshin oleang Nziam. Wumagni wo epa djwa ifuta i mbin ve, kansi djwa ifuta imileang gnu gnemie. ³ Yakiegni kesi otikumagni ankum a avear elelangidilignu, kansi yiagni andagmbug djwa la kimvuka e ameme. ⁴ Ntangu eyapwe ngungudi enen, ayaveygnu impu i nkembo ipikug mbia. ⁵ Oshin omog, gnu, enkwo, lemfukagni n'avear ayiwurwo le nteang egnu. Mpi, gnu gnankum, limagni omwong mpi sadisagni gnug na gnug; djwa Nziam apeleang avear omwong, kansi atsande mpeande ngrasia l'avear akwon lulendo. ⁶ Seangagni lulendo, yiagni avear a mpama le nteang e biu e Nziam djwa nde ojiragni le ntangu e wuo. ⁷ Peagni nde edzur egnu enkum, djwa nde alowungagni. ⁸ Kiagni vim ankum na kiteso, ngamagni viy. Mbeni egnu, diabulu,aletshitshim kesi ntambu elengeang,eleling nai esilande. ⁹ Lwagni gnu gnande mpi yiagni biu le lukwikilu egnu. Ojiagni gnugnun atwung agnu ali le buu waleyen mpai oshin omog. ¹⁰ Ne mbiy e mpay esiyen wur ne ntangu emog ekiag, Nziam emiywo la ngrasia, eyoviagni ne nkembo e mvwe na mvwe ne mbug e Kristu, asobongisagninde, asotsugagninde l'ondi mpi asopeagninde biu. ¹¹ Nde ali le dzug i vim ankum mvwe la mvwe. Amen! ¹² Ngiavey silive kesi otwung empitsuntseanga ve. Mpi eli ne mbug e nde emofugnagnimon onkean one. Ndosiamisagni mpi ndajir e kieleka memen vi amofugnagnime eli ngrasia e djwidjwi penza e Nziam. Kangamagni la wo. ¹³ Evur e Nziam eli le Babilone, emison Nziam kesi gnu, elopeagni mbea. Mon me Marko alopeagni mbea. ¹⁴ Peagni mbea gnug na gnug le mbug e mwaa engagni. Ngemba eyi la gnu gnankum eli ne Kristu.