7 ¹ Iyani Melesideki, ntinu mu Salemi, Nganga wu Nzambi wu Mazulu mazangama, yani wukutana ye Abalayama mu mvutuka yiyani ye wunsakumuna, ku nima nde Yoyuani wunzenga laka di mintinu. ² Abalayama wungana buku ki kumi mu bina biakulu yani bikakanga. nkumbu yani<< Melesideki>> mpangudulu<< ntinu wu lunungu>> ye diaka << ntinu wu Salemi>>, dio dizoledi goga<< ntinu wu ngemba>> ³ Yani kakala ye se ku, ye ngudi ku, ka nkulu mpi ku, konda ku luyantiku lu bilumbu, kani nsuka luzingu. kansi wuzinga nganga mu bilumbu biakulu, bonsu muana Nzambi. ⁴ Bungangi, talubula bue kakadila wuneni yo muntu. nkulu betu Abalayama wungana ndambu yi kumi mubima bimboti bina yani kabaka muntangu nkindu binuani. ⁵ Ye yibuna nlesi wu levi yo yibaka kinganga Nzambi bonsu minsiku mu golanga buku ku nkangu, dizoledi ta ku zimpangi zibawu bana ba Isayeli, kata buna bumboti kuani bawu diaka bena nlesi wu Abalayama. ⁶ Kansi Melesideki, katala mu nlesi di levi ku, wutambula bibuku bi kumi bi Abalayama, ye wu sakumuna, yani yo wuvua kala ye nsilulu. ⁷ Ka kuna ku mvutudulu yifueni nde muntu wukuluka kakala wusakumuka ku muntu wu zanguka. ⁸ Mu dio diambu, bantu bafuana batambulanga buku bi kumi, kansi kuna, yuna bakidi buku ki kumi ka feti tontua mu kala wu zinga. ⁹ Bunkaka bulendedi tesuka, Levi wubakidingi bibuku bikumi, wufuta bio diaka ku Abalayama. ¹⁰ Kadi Levi wukala mu kivumu ki nkulu yani Abalayama muntangu Melesideki kakutana yani. ¹¹ Bungangi, go ndungunu yikala yifuana mu landila kinganga Nzambi ki ba Nlevita( kadi ku nsi yani nkangu wutambula nsiku), bukala diaka mfunu go tuka diaka yumosi nganga bonsu landila yi Aloni? ¹² Kadi ntangu basobanga kinganga Nzambi, nsiku wufueti kala diaka wu sobuka. ¹³ Kansi ku yuna mo makulu mambu mawu matesokedi vuisukidi ku kanda dimosi dinkaka, mu kani wumosi muntu kagangi nteti ku salu ki mesa. ¹⁴ Bungangi, diawu dina dikudika nde mfumu betu wuna wumosi mu nlesi di Yuda, kanda dimosi dio Mose kasonika nkutu ku mutadila nganga zi Nzambi. ¹⁵ Anga matutu go mena makia kibeni, go nganga wunkaka telameni mu kifuani ki Melesisedeki. ¹⁶ Yo nganga yimpa kena ku yuna yu wufueti kuma nganga bonsu nsiku wu nlesi wu bantu, kansi mu nsilulu lulendu lu luzingu lumosi lubebedi. ¹⁷ Kadi sonu kita kuntela kiawu kimbangi:<< nge wuna nganga bilumbu biakulu bonsu ndandani yi Melesisedeki.>> ¹⁸ Kadi ntumunu yi nkulu yituluka ga mbela kadi yawu yikala yilebakana ye yikonda mfunu. ¹⁹ Kadi nsiku ka baka nkutu kima ku kalungisa, kansi mu bunkaka, gawu go gena nsilu yi vuvu yimboti mu mamakuisa mu mawu betu tupusananga ku Nzambi ²⁰ Yo nsilulu yimboti ka yibakama ku konda ku ndefi. mu mankaka bankaka bawu bakuma banganga kanda ku ndefi. ²¹ Kansi mu landila mawu, Yesu; yani wukuma nganga ye ndefi yigangama ku yuna yu wunteledi:<< Mfumu wuzengedi ndefi ye kalendi ku vilula madiela ku:<< wuna nganga mu lumbu biakulu.>> ²² Mudiodio, Yesu wukuma mvangikisi wu luwawanu lumboti. ²³ Munsalulu kansi, lufua lukakididingi banganga musalu mu bilumbu biakulu, yidina, gena banganga bambidi, wumosi ku nima wunkaka. ²⁴ Kansi kadi Yesu wuzinganga mu bilumbu biakulu, kinganga Nzambi kiyani kina kakilendi sobuka ku. ²⁵ Mukikuma kina, yani wuna wufuana mu gulusa bulungidi bawu bapusananga ku Nzambi mu yani kadi wuzinganga bilumbu biakulu mudila mvutu mu bawu. ²⁶ Dina dizimbuka ku betu mu baka yumosi bonsu buna ngudi nganga. yu wuna kondedi masumu, konda tona, wukedika, wugambuka ye bankua mi masumu ye yani wukuma wu neni beni kani nkutu mazulu. ²⁷ Busobedi ku bangudi zinganga. ka kena nkutu ye mfunu ku, mutambika konsu kilumbu minkayilu, nteti mudiambu di masumu mayani kikilu, ye landila mudiambu di nkangu. wuganga nkumbu mosi mu makulu mu kukikaya yani kibeni. ²⁸ Mudiambu diodio, nsiku wubiekanga ngudi zinganga ba bantu bavuidi lebakana, kansi n'gogu wundefi yu wutukidingi mu nsiku, wubieka muana wumosi, yuna wu gangama wulunga mu mvu ye mvu.