¹ Gukala ye magani magifa gio,mbayi uluzolu,adu dufana gudiofa mu gifa gikima gi masumu ma gimusuni ye ma gimpeve,mugu dwana yima yedu yi usantu ye woma u Nzambi. ² Anu nufana guduwa du gihana mu mizima mienu!Adu lo duga bedisidi mudu,lo duga bebisidi mudu,lo duga senzidi mbingu yi mudu. ³ Lo gwena mbi mu mwila gunu gongila nkanu ami aba gunwambila mu mpila yi gifa gi;mu mwila ami inwambididi mbi anu nwena mu gadji ga mizima miedu gukadi luzinga ye lufwa. ⁴ Ami ngiena ye minu mingi mienu,ami ngiena ye mapanzi makima mefana gudi gumisa mu mbuga yenu;ami ngiena uwa guzala ye lusadisu lwenu,ami ngiena mu kiesi mu gadji nga minianga mikima. ⁵ Mu mwila banda gudula gwedu gu Masedwani,musuni wedu lo wena ye guhu luluga gumoshi;adu mudu gabula manini mu mpila yiguga,gunwana hadji woma mu gadji. ⁶ Ha Nzambi,ayo ugu sadisanga hadu o agu niogulanga,yeyi maga dusadi sidi mu gudula gu Tite, ⁷ Lo buna mu gudula gwenzi,ha kega mu lusadisu lwenzi beni Tite mu mpila ya difilanga mu mapanzi menu:yeyi madu delanga kiesi gingi agio giaga kedi giogi mu mwila nu,gudila gwenu,ngolu zienu mu mwila mi,mu mpila mbi kiesi giami giga kedi gingi sila. ⁸ Ata giogio giga gunumengidi mu muganda wami,ami lo ifana gwalu muna muzima.Ye mbi ami yalu muna muzima,mu mwila ami idadidi gudadila mbi muganda wo wuga nuwedi kenda,ata giogio giugakedi wu dangu dambu, ⁹ Ami ngiena mu kiesi mu dangu di,lo mbi mu mpila yinugakedi mu kenda,ha mu mpila yi kenda zienu gizi nudwadidi mu gwalumuna muzima;mu mwila kenda zienu zigakedi mu mwila Nzambi,mu mpila anu nugonzi guyamba mu mbuga yedu panzi yibi. ¹⁰ Mu gio,kenda zi Nzambi zigu hananga gwalumuna muzima mu mapimbu muyo yinu gagonzi gwalumuna,mu mpila yo kenda zi gifudji zigu hananga lufwa. ¹¹ Ye mu kenda zio zimoshi mu mwila Nzambi,tina ziegi zigonzidi gu nwena nu!Lusambi sulu lwegi,gisaga saga giegi,woma wegi,manunga magola,lulendu lwegi,ndola yegi!Anu nuga dilesidi mu ihana ikima mbi anu nugakedi ukedji mu musamu wo. ¹² Mbi ami maga nusonigididi,lo guga kedi mbi mu mwila yo uga duganini,lo mbi mu mwila yo uga yambidi;guga kedi mu mpila mbi tina zienu mu mwila du zilesa mani mu gadji dienu gu mesu ma Nzambi. ¹³ Gwena mu mwila gio adu duga kedi ye lusadisu.Ha,mu gubagisa lusadisu kega,adu dugakedi mu kiesi zingi mu mwila Tite,mu yeyi manunga medu maga gumini pwede mu mwila anu akima. ¹⁴ Ye gu mesu menzi mbi ami ngiena mu kiesi,ami lo ngiena mu gisaga saga;ha nga gidu ganwambididi mu mbuga yi gagidi,mu gio adu dwena mu kiesi mu mwila Tite udi siyiyi mu gukala mu masonga kega. ¹⁵ Yeyi munu gidilesa mu gadji dienu,mbi adu dumuzodi gwingi sila mu mbalu yi mbadi,mu mapanzi mapimbu ma gulemvuga gwenu,ye guyamba gwenu gunu gamuyambidi ye woma ye madegida. ¹⁶ Ami ngiena mu kiesi mu mpila yiga dihanini gunwena nu.