¹ Polu ye Timotayi,asadi a Yisu Klistu,gwena asantu a Yisu Klistu ena gu mbu di Fidipo,gwena antwadisi a dimbundu ye mu gisalu Nzambi. ² Gu nwana nu ngolu ye pwede mu mbuga yi dada wedu ye yi fumu Yisu Klistu. ³ Ami iba ginzigisa madondji gwena Nzambi,mu dangu dikima diba gunwibuga, ⁴ Ami lo ifana gwega,mu isambu yami yikima mu mwila anu akima,mu gusamba mu kiesi. ⁵ Mu mwila muyo idadila nu mu mpila yi gusenda ndaga yi pimbu banda ufugu utegu ti mu dangu di. ⁶ Ami ngiena mu gugwigila mbi ayo uga bandjidi gunwena nu gisalu gi pimbu ye anu mugu laba nsuga yi gisalu gio ti mu ufugu wo u Yisu Klistu. ⁷ Gwena gagidi mbi ami gwena mu mwila nu ye luzolu lugola sila,mu mwila ami migunusanga gu muzima wami,ye mu mpila yami mudu u bologu nga mugu nwanina ye gumbula ndaga yi pimbu,anu nwena ye ngolu anwakima mu mbuga yami. ⁸ Nzambi ena mbangi wami mbi ami inunga mugukala gifa gimosi ye anu mu mpila yigu nuzolanga anu akima,nga gigu duzolanga Klistu. ⁹ Amo megulombanga mu isambu yami,gwena mbi luzolu lwenu lugumi lugola sila mu gwisiya mu ndungi sila. ¹⁰ Mu mwila anu nwisiyi gufani gisa amo mena mfumu,mu mpila mbi anu nukadi hadu a masonga ye hadu a pimbu gu mesu ma hadu akima mu ufugu ugesa Yisu. ¹¹ Ye kega anu nukadi awa guzala mu ndumba zi gagidi azio zigwisanga ye Yisu Klistumu lugumu ye mu gagidi ga Nzambi. ¹² Anedu akwigisi,ami izola anu nwisiyi mbi minianga makima migada mbudidi lomigakadji mbuga mugu mwanga nsangu yi pimbu gwena hadu akima. ¹³ Muyo itadi ami beni,agengididi akima a mbulu mbulu ena ha a Loma ye oho amosi ena agadji gambu esiyi mbanda mwanongu mbiami ngiena mudu u bologu mu mwila ami ngiena mu mwanga nsangu yi pimbu mu kumbu yi Klistu. ¹⁴ Kega,akwigisi engi ena ha munu gumwanga nsangu yi pimbu mu dangu di mu mwila fumu Yisu Klistu ye pimbu ye ngolu.Mu gugonda woma mu mwila lugwigilu lowu lwena gwena Nzambi lwena lugu gandama .Owu agu hosanga mu mwila kumbu yi Yisu mu mwila owu maga dadidi fumu giasadi sanga mu mumwanga nsangu yi pimbu aha mu gadji ga bologu. ¹⁵ Amosi,gwena gigidi,agusala mu mwila lulendu ye gimbeni.Ha amosi agumwanga nsangu yi Klistu ye manunga mapimbu. ¹⁶ Amosi agusala ye luzolu mu mwila Yisu,ye nga ye manunga ma gumwanga musamu u pimbu gwena o agonda gwisiya Klistu. ¹⁷ Ha aho aba gumwanga musamu u Klistu mu manunga mowu beni.Manunga mowu lo mena ma pimbu.Owu magu agununganga gupa mi pasi zingi. ¹⁸ Ha yoyo yena ye mwa ndambu funu!Hadu ena mugu mwanga musamu u pimbu muyo idadila Klistu ye mbi gwena ye manunga ma pimbu mbilo mabi,ami igukala mu kiesi mu mwila ami ngisi musamu u Klistu ngiuga mwangaganini ye ami migula ndanga gukala kaka mu kiesi. ¹⁹ Ami gwena mu kiesi mu mwila ami ngisi mbi Nzambi maga nwanina mu gutusa mu bologu.Yeyi agasala gio mu mwila ami ngisi mbi anu munu gusambilanga mu mwiula mi ye mpeve ivedila mu mbuga yi Yisu Klistu Yisu yena yami. ²⁰ Ami ngiena yelugwigilu lu gola mbi ami lo igabela munzu yami.Dangu dimosi,ami igakala ye gikesa dangu di nga gigakedi giogi mu dangu di hida. ²¹ Muyo itadila mi,ami iba guzinga mu mwila gugumisa Klistu ayo wena luzingu lwami ye lufwa lwena lufudu lwami. ²² Ha mbi ami ifana guzinga aha hasi mu mwila wami,ami iga sadila Klistu haha hasi.Ami lo ngisi sila mbi ami ifana gusala gio. ²³ Ami ngiena ye pwisa yi gwenda gomi ye gukala ye Klistu,gugakala pimbu sila. ²⁴ Ha mu mwila nu,gwena funu mbi ami zingi mugi mudu. ²⁵ Kega ami ngiena mu gugumbula ye ami ngisi mbi ami iga zinganga pembeni yanu,mu mwila mu gunusadisa mu gwenda gu mesu ye mugu gwigila sila gwena Yisu Klistu. ²⁶ Mu gio kega,anu nugakala ye kiesi giami mu mu dangu digesa guginzigila. Madonzi gwena Yisu Klistu. ²⁷ Zingenu luzingu lupimbu mu musamu u pimbu u Klistumu mpila mbi ,ami ngisi gbaga mbilo lo.Igakala mu kiesi tegu mugu hosa mbi anu nukadi awa guganda mana mu manunga mamosi. ²⁸ Anu nugonzi gukala mu woma wa mbeni.Gikesa gienu giga lesa mbi Nzambi magaziya ha anu yeyi maga nuhulusa. ²⁹ Mu mwila Nzambi uga nwifila kenda,uga nwegididi mbi anu nuniogugi mu mwila Klistu ye mugu gwigila mu yeyi. ³⁰ Anu nufana guganda muzima gwena aho agusanga miaga mu musamu u pimbu mu gudusa idumba yo yinu gatadidi munu gunwana,ye mbi ami yinwani nuni kega ,