¹ Ana,kalenu luzidu gwena ibudji yenu mu mbuga yi Fumu; mu mwila gio gwena mbuga. ² "Zidjisa dada wayiye maya wayi:" (gwena musigu utegu ye lachi), ³ "Mu mwila mapanzi mayi makima makadi pimbu ye mbi ayi uzingi mafugu madadi mu gifudji." ⁴ Ye anu adada,anu nugonzi guwa ana enu kabu.Anu nwasasi mu luzidu ye gulanda luzolu lu Fumu. ⁵ Ahiga,kalenu luzidu gwena alongi enu a gifudji,ye luzidu lu neni ye madegida,mu gimudu gikima mu mizima mienu.Anu azidjisenu nga ginu gasala gwena Yisu. ⁶ Anu nugonzi gwazidjisa buna mbi mu dangu dio diaba gunudala mu mwila gwawa kiesi.Mbala yega,anu kalenu luzidu nga ahiga a Yisu. anu gugisangenu mukanu u Nzambi. ⁷ Salenu mu mizima mienu mikima nga go mbi anu nuba gusadila Yisu ye lo mbi hadu. ⁸ Wisiyangenu mbi mu isalu yikima yipimbu ayo yiba gusala mudu mukima,yeyi maga baga lufudu lwenzi mu mbuga yi Yisu,akadi muhiga mbi loagonzi muhiga. ¹⁰ Mu gumanisa,sadi saganenu mu mbuga yi Fumu ye mu ngolu zienzi zikima. ¹¹ Vadenu mada makima ma Nzambi,mu mpila mbi anu nukadi awa guguga mu guganda mizima mu ndungi zi sadani. ¹² Mu mwila gidumba giedu lo giena gigu nwana ye musuni ye magila.Mu mbalu yega giogi giena ye ifumu ikima yi gimpeve,Afumu a gifumu gi piba,ye mihunga mibi mu ihani yena guwulu. ¹³ Mu gio,vadenu mada makima ma Nzambi,mu mpila mbi anu nukadi awa guguga gu mesu ma mabi mena mafugu ma. ¹⁴ Mu gio anu kalenu aguza nguluga sila.Salenu gio tegu mu gusa gigaba gi gagidi mu lugedu lwenu mu mpila yi gagidi. ¹⁵ Salenu gio tegu gunima di guvada gu milu mienu ndaga yi Nzambi yi pwede. ¹⁶ Mu mapanzi makima madudila sendenu lugwigilu,alo lufana gunuwa ngolu zi gulungusa mifu mikima mi mbeni. ¹⁷ Ye anu nuvadji pu yi gibingu,ye pogu yi gimpeve,ayo yena ndaga yi Nzambi. ¹⁸ Ye mu isambu yikima ye idilu,sambenu mu dangu dikima mu gimpeve.Ye magani mo,wanzulu lenu mesu ye madinda mani ye isambu mu mwila Akwigisi akima. ¹⁹ Ye sambenu kega mu mwila mi,mu mpila mbi mapanzi mapimbu madulu gidi mu dangu diba gwanzulula ganu.Sambenu mbi ami ngisiyi ye gagidi maswegamu ma ndaga yi Nzambi. ²⁰ Gwena mu mwila ndaga ami ngiena ngavuga mu mbuga,mu mpila mbi mu yoyi ami posiengi ye gagidi nga mu mpila yifana guhosa. ²¹ Ha anu nufana gwisiya kega mapanzi mami ye kiyo ami iguzinganga.Tisiki,pangi wami u luzolu ye luswegamu lu gagidi mu mbuga yi Fumu yeyi magu nwambila mapanzi makima. ²² Ami imudumi sidi mu gadji dienu mu mwila panzi yoyo imosi,mu mwila mbi anu nwisiyi mapanzi medu,ye mu mwila gusadisa mizima mienu. ²³ Wega mbi ngemba yikadi gwena apangi,ye luzolu mu lugwigilu ikadi mu mbuga yi Nzambi dada ye fumu wedu Yisu Klistu. ²⁴ Wega mbi ngolu zikadi ye mudu mukima ayo aho aguzolanga fumu wedu Yisu Klistu mu luzolu lugonda nsuga.