¹ Bantu bambidi bakigeni mu sonika mambu mana magangama ga kati kietu, ² Bonsu batusongila mawu bana bakala muluyantiku, mbangi zi mona mesu ye bawu basadilanga ngoyo. ³ Yidiadina, munudiaka, nzoledi sonika mambu masuku ku ngeyi, nsamu wusungama ku ngeyi Tewofidi wunzodi. ⁴ Nzoledi wuzaya kikilu malongi ma wulonguka. ⁵ Muntangu Elode kakala ntinu mu Yuda, nganga mosi babokeledingi Zakaliya, wukala mu kanda di nganga Abia. nkentu' andi wukala mu nkuna Aloni, nkumbu luzabutu. ⁶ Babodi bakala basungama ga ntuala Nzambi, batumameningi ziku ziku nsiku miakulu ye ntumunu zi Mfumu. ⁷ Kansi muana nkatu, mudiambu nuzabutu kisita, ye babodi mimvu migaluka. ⁸ Kilumbu kimosi Zakaliya mu kisalu kiandi ki nganga Nzambi, yina nkumbu buka kiani mukusadila yawu. ⁹ Landila fu kinganga, wadi dinsola mu yoka ndumbu mu kilongo ki Mfumu. ¹⁰ Lukutakanu luakulu lu nkangu lusambidingi ku nseki muntangu yoka ndumbu. ¹¹ Mbasi Nzambi yimonikina, wutelama ku lubakala lu mesa ma malongi ma ndumbu. ¹² Bukamona mbasi, Zakaliya wuvinzuka ye zakama bumbidi. ¹³ Kansi mbasi wuntela:( kukadi bunkuta ku, Zakaliya, kadi kisambu kiaku kiwisakeni. nkentu' aku luzabutu sikakubutila muana yakala ye si wumbokidila Yowani. ¹⁴ Si kakula nsamu kiese ye mayangi, ye bambidi si bakembila mu ngutuk' andi. ¹⁵ Kadi wuneni sikakala ga ntuala Mfumu, kasikanua malafu ku, kani malafu ma funusu. sikateba ye Mpefi Nlongo tuka mu kivumu ki ngudi. ¹⁶ Si kanatununa bana bambidi ba Isayeli ku Nzambi. ¹⁷ Si kadiatila kuntuala kunsi ntadidila Nzambi ye Mpefi ye lulendo lu Eliya, mu natununa ntima mi mase ku bana ye tuadisa minkolami mudiata buna Bonso nduka zibasungama, mpasi mu gangila ku Mfumu nkangu wunkubikulu.) ¹⁸ Zakaliya wugoga ku mbasi: ( bue sizayila bune? kadi ndunini ye nkentu munu talukidi mimvu.) ¹⁹ Mbasi yimvutudila:( munu Ngabidiela, yuna wutelamanga ga ntuala Nzambi. mfidusu mu kugogila ye zayisa wuna nsamu mboti. ²⁰ Mboti, si wukala baba, kulegoga diaka ku nate kilumbu kiokini mana si mamonika mudiambu nkuikididi ku n' gogu miamu mina si milungana mu ntanguani. ²¹ Nkangu wuvingidingi Zakaliya ye wuyitukidingi buna kani Nina mu kinlongo. ²² Bukatuka, kalenda diaka goga ku, ye ba bakusa nde wumonikina kimona mesu mu kinlongo. wubalabikisa mu bidimbu ye wukala baba. ²³ Ntangu salu kiandi kimana, wuvutuka ku nzo yani. ²⁴ Kunima ntangu nkentu yani luzabutu wuyaka. ngonda tanu ntangu kasuama, wukiteledingi: ²⁵ ( Tala mana kangangidi Mfumu; tubidi mesu mandi kumunu mu manisa makulu mangengingi nsoni ga ntuala bantu.) ²⁶ Mungonda sambanu yilukawu luandi, mbasi Ngabidieli wufidusu ku Nzambi ku mbanza Ngalili nkumbu Nazaleti. ²⁷ Ku muenza nkentu babokedingi Maliya. ²⁸ Mbasi yikota mu nzo yani ye ta: ( kala kiese, ku ngeyi Nzambi kagangidi nlemvo, Mfumu wuna yaku.) ²⁹ Mu n' gogo mina wutoma yituka ye kiyufula mana mazola goga lukayisu lo luani. ³⁰ Mbasi yintela:( kukadi bunkuta ko, Maliya, kadi muemueni nlemvu kuntuala Nzambi. ³¹ Tala si wuyaka ye buta muana yakala wuna nkumbu si yikala Yesu. ³² Sikakala wuneni ye sikabokulua muana mazulu ma zanguka. Mfumu Nzambi sikangana fikimfumu ki Davidi tat' andi. ³³ Sikayala dibundu diakulu mu nzo Yakobi ye kimfumu kiandi sikikala nsuka ko.) ³⁴ Maliya tedi ku mbasi:( bueyi mana si magangamana mudiambu kizeyi nteti yakala ko?) ³⁵ Mbasi yimvutulula:( Mpefi yi Nlongo siyikusila ye lulendu lu kimazulu silukufika mu tuti diani. mudiodiani muana si wubutuka sikakala wunlongo, sikabokulua muana Nzambi. ³⁶ Tala, luzabutu mpangi' aku, yandi diaka lukawu kena mu ndununu' andi ye yuna nkond' andi sambanu yi lukawu; yuna babokeledingi