¹ Benu bulufuluka ye Klisito, lusosa bima bi muzulu, kuna kuvuandanga Klisito ga lubakala lu Nzambi. ² Lukadila mayindu mu bima bina mu zulu kansi kabi ga ntotu ku. ³ Kadi benu lumana fua ye moyu wuna wusuekua ye Klisito mu Nzambi. ⁴ Luzingu luenu lunkatika kedika yi Klisito ye yani bu sika monika, buna benu mpi silumonika ye yani mu nkembu wuyani wowo. ⁵ Buna bungangi lugonda nkadulu yibenu yi kinza: mayanga, zinzinunu zimbi, ye mbuimi( kadi biawu yi mpila nsambudulu yi biteki.) ⁶ Imudiambu di mambi mampila yina nganzi zi Nzambi zibuilanga ga bantu bobo bakunkolamananga. ⁷ Muntangu yiluta, ibuna mpi benu ludiatila moyu benu bu wuyalua ku masumu momo. ⁸ Kansi bungangi, lulosa mana makulu : ngasi , zinkesi, nsoki, zintiakulu ye mpovolo zinsoni zitukanga mu minua mibenu. ⁹ Kalukikosi ku benu ye benu kadi luyambula nkadulu yibenu yinkulu ye mavanga mayani. ¹⁰ Ye benu luvuata nkadulu yimona yoyo yimuntu wumona wutatamananga kituka wumpa bonsu buna kifuani ki Nzambi wukun'ganga, mpasi nde kakuma ku nzayilu yilunga yimboti. ¹¹ Buna bungangi kakuna diaka Bayudayo ye Bayudayo ku,Baskite ku, minanga ata bantu bakimbuanza ku, kansi Klisito wuna mu makulu ye yani wuna mu bakulu. ¹² Ibuna, benu luvuidi ku Nzambi yani wukulusola ye wukulusola mu kala bantu bayani. buna benu lufeti kala ye ntima wufuluka ku nkenda, ye luzolu ye ntima wulembama, ye mvibudulu. ¹³ Luvibasana, lusilasana nlemvu, konsu ntangu go wumosi mu menu bu kabeki mpangi diambu, bonsu Mfumu kakululemvukila,benu mpi lufeti lemvukila bankaka. ¹⁴ Ye ga zulu mana makulu, lukudikila zola ikuawu kukanganga bima biakulu ga kimosi bonsu kima kimosi kimfunu. ¹⁵ Bika luvuvamu lu Klisito lu tuadisa mintima mibenu, kadi imu luvuvamu lolu Nzambi kakulubokila ga kimosi mukala nitu yimosi. luvutula matondu. ¹⁶ Bika mambu ma klisito ye kimvuama ki mawu kiakulu kikala mu benu. luyimbila minkunga, minkunga mi nzitusu wu Nzambi, ye minkunga minlongu; luyimbila ku Nzambi mu matondu mu ntima mibenu mimvimba. ¹⁷ Mu mambu makulu maluganganga ata malugoganga, lusala mawu mu nkumbu yi Mfumu Yesu, ye mu yani lutondanga ku Nzambi, i se. ¹⁸ Lu bakentu lulemvuka ku babakala ba benu kibeni bonsu bufuaneni gangu mu Mfumu. ¹⁹ Lu babakala luzola bakentu ba benu kibeni, ye ka lubamuenani mfiti ku. ²⁰ Lu bana lutumamana mu makulu ku mase ye zingudi zibenu kadi ibuna Mfumu kazolanga. ²¹ Lu mase ka lufuemisandi bana babenu ku mpasi nde ka bakadi balebakana ku. ²² Lu bisadi lutumama mu makulu ku zimfumu zibenu zi mu nza, ka buluna ga ntadisi yibawu kaka ku mudiambu di kubayangidika, kansi lutumama mu ntima wukedika mudiambu di vumi kiluna mu Mfumu. ²³ Konsu kisalu kilusalanga lusala kiawu mu ntima benu wakulu bonsu nde benu luta sadila Mfumu kansi ka bantu kaka ku. ²⁴ Luzaya nde Mfumu wuna kulusenda; benu luna tambula bina bikasila ku bantu bayani. ²⁵ kadi Mfumu yikedika yilusadilanga i Klisito. Kadi wonsu wuganganga mambi wuna tambula bina bifueni mu mambi makaganganga, kadi Nzambi katalanga luse lu muntu ku.