¹ Adi didala mugogu digi dada ayoyo uga bwidi hasi gugi fumu gi Nzambi bugi di muganda dia gasoniga mugadji ye handi ye dia aga gondjidi mu idimbu nsambwadi. ² Didala wanzio dimosi ungolu munu gulonga mundaga igola:« Na wena ugugila mu gwanzulula bugi di muganda adidi?» ³ Mudu, umosi lo guwulu, to hashi to guchimanu ugagugidi gwanzulula to gugonda mu ganda wo. ⁴ Idilanga mukenda mwila lo ugakedi ye mudu ufedji gwanzulula bugi di muganda to mugu didanga. ⁵ Kaga umosi dia ngambila mbi:«Gudila lo! dala, fumu mugi ganda gi yuda, mudu yo wa gambididi mugio ganda gi Davidi, ugabingidi. ugugila mu gwanzulula bugi dio ye idimbu nsambwadi.» ⁶ Mugadji ga gifumu gi Nzambi ye hadu gwana amoni, ye mugadji ga akanga, idala mwana dimema; amoniganga nga mudu ugafa. Agakedi ye ibongu nsambwadi ye mesu nsambwadi ye mesu mo mena miwunga nsambwadi mi Nzambi mwa gadumisidi mu gifudji gikima. ⁷ Dia pusana dia senda bugi di gogu digidada di mudu yo ugabwisi hashi gu gifumu gi Nzambi. ⁸ Dangu diga sendjidi lumema bugi, hadu ngwana amoni ye akaga magumi madi ye ngwana dia fugamana gu mesu menzi. Konso mudu agakedi ye gidadi ye mabolu ma wolu magu zala ye bidi dibagulesa yisambu ya guigichi. ⁹ Awo abiganga mugunga uhie uhie:« Ayi ugugila mugu senda bugi ye ye guziya idimbu, mu mwila ayi ugafidi awulu nkulusi ye magila mayi maga panzaganin mu mwila gu gulusa hadu ama ganda makimina, ama ndaga makimina. ¹⁰ Usala mwila ohu gifumu ye asadi mugi fumu gi Nzambi, maga yala mugifudji.» ¹¹ Gunima, didalanga, ngiefanga mandaga mangi ma wanzio mukugu gifumu gi Nzambi, agakedi ye hadu amoni ye akaga. agakedi mafunda ye mafunda. ¹² A hosanga mundaga igola: «Lumema lwa gashidi awulu Nkulusi luguga mugu senda ngolu, gi mvwama, ndugi, ngolu, lugumu,» ¹³ Igefidi yima ikimina iga kedi guwulu ye awulu manu, hye gumachina ma manu, awulu nzadi (ye yikima yena) a hosa nga: « Lugumu, lugumu, lugumu, ye gifumu gwena yo wena gu gifumu gi Nzambi ye gwena lumema lumvula ye mvula. ¹⁴ Hadu ngwana amoni ahosa:« gukadi dio!», ye akaga dia fugamana ye diasambila.