¹ Buna yimona mu koku ku lubakala lu yuna wufonga ga kunda, nkanda wusonama ye zingama mukati ye nseki ye batula dimbu. ² Yimona mbasi mosi lulendu wubokedingi mu ndinga ngolu: nani wuna ye nzitusu mu kuzibula nkanda zingama ye vunzuna dimbu? ³ Nkatu mu zulu, kani ga ntandu ntotu, kani nsi ntotu, wuna wufuana mu zibula ata kanga nkanda zingama. ⁴ Yidila mu mansanga mankadi kadi nkatu yumonika wunzitusu mu zibula nkanda zingama ata tanga. ⁵ Kansi kinunu kimosi kiawu kintela: << kudidi ku! tala nkosi kanda di Yuda, muanzi Davidi wununga ye wufuana mu zibula nkanda zingama ye bidimbu nsambuadi.>> ⁶ Ga kati kunda ye bantu baya bazingidingi, ye kati ki binunu, yimona muana memi wukala gana; wukala bonsu wufongama. wukala ye mpoka nsuambuadi ye mesu nsambuadi mena mpefi nsambuadi bafila ga ntotu wakulu. ⁷ Wupusa ye baka mvuilu nkanda zingama mu koku ku kibakala lu yuna wufonga ga kunda. ⁸ Ntangu kabaka nkanda zingama, bantu baya bazingidingi ye binunu makumodi ye ya babua luse ga ntotu ga ntuala muana memi. bakala konsu muntu lungungu ye mbungu mosi ye wola yiteba ye dimbu di kimfimbidi ditasonga bisambu bi ba Nlongu. ⁹ Bayimbila nkunga mpa Wunzitusu wuna mu baka nkanda zingama ye katula yuna dimbu kadi wukeluka kimenga ye mu menga mangeyi, wubaka mudiambu di Nzambi, bantu ba makanda makulu, ndinga zakulu, bulu biakulu bi bantu ye nsi zakulu. ¹⁰ Wubaganga kintinu ye ngudi zinganga mu kisalu ki Nzambi betu ye si bayala ga ntotu. ¹¹ Landila, yitala ye wa ndinga mafunda ma mbasi ga kinsungidila ki kunda, ntalu bawu yikala malundu makumodi, ye bantu beta zinga ye binunu. ¹² Batedingi mu ndinga ngolu muana memi wukeluka kimenga wuna ye nzitusu mutambula lulendu, kimvuama, nduka, ngolu, nzitusu, nkembu ye kembila. ¹³ Yiwa bigangu biakulu bikala mu zulu ye ga ntotu, kunsi ntotu, ga ntandu mbu ye bobayani bakulu bena muna batedingi: nkembulu, nzitusu, nkembu ye kimfumu ku yuna wuna ga kunda ye ku muana memi bilumbu biakulu. ¹⁴ Bantu baya bazingidingi bata: Amen ye binunu bafukama ye sambila.