¹ Sonika ku mbasi dibundu di Efeso: tala matedi yuna simbidi ntetembua nsambuadi mu koku kuyani ku lubakala. yuna tadiata ga kati ki minda ntanu mi wola tedi bu: ² Nzeyi mawugengi, salu kiaku kingolu ye luzindalalu lungeyi ye kilendi Sala kimvuka ye bawu baganga mambi ku, ye wumekeni bana bakibokilanga bantumua kabena boku ye wubasoluedi minte miluvunu. ³ Nzeyi luzindalalu lungeyi ye wusiamini bumbidi kimpola mudiambu di nkumbu munu ye ku yoyedi ku. ⁴ Kansi, tala mangina nguisani ye ngeyi ku: losedi zola kuaku ku nteti. ⁵ Bambuka kuaku moyu geyi buididi. vilula kuaku ye ganga bonsu wugangidingi mu luyantiku. ngatu nkutu kuviluki ku, si ngisa ku ngeyi mu katula muinda ga fulu kiyani. ⁶ Kala buna, nzeyi kadulu kiyani kimboti mu ngeyi: wu menganga momuini mingadi mi biteki baganganga, gangu yi menganga munu diaka. ⁷ Bika yuna wuna ye makutu kawa magogedi Mpefi ku mabundu. ku yuna si wununga, si yin'gana luve kadia mu nti luzingu wuna mu kiala ki Nzambi. ⁸ Sonika ku mbasi dibundu di Simirine: tala Mana matedi yuna wunteti ye nsuka, yuna wufua ye vutukidi mu luzingu. Nzeyi mpasi zingeyi ye bumputu,( kansi wuna mvuama); ⁹ nzeyi mfundi mi luvunu mi bana bakitumpidikanga baYudayo kansi kabena boku, ye bena nluka satana. ¹⁰ Kubangi ku mpasi zita kukingila. tala, tebu kumini ku nsuka mu kutuba bankaka mu benu mu boloku musa nde lumona mpasi mu bilumbu kumi. lulemvuka ti lufua ye si lugana kolowa ki luzingu. ¹¹ Bika yuna wuna ye makutu kawa magogedi Mpefi ku mabundu. yuna si wununga ka si kamona mpasi ku mu lufua lunzodi. ¹² Sonika ku mbasi Pelengami: tala matedi yuna zimbidi mbedi luyalu yi menu modi: ¹³ Nzeyi ga wuzingilanga, kunda di satana. kansi lundidi nakekete nkumbu munu, ye ku katikisi lukuikulu luaku mu munu ku, kani mu bilumbu bi Antipasti mbangi munu, nlembami munu wugonduka ga kati kibenu; Kuna kiti ki satana. ¹⁴ Kansi, ngina ye mayikubedila: wuna ye bantu ga kati kibenu bakuikilanga nakekete ku malongi ma Balama, wulonga ku Balaki mu tuba tadi di ntesusu sakuba ga ntuala bana ba Isayeli, musa nde badia nsuni basadila mu biteki ye bakigana ku bizumba. ¹⁵ Mumpila mosi, gena nkutu bantu ga kati kibenu bakuikilanga nakekete malongi ma mvangi biteki. ¹⁶ Viluka kuaku! go nkatu si kinanga ku mu kuisa ye kubanuanisa mu mvita di mbeni lunianga yitukanga mu nlelamu. ¹⁷ Bika yuna wuna ye makutu kawa mana matedi Mpefi ku mabundu. ku yuna si wununga, si yin'gana mana ye tadi dimpembi ga ndandu go gayani ga sonama nkumbu mosi yizayakeni kaka ku yuna tambuedi yawu. ¹⁸ Sonika ku mbasi Tiatila: tala n' gogu mi muana Nzambi, wuna mesu mona kuani nlemu tiya ye malu mona kuani kisengu ki mpembi kimbidi. ¹⁹ Nzeyi mavanga mangeyi, luzolu lungeyi, lukuikulu lungeyi, salu kingeyi, ye luzindalulu lungeyi ye mavanga mangeyi ma bungangi malutidi manteti. ²⁰ Yidina, yikusembedi bu: wusiaminanga Zezabelu wukitumpidikanga mbikudi. mu malongi mayani, wukolumunanga minsadi mimunu mpasi bata bizumba ye badia madia malambukila mu biteki. ²¹ Yingeni ntangu mu viluka kansi ketasonga luzolu lukuviluka mu bizumba biyani ku. ²² Tala, sintuba mu mfulu kimbefu ye mpasi zingolu, ba batanga bizumba ye yani; go kabuaku baviluka mu maganga mawu. ²³ Si yigonda bana bawu bakulu, ye mabundu makulu si bazaya nde ngina yu mekanga mabanza ye luzolu. si yivutulula ku konsu yuna bonsu maganga mayani. ²⁴ Kansi ku basidi mu benu ku Tiatila, ku bakulu bobayani katambudidi malongi momuini ku, ye kabazeyi ku momuini bankaka babokilanga bima bindimuka satana, kubenu nteti: ka silutuika zitu kinkaka ku; ²⁵ Mu mambu makulu, lufeti kala nakeketi ti ngisa munu. ²⁶ Ku yuna si wununga ye ganganga mana yiganganga ti nsuka, sigana lulendu ga zulu nsi zakulu. ²⁷ Si kabayala ye nzuani kisengu; si kabazuba bonsu biwumbu bisuma. ²⁸ Bonsu yintambudila ku Tata munu, sin'gana bufuanikini ntetembua nsiuka. ²⁹ Bika wuna ye makutu kawa mana Mpefi katedi ku mabundu.