¹ Muntangu Yesu kamanisa longa nkangu wun' widingi, wuvutuka ku Kapenawumi. ² Kinuani kikala ye nanga wubeledingi lukufi muzenga nsinga mbundu, kayangaledingi bumbidi. ³ Bubagogila Yesu kawa, wumfila bampala zimpu ba Nyudayo mu kunlomba kesa gulusa nanga yani. ⁴ Bakuma ku Yesu, bawu bambombidila ye bata:" bufueni wuntambudila mawu. ⁵ Mudiambu wuzolanga nsi betu ye yani wutunga nluka." ⁶ Yesu wuyenda ye bawu. kabakala ntama ye nzo ki ntangu kinuani kifila bakundi mu kuntela:" Mfumu, kukigangi mpasi zinani ku, kadi kina wudedama ku wukota ku nsi nludi munu. ⁷ Yidina yikizengedi dîawu munu mosi lulendu lukuisila ku ngeyi. kansi goga n' gogu mosi, ye nanga munu si kabeluka. ⁸ Ye munu ngina ye lulendu, ye binuani kunsi lutumu lumunu, ye go ntedi ku mosi:" nda" ye wedi ku wunkaka:" nza" ye wisidi, ku nanga munu:" ganga buawu, ye gangidi." ⁹ Muntangu Yesu kawa n' gogu miani, Wuyika mukuma kiyani, buna wubaluka ku kibuka kinlendingi wuta:" ntedi buawu, kani mu Isayeli kimueni mpila yina lukuikulu ku." ¹⁰ Ye mu mvutuka ku nzo, bantumua bamona nanga mu mavimpi ma mboti. ¹¹ Landila Yesu wuyenda ku mbanza babokedingi Nayina, minlongoki miandi ye kibuka kineni beyedingi yani nzila mosi. ¹² Muntangu bafinama ye muelu mbanza, banetingi ga ntotu mvumbi, muana mosi wu fola di nkentu, ye bakala yandi mu kibuka kimfunu ki mbanza. ¹³ Mukumona, Mfumu kiadi kimbaka mudiambu diyani ye ta:" kudidi ku." ¹⁴ Wufinama ye Simba nkela, bawu banetingi yani batelama, ye wuta:" muana toku yikutumini, vumbuka." ¹⁵ Mvumbi wufonga ye goga. wumvutula ku ngudi yani. ¹⁶ Bakulu bonga bubabaka, basanisina Nzambi ye ta:" Mbikudi wuneni telemesu ga kati kibetu ye Nzambi bumini nkangu yani." ¹⁷ N' gogu wani mu Yesu wumuangana mu Yuda diakulu ye mvivi. ¹⁸ Minlongoki mi Yowani minata mambu mana ku mfumu bawu. Yowani wubokila bodi mu minlongoki bayani. ¹⁹ Ye wubafila ku Mfumu:" nge yuna wisidi to tukinga wunkaka?" ²⁰ Bubakuma ku Yesu, bantu bana bantela:" nge yuna takuisa to tufueti kinga wunkaka?" ²¹ Muntangu yina Yesu wubaka mbefu zimbidi, min' ganguki ye mbefi zimbi ye dukula mbuenu ku mpofu zimbidi. ²² Wubavutulula:" luezayisa ku Yowani mana lumueni ye luwidi: mpofu bamueni, makoka madieti, mfua mi buazi baveledi, mpukutu ziwidi, mvumbi zifutumukini, nsamu wu mboti wuzayikusu ku bamputu. ²³ Mayangi ku yuna si kakala ntesi sakuba ku." ²⁴ Ntangu ntumua zi Yowani bayenda, Yesu wun' gogila ku kibuka:" nki luyemona ku nsi nkatu? didi dinikueningi mupepe? ²⁵ Buna nani luyetala? muntu wuvuata nledi mi ntoku? kansi bana bavueti nledi mi kimvuama ye bazinganga mu ntoku bena mu nzo mintinu. ²⁶ Buna nki luyemona? mbikudi? inga, yiluzengedi buawu, ye ka