¹ Adu dwena mugu nubuga apangi edu,ngolu zi Nzambi ziga monigidi mu mabundu ma Masedwani. ² Mu gadji ga minianga mikima minu gadadidi,kiesi giowu migahida ganini ye gugonda gowu mu guga vadidi gimvama gingi sila mu mpila yi pwede muyo idadila awu beni. ³ Owu,ami iba guda gimbangi,mbi mahananga mu luzolu lowu beni mgabu nga mpila yi gubaga gowu,ye guhida kega gubaga gowu, ⁴ Owu adu wonzilanga mugi ngolu ngolu mu gusenda magabu mo maga kedi mu mwila Asantu. ⁵ Ye owu lo aga hanini nga mpila yidu yindulanga du,ha o beni tegu aga dihanini gwena Fumu Yisu,gunima guwena du nga luzolu lu Nzambi. ⁶ Adu duga ponini Tite mu gumanisa gisalu gi mu mpila yi pimbu gu nwena nu,nga mi mpila ya gayanzigidi. ⁷ Mu mpila yimoshi mbi anu nugandamani mu mapanzi makima,mu lugwigilu,mu ndaga,mu gwisiya,mu gikesa gikima,ye mu luzolu lwenu gu dwena du,salenu mu mpila mbi adu dukadi ngolu kega mu gisalu gi gipi,bu. ⁸ Ami lo inwambila gio mu mwila gunuwa mbuga,ha mu mwila gunu lesa,mu gikesa giagwenu,masonga maga gidi genu. ⁹ Mu mwila anu nwisi ngolu zi Fumu wedu Yisu Klistu,ayo mu mwila nu dia digumusa mudu pamba,yeyi agakedi mvama,mu mpila mbi mu gudigulu musa gwenzi anu nugumi amvama. ¹⁰ Gwena ndaga yiba gunuwa mi awulu,mu mwila yoyi yiguga yanu,gwisigu mbi anu buna nuga banzidi gugana,ha anu nuga senzidi lukanu mbanda mvula yihida. ¹¹ Landenu di gusenda lukanu,mu mpila mbi gubaga gwenu gugugi samani mu mamvudu mu tina zio zinwendanga mu luzolu lwenu. ¹² Luzolu lupimbu,mbi lolu lwena,gwena pimbu mu mpila gibingu gienu gikadi mu gihani,ye lo mbi gigonzi. ¹³ Mu mwila lo gwena mbi adu dunu nwegi mu minianga mu gusadisa agwenu,ha mu gulanda mbandu yi gunusa gigeledi:mu mapanzi ma dangu di mapanzi menu mafunu muma ganusadidi mu yima yenu yi mfunu, ¹⁴ Mu mpila mbi mapanzi menu mafunu masadisi gigeledi agwedu,mu mpila mbi nukadi gidesu gimoshi, ¹⁵ Nga giga sonamana:ayo uga dodidi gwingi lo agakedi ye yima yingi,ye ayo uga dodidi ndambu lo aga gonzidi gima. ¹⁶ Madonzi gwena Nzambi mu yo yaga sidi mu muzima u Tite mu gio tina zienzi mu gadji dienu; ¹⁷ Mu mwila yeyi maga yambidi gulomba gwedu,ye gikesa giega gihe gihe ye mu luzolu lwenzi lukima yeyi aga gadugidi mu gwenda gunwana nu. ¹⁸ Adu dwa gumuduma ye pangi umoshi wena ngolu mugu gumisa,mu yo idadila musamu u pimbu u mabundu, ¹⁹ Ye yoyo kega waga ponini mu mabundu mu gukala nsadisi wedu mu mibembu mi gisalu gi gipimbu,mbi adu dugugisi mu ngolu zi Fumu ata gimbangi gi luzolu lwedu lu pimbu. ²⁰ Adu dwena mu gugana giogio,mu mpila mudu umoshi lo ufana gudu nganina mu yo idadila wingi u yima yi yidu bagusenda,mu mbuga yi yoyi adu duba guhana ukedji; ²¹ Mu mwila adu duba gugamba yoyo yena pimbu,lo mbi gu mesu ma Fumu buna,ha kega gu mesu ma hadu. ²² Adu dwa guduma pangi wedu mu gwenda ye owu,ayo wudu gadadidi mbi yeyi ena gikesa mu yima yikima,ye ayo ugu dilesa gwingi kega mu mbalu yi mu mwila minu mienzi gunwena nu. ²³ Mu gio,mu yo idadila Tite,yeyi ena mu gimvuga gimoshi ye ena musadi wedu mu gisalu gi gumesu menu;ye mu yoyo idadila apangi edu,owu ena antumwa a mabundu,mu ngolu zi Klistu. ²⁴ Nwawi mu gio,gu mesu ma mabundu,gimbangi gi luzolu lwenu,ye anesenu mbi adu dwena mu lugumu lu gunu dala nu.