kisita. ³⁷ Kadi nkatu dikalendakana ko ku Nzambi.) ³⁸ Maliya wuta:( kisadi ki Mfumu ngina. makulu mandutila buna tedi!) ye mbasi yingaluka. ³⁹ Muntangu yina, Maliya munsualu wuyenda kiela ku mbanza mosi yi mongu wuna kunsi yi Yuda. ⁴⁰ Wukota mu nzo Zakaliya ye kayisa luzabutu. ⁴¹ Ntangu luzabutu kawa lukayisulu Maliya, muana wunikuka mu lukawu. luzabutu wutebusu ku Mpefi yi Nlongo. ⁴² Wuboka ye ta:( wusakumuna wuna ga kati ki bankentu ye mbutu lukawu luaku wusakumuna. ⁴³ Bue bunganukini nde ngudi mfumu' amu kesa ku munu? ⁴⁴ Mudiambu ntangu lukayisu luaku lubutidi zu mu makutu mamu, muana nikueni ye kiese mu lukawu luamu. ⁴⁵ Mayangi ku yuna kuikidi; kadi mana manteluka ku Mfumu si malungana!) ⁴⁶ Buna Maliya wuta:( moyu munu kembidila Mfumu, ⁴⁷ Ye mpefi munu yi yangalala mu Nzambi, Mvuluzi munu. ⁴⁸ Kadi wutudidi nlemvu ku kisadi kiani. ingeta, bungangi mbandu zakulu si bambokidila nkua mayangi. ⁴⁹ Kadi nkua lulendu n'gangidi mamemi, Nlongo nkumbu yani. ⁵⁰ Kiadi kiyani kizinganga mbandu ka mbandu ku bana ba banganga. ⁵¹ Wu yalumuna koku kuani ku ngolu ye muangasa bana bena ngindu zi kintumpidika. ⁵² Wukulumuna balulendo mu biti biawu bi kimfumu, ye wutombula banlemvu. ⁵³ Mimfue nsatu, wu bayukutisa ma mboti, wu basindika moku ma mpamba. ⁵⁴ Wusadisa Isayeli kisadi kiandi, ye mbakukila kiti kiandi mudiambu di batata beto. ⁵⁵ Bonso buna nsilu kaganga mu Abalayami ye ku nkuna yani ma bilumbu biakulu. ⁵⁶ Maliya wuzinga ye luzabutu ngonda tatu, kunima mana, wuvutuka ku nzo yani. ⁵⁷ Ntangu kafueti buta luzabutu yifuana, ye wubuta muana bakala. ⁵⁸ Mfinangani zandi ye bibuti bawa nde Mfumu gangidi nlemvu yani wuneni ku yani; ye bayangalala ye yandi. ⁵⁹ Mbosi mu kilumbu kinana, bayisi kotisa muana longu. bazola bangana nkumbu tat' andi Zakaliya. ⁶⁰ Kansi ngudi yani wuta:( nkatu, si kabokulua Yowani.) ⁶¹ Bantela:( ga nkatu muntu ga kati bibuti biaku wuna ye nkumbu yina.) ⁶² Balabikisa tata yani muzaya bue kazola mbokidila. ⁶³ Wulomba dibaya ye sonika n' gogu miomini:( nkumbu yani Yowani.) bakulu bayituka. ⁶⁴ Muntangu nua yani wukutuka ye lulaka luandi luzibuka. wu goga, sakumuna Nzambi. ⁶⁵ Buna bakulu bana bazingidingi mu mvivi zawu bazakama mu bunkuta bubabuila ye mu buisa ndambu yakulu wu monti wu Wuda bagogelengi nsamu wuna. ⁶⁶ Bakulu bawa basonika mawu mubaya diawu di mbundu ye bata:( nani sikakala muana yani?) koku ku Mfumu kukala yani. ⁶⁷ Zakaliya tata yani wuzala Mpefi Nlongo, wulonga ye ta: ⁶⁸ ( kasakumuna Mfumu, Nzambi Isayeli, kadi wukedi nkangu yani ye lungisa lugulusu luyani. ⁶⁹ Wutuvumbuluedi ngolu zi mpulusu mu lubutu lu Davidi, kisadi kiandi. ⁷⁰ Momuini kazayisa mu nua mimbikudi miandi mi Nlongo nkumbu zinkaka. ⁷¹ Lugulusu lutukangulanga ku mbeni zetu ye moku mabana batumenganga. ⁷² Wusonga kiadi kiandi ku mase metu ye bambukila luwawanu luandi lu nlongu. ⁷³ Bonso ndefi kadia ku Abalayami tata betu, sikatugana, ⁷⁴ Kunima katuyusidi mu moku ma bambeni, mu lulendo lukonda bunkuta lukunsambidila. ⁷⁵ Mu kinlongo ye nzengolo mu ntalulu yani, mu zingu kietu kiakulu. ⁷⁶ Nge, muana munu, si batubokidila mbikudi wu mazulu kadi si wudiatila ga ntuala Mfumu mu kubika ngisulu yani. ⁷⁷ Ye gana ku nkangu yani nzayilu yi lugulusu mu luloluku lu masumu. ⁷⁸ Nzambi betu si katuloluka mu kiadi kiani kingi.buna kiadi kiokini, si kisa, bonso ntangu yita tubuka, mu lezima ku betu mu zulu. ⁷⁹ Si kakienzula bakulu bena mu tombi ye kiosi kilufua, mpasi mutuadisa ntambi zetu mu nzila ngemba. ⁸⁰ Buna ku muana, wu kudidingi ye kuma ngolu mu Mpefi, wuzingidingi munsi nkatu nati kilumbu kiokini kayantika kisonga ku nkangu Isayeli.