mbikudi nkutu ku. ²⁷ Mukuma kiyani busonama:" mfidisi ntumua munu mu kubika nzila ga ntual' aku. ²⁸ Yiluzengedi buawu, ga kati ki bawu babutuka ku nkentu, ga nkatu yu wuna mbuta go ka Yowani ku. ²⁹ Muntangu nkangu wakulu wu nwa ye kani mimvakusi mi mpaku, bazaya mfundusu Nzambi. bakala mu kabu di bana babotama mbotokolo Yowani. ³⁰ Kansi Bamfadisi ye mvangi minsiku bakatula dibansa dina Nzambi kabadila, mukonda botama ku yani. ³¹ Kunima nkutu mfuanikisa bandu yani? kunani bafueti fuanikisa? ³² Bafuaniukusua ku bana bafongedi ga kifulu ki nkangu ye bata bokila bankaka ye bankaka Muta:" tulusikidi mpitulu ye kalukinini ku, tulubongedi nkunga mi masika, ye kaludidi ku. ³³ Kansi Yowani mbotiki wuyisa, kadidingi mampa ku, ye kanuini malafu ku, ye lutedi nkuyu. ³⁴ Muana muntu wisidi, ta dia, nua ye lutedi:" ndiafu ye nkodi malafu, nkundi mimvakusi mi mpaku ye minsumuki." ³⁵ Kansi nduka yizayakana ku bana bakulu." ³⁶ Mfuadisi mosi wuntumisa mu dia yani, wukota mu nzo Mfuadisi ye mata ga mesa. ³⁷ Ga nganzumukini nkentu mosi wu mbanza wukala nsumuki, wu nya nde wukala ga mesa mu nzo Mfuadisi. wunata kibungu ki mafuta mansunga, ³⁸ Ye baka kifulu kunima, yanikulu mu mansanga, ga malu ma Yesu buna wukusa malu mani mansanga. wunikuna mawu ye nsuki zani, wumbubakana mawu ye tiamuna mana mafuta mansunga. ³⁹ Mumbuenu mana, Mfuadisi wuntumisa wukitela:" go muntu yuna mbikudi kena si kazaya nkentu yuna wuta ku nsimba nani, ye nani kena, nsumuki." ⁴⁰ Yesu wubaka n' gogu ye wuntela:" Simoni, diambu ngina diawu mukutela." wuvutula:" Mfumu goga." ⁴¹ Yesu wuta:" muntu mosi wukala ye bantu bodi bandefa mbongu, mosi kafueti bivanza bitanu bi mbongu, wunkaka makumatanu. ⁴² Bukina nde kabavua kima ku mu kumfuta, wubamuesisa nlemvu mu mfuka bawu ku babodi. nani mu bawu babodi si wutoma kunzola bufuana?" ⁴³ Simoni wuvutula:" mbenzi ku yuna kalemvokedi mfuka neni." Yesu wunteledi:" tomeni zenga." ⁴⁴ Ye Yesu wubaluka ku nkentu, ye tedi ku Simoni:" mueni nkentu yuna, nkotedingi mu nzo ngeyi ku ntiamunini masa ku mu malu, kansi yani sukuedi malu mamu mu mansanga, ye kungueni mawu ye nsuki ziyani. ⁴⁵ Kumfibidi ku, kansi yani tuka buna kakotedi, kayambuedi nkutu ku mu kumfiba malu. ⁴⁶ Kuntiakidi mafuta mansunga ga ntu munu ku, kansi yani tiamunueni mafuta ga malu mamu. ⁴⁷ Mudina yikuteledi, masumu mani mambidi mayambuluedi, kadi songedi zola kumbidi. kansi yuna bayambudilanga bunduelu wusonganga luzolu lunduelu." ⁴⁸ Muntangu yina, Yesu tedi ku nkentu:" masumu maku mayambudulu." ⁴⁹ Bana bakala yani ga mesa bana bakitela nkutu:" Nani muntu yoyo ta yambudila masumu?" ⁵⁰ Kansi Yesu wuta ku nkentu:" lukuikulu luaku lukuguluesi, nda mu ngemba."