¹ Dubandenu adu beni mu gudi dwadisa mu mpila yi mpa? Kwiyo adu dugakedi ye mfunu,nga amoshi,mu miganda mi gulomba gunwena nu,mbi lo mu yo inu dadila nu beni? ² Gwenu anu nwena miganda miedu,miga sonamana mu mizima miedu,mige siyagana ye miga dangamana gwena hadu akima. ³ Anu nwena miganda mi Klistu,miga sonamana mi isalu yedu,lo mbi ye tinta,ha ye mpeve yi Nzambi u moni,lo mbi ye mesa ma mamani,ha awulu mesa ma gimudu,mu mizima. ⁴ Gusa minu go,adu dudikwedji mu mwila Klistu gu mesu ma Nzambi. ⁵ Lo gwena mu mwila guhosa mbi adu beni dwena ngolu mu gubaga gima gimoshi nga go mbi iduga gudwena du beni. Ngolu ziedu,mu gwalumana,ziduga gwena Nzambi. ⁶ Yeyi maga dugumisi ngolu mugukala antwadisi a ngifila gani yimpa,lo mbi mu miganda,ha mu gimpeve,mu mwila miganda mumi guziyanga,ha mpeve yigu hananga ngolu. ⁷ Mu mwila mbi isalu yi lufwa isagamana ye miganda awulu mamani,mu migakedi mi lugumu,mu mpila mbi mwana wu Isaledi lo afana gusa mesu menzi gu mbunzu yi Mose,mu mwila lugumu lu mbunzu yenzi,ata giogio gi gwena mbi lugumu lwenzi mulu gahida golu. ⁸ Mbalu zigwi isalu yi gimpeve yiga hidagana lugumu! ⁹ Mbi isalu yi zengulu nkanu migakedi mi lugumu,isalu iga gidi yena yigu hidagana lugumu. ¹⁰ Ye gu masina ma giyega,ayo yigakedi yilugumu lo yigakedi kega,mu mwila lugumu lo luga hidaganini lugumu. ¹¹ Mu gio,ayo yigakedi mu guhida goyi yigakedi yi lugumu,yigakedi yiga diwenigila mu lugumu lugola. ¹² Gukala ye ndungi zio,adu dwena ye pwede yigola, ¹³ Ye adu lo dugusalanga nga Mose,ayo usanganga gidambula gu mbunzu yenzi,mu mpila mbi ana a Isaledi agonzi gusa mambunzu mowu mu nsuga yi isalu yo igahida. ¹⁴ Ha owu aga gumini mizima gugola mu gwifa.Mu mwila de mwanongu gidambula gio giena kaga,mu dangu diaba gudanga muganda wu gwifilagani yi gulu,ye lo yi gwendanga gu mesu,mu mwila gwena mu Klistu yoyi yigubilanga. ¹⁵ De mwanongu,dangu diaba gudanga Mose,gidambula gwesa gumu fuga gu muzima; ¹⁶ Ha mu dangu dianzuluga muzima gwena Yisu,gidambala gio gifana gugaduga. ¹⁷ Mu mwila Fumu Yisu ena mpeve;ye aho ena mpeve yi Yisu,gwena hoho ena ngemba. ¹⁸ Adwakima dwena mbunzu yigu nzuluga,dudidalenu nga mu gipela gi Fumu,adu dwena awa gusobuga mu mpila imoshi,lugumu ye lugumu,mwena Fumu Yisu,ye mpeve.