¹ Luzimpangi, go muntu bakameni mudiambu dimbi, benu luna ye Mpevi yi Nzambi lunsungika mu nzila yimboti, lugangila buawu mu nlembami. ye nge kibeni toma kukikenga mpasi nde kaba ku ntonti ku. ² Lusalasana mu mambu menu kadi mu nzila yoyo benu si lutumamana minsiku mi Klisto. ³ Kadi go muntu wuta kukibanzila nde yani wuna wuneni kansi kena boku buna yani wukukigunanga. ⁴ Bika muntu muntu kafiongunina nkadulu yi yani kibeni nde yani lenda yo muena kiesi buna kamuena bo muyani kibeni kansi ka bukafuanikisanga yo ye bankaka ku. ⁵ Kadi konsu muntu wuna nata zitu kiyani kibeni. ⁶ Muntu balonganga masonukua ma Nzambi bika kakabula bima biyani bimboti bikavuidi ye yani wukunlonganga. ⁷ Ka lugunukani ku: Nzambi ka bakunsakanananga ku. kionsu kima muntu kikakunini yikina sikayonsika mpi. ⁸ Go muntu wukunanga bina biyangidikanga mabanza mambi ma kimuntu, buna mu mawu yani wuna yonsika mfuilu yi kimpevi ye lufua; kansi go yani wukunangabiobio biyangidikanga Mpevi yi Nlongu buna mu yawu yani wuna yonsika moyu wulembua sukanga. ⁹ Katulembimu ganga mamboti ku, kadi go katuna lemba ku, betu tuna yonsika ntangu busiyifuana. ¹⁰ Idiawu butubakidi dio mpuasika, tuganga mamboti ku bantu bakulu, ye sungula ku zimpangi zibetu zituna minu kimosi. ¹¹ Bungangi munu yikulusonekeni mu koku ku munu kibeni, bonsu buluta bomuena mu sonu bimunu bineni! ¹² Bantu bobo batontuanga mu zengua, bawu bazolanga mu monika ye kukiyana mu momo mamonikanga. bawu baganganga bo kaka mpasi nde kabalendi kulua mu diambu di bubalonganga mfunu yi lufua lu Klisto ga kulunsi. ¹³ Kadi bawu kibeni bazenguanga ka batumamananga minsiku miakulu ku, kansi bawu bazoledi kaka nde benu lusengua mpasi nde bakukiyana bu balendedi mu kulukuikila dimbu kiokio munitu zibenu. ¹⁴ Mu makuntadidi, munu nzoledi kaka kukiyana mudiambu di kulunsi di Mfumu betu Yesu Klisto, kadi mu kulunsi di Klisto, makulu manza yayi mena mafua ku munu ye munu mpi yimonikanga wufua ku mawu. ¹⁵ Kadi zengua ata lembua zengua ka yidiambu dilutidi mfunu ku kansi diambu dilutidi mfunu yimukala mpangulu yimpa,muntu wusoba ye wudisuasuani. ¹⁶ Ku bakulu balandanga nsiku wuwu mu luzingu lubawu,bika luvuvamu ye nkenda bikalaku bawu ye ku nkangu wakulu wu Nzambi. ¹⁷ Mumanisa,muntu ka kukuamisa diaka ku, kadi bifu bi zimputa bina yemunu munitu bisonganga nde munu ngina nanga wu Yesu. ¹⁸ Luzimpangi zimunu, bika nlemvu wu Mfumu betu Yesu Klisto wukala ye benu bakulu, Amen!