¹ Adu dwisi mbi,nzu yi yidu guzinga aha ashi yifa,guwulu adu dwena ye nzu ayo yena gisalu gi Nzambi,nzu yi mvula ye mvula ayo iga gonzidi gudunga mana gu miogu mi hadu. ² Kega adu duga ngananga munzu yo,mu gununga mbi duga dunga nzu yedu gu wulu, ³ Mbi adu sila dwena ye miledi lo mbi kagi. ⁴ Mu gio mu mwila adu dwena munzu yo,adu dwena mugu boguda mu nzu yo,mu gulenziga mu mwila adu duzola,lo mbimu gukala kagi,ha mugu vada,mu mpila mbi aho agafa,luzingu lwamini. ⁵ Ye ayo uga duhidigidi mu gio,gwena Nzambi,ayo uga duwedi moni. ⁶ Adu dwena kaka awa guzala ye minu,ye adu dwisi mbi dwena mu guzinga ye mwila wu,adwi dwena mu guzinga gidadi ye Fumu. ⁷ Mu mwila adu dwena mugu zinga mu lugwigila,lo mbi mu gudala. ⁸ Adu awa guzala ye minu ye adu duzola mu gugaduga mu mwila wu ye mu guznga heyi heyi ye Fumu. ⁹ Gwena mu mwila gio adu dwena mugusa ngalu,mbi adu dukadi pimbu,ata gidwena mu mila mi,ata mudu gagaduga. ¹⁰ Mu mwila gudu lombugila adu dumonigi gumesu ma mesa ma mifundu mi Klistu,mu mpila hoshi mudu ayambi gabu dienzi di pimbu mbi lo dibi mu mpila yi gisalu gienzi giaga sadidi,mu mwila wenzi. ¹¹ Mu gwisiya woma wu Nzambi,adu dwena mu gugamba mpila yi gubinga hadu;Nzambi udwisi,ye inunga mbi mu mabanza menu anu nudwisi du kega. ¹² Adu lo dufana gudi dwadisa mbi adu beni kega gu mesu menu;ha adu duba gunuwa giyega gigu digumisa mu mapanzi madu dadila du,mu mpila mbi anu nuhani mvudu gwena o aga disigisa mu yo yena mu mila ye lo mbi mu mizima. ¹³ Mu gio mbi ami ngiena mu lugalu lu manunga mami,gwena mu mwila Nzambi;mbi ami ngiena mu mbuga yi pimbu yi manunga mami,gwena mu mwila nu. ¹⁴ Mu mwila luzolu lu Klistu lugu dudwalanga gu mesu,mu mwila adu dugu nunganga mbi,mudu umoshi mbi ufa mu mwila adwakima,akima kega ena awa gufa; ¹⁵ Ye yeyi agafidi mu mwila mudu mukima,mu mpila aho aguzinga agonzi guzinga mu mwila owu beni,ha mu mwila yo aga fidi ye uga fudumu gidi mu mwila owu. ¹⁶ Mu gio gubanda dangu di,adu lo dwisi mudu umoshi mu mbuga yi musuni;dangu di adu lo dumwisi mu mpila yi gifa gio. ¹⁷ Mbi wena mu gadji ga Klistu,ayi wena ekelamu yi mpa.Mapanzi magulu mafana guhida,mapanzi makima maguma mahe mahe. ¹⁸ Yikima yo,yigudunga gwena Nzambi,ayo uga dugosidi ye yeyi mu mbuga yi Klistu,ye maga duwedi gisalu gigu gosa. ¹⁹ Mu mwila Nzambi agakedi mu gadji ga Klistu,mugu gosa gifudji ye beni,mu gugonda gulomba gwena hadu mabi mowu,ye yeyi diaga sidi mu dwena du ndaga yi gugosagana. ²⁰ Adu dugusala kega gisalu gi gintumwa mu mbuga yi Klistu,nga gidu longanga Nzambi,adu mu gunu wanzila mu kumbu yi Klistu:nukadi awa gugosagana ye Nzambi! ²¹ Ayo uga gonzi gwisiya masumu,mu mpila mbi adu dugumi mwena yeyi gagidi ga Nzambi.