¹ Mu mwila Klistu magu nuwa gikesa,mu mwila yeyi magu nuzolanga ye magu nuwa ngolu,mu mwila luzolu lwenzi ye kenda zienzi ziena mu nwena nu. ² Anu nukadi mu kiesi gi pimbu mu guzinga mu gimvuga,mu gukala mu luzolu lumosi,mu gimvuga ye mpeve yi vedila,ye mu gukala mu mabanza mamosi. ³ Anu nudi senzigu mbi nuhida amosi mu mfunu ye gukala lo gogu gugola.Mbalu yega,anu nukadi agu digulu muna ye zidjisa nganenu yenu yenu. ⁴ Anu nugambigu gugugisa pwisa yenu benu,ha mbalu yega yi hadu ega. ⁵ Kalenu ye manunga mamosi nga Yisu Klistu; ⁶ Ata giogio giagakedi nga Nzambi,yeyi lo aga disidi mu guguga Nzambi. ⁷ Ha mu mbalu yega ,yeyi maga digulu munini ye beni.Yeyi dia senda mbandu nga yi mudu u gisalu gumesu medu.Yeyi maga disidi nga mudu ye yeyi azinganga giogio mugu digulumuna. ⁸ Yeyi diaga digulumunini ye beni ye mugu zidjisa ti gulufwa awulu nkulusi. ⁹ Mu mwila gio Nzambi kega diaga muzangudidi ye diaga muwedi kumbu awulu di makumbu makima. ¹⁰ Kega mu kumbu yi Yisu mabongu makima mafana gufu gamana guwulu ye hasi ye gusi manu. ¹¹ Ye ganu dikima difana gudanga mbi Yisu KListu ena fumu,mu ngolu zi Nzambi Dawa. ¹² Ye kega apangi ziami amala aluzolu,nga giogio ginu galemvugidi,lo buna mbi mu mwila ami igakedi ho,ha mu dangu di hadu engi gunima diami,anu salenu mu mwila gugamba lugulusu lwenu beni ye woma ye madegida. ¹³ Mu mwila gwena Nzambi uba gusala mu gadji dienu luzolu ye kiyo anu nufana gusala mu mwila lugumu lwenzi. ¹⁴ Anu salenu yikima mu gugonda maboguda mbilo miniengu, ¹⁵ Mu mpila mbi anu nukadi hadu agonda fodu ye nukadi hadu a gigidi,ana a Nzambi agonda fodu,aba gugega nga dangu mu gifudji mu gadji di gibuga gi gisaga saga ye wimbu. ¹⁶ Mu gusanda ndaga yi luzingu mu mpila mbi ami kadi ye gibingu mu gudigumisa mu ufugu ugesa Klistu,mu mwila gio ami migesiya mbi tina ye gisalu giami lo gigakedi gi pamba. ¹⁷ Ha ata manziya ye mbi magila mami muma gaziagugidi nga magabu mu mwila Nzambi,ami igakala mu kiesi gingi sila mu nwena nu akima. ¹⁸ Ye mu mpila yoyo imosi,anu kega,nufana,gukala mu kiesi mu ngiena mi. ¹⁹ Ha inunga mbi mu kumbu yi Fumu Yisu Klistu,inudumisi Timotayi diodi,mu mpila mbi lapolu dienzi di sadi mi kiesi mu dangu di gesiya mbi luzingu lwenu lwena kiyo. ²⁰ Ami lo ngiena ye mudu mwega kaga Timotayi ayo uga senda ukedji wenu. ²¹ Mu mwila owu agu gambanga gubaga gowu beni ye lo gwena ho ena mu Yisu Klistu. ²² Ha anu nwisi mbi Timotayi maga sadidi gisalu gienzi,nga mwana yo wena mu gisalu gi Dada wenzi,ye kega maga sadidi yami mu gumwanga musamu u pimbu. ²³ Ami iba gununga gumudumisa mu dangu dio digesiya pimbu sila lufudu lwami. ²⁴ Ha ami ngiena ye luzolu lo mu kumbu yi Fumu mbi ami beni miya gwisa tama lo. ²⁵ Ami idala pimbu gunu dumisa kega pangi wami Epafodi ye udu guzinga yenzi,ye mbayi wami mu gidumba,ayo munu gatumisidi mu gusadisa mu mapwisa mami. ²⁶ Mu dangu di nugefidi mbi yeyi agakedi mukasi,yeyi agakedi sila uwa guwanda ye yeyi azolanga gukala yanu akima. ²⁷ Yeyi agakedi mukasi sila ye pembeni di lufwa,ha Nzambi diaga mwifididi kenda.Lombi yeyi buna,ha yami mu mpila mbi ami konzi gukala mu kenda. ²⁸ Ami igusala gisasu mugu nudumisa mu mpila mbi mudangu dinwa gumudala kega,anu nukadi mu kiesi ye ami lo igakala mu guboguda sila. ²⁹ Yambenu pimbu Epafodi mu kumbu yi Fumu mu kiesi zikima ye muzidjisenu nga hadu nga oho afana yeyi guyamba. ³⁰ Mu gisalu gi Klistu,yeyi magenzi gufa ye yeyi maga bigidi mu luzingu lwenzi mugusadi mi ye gumbagisa mu mapwisa mami mu gihani gienu dinu gakedi gudadi,anu lo nugafanini mugu sala.