¹ Pawulu, ntumua gu Klisito Yesu mu luzolu lu Nzambi, ye Timote mpangi betu. ² Kuba kuikidi ye kuba mpangi mu Klisito bena ku Kolosayi. bika lemfu wukala mu benu ye yengi ki Nzambi se dibetu. ³ Tuta tonda Nzambi, se di Mfumu betu Yesu Klisito, ye tuta sambila tangu zakulu mudiambu dibenu. ⁴ Tuwa muntangu ba gogedingi mudiambu diminu kibenu mu Klisito Yesu, ye mu zola kuna yenu ku bantu bankulu bana batulua mu kingenga mudiambu di Nzambi. ⁵ Luna ye zola koko mudiambu di kivuvu kina kilundama mubenu ku zulu. luwa nteti nteti bubawogedingi mu vuvu kiokio mu n'gogu wukedika, nsamu wu mboti. ⁶ Wuyisa kubenu. nsamu wowo, wuna ye mimbutu mita muangana mu nza. yuta sala diaka kubenu, tuka muna kilumbu kina luwa wawu ye lubasika wawu mu siama matadidi nlemfu Nzambi yu kedika. ⁷ Insamu wu mboti bonsu lununguka wawu ku Epafala, nsadi betu yukintuadi yuntondama wuna kisielu kikuikama mu Klisito mudiambu dibetu. ⁸ Epafala wuta zayisa muzola kuna Mpevi. ⁹ Idiambu zola koko, tuka kilumbu kina tuwa momo, katuyambulanga sambila ku mubenu. tulombanga tangu zakulu nde lukala bafuluka mu nzayilu yiluzolu luyani mu nduenga zakulu ye mbakusulu yiki Mpevi. ¹⁰ Tuta tatamana mu sambila nde ludiatila bonsu bufueni buna mboti mu Mfumu bonsu bulutidi. tuta tatamana mu sambila nde lubuta mbutu mu konsu mavanga mamboti, ye nde luyela mu nzayilu Nzambi. ¹¹ Tuta sambila nde lukala ba nsiama mu makulu, bonsu buna lulendu lu nkembu yani mu lukuikilu luakulu ye mvibudulu. ¹² Tuta sambila nde lutondanga Nzambi mu kiesi kiwulugana kikesa mukukala ndambu mu mvuilu yiba kuikilanga mu ntemu. ¹³ Wutu kula, mulendu kitombi ye wutufila muki mfumu ki muana yani wutondama. ¹⁴ Mu muana yani tuna nkudulu ye ngiambudulu masumu. ¹⁵ Muana ye kifuani kimonika mu Nzambi wuka wumonika ku.wuna wunteti wubutuka mu ngiantukulu yi makulu. ¹⁶ Kadi muyani, bima biakulu bisalama bina mu mazulu ye bina ga ntotu, bima bimonikanga ye bima ka bimonika ku. kikala biandu bikintinu, bimfumu, luyalu, ata lulendu, bima biakulu bisalama kuyani ye muyani. ¹⁷ Wukala kuntuala bima biakulu ye bima biakulu bizingilanga muyani. ¹⁸ Ye wuna ntu yinitu, yi dibundu. wuna luyantikulu ye wunteti wubutuka mu kati kiba fua: vuidi kifulu kinteti muna kati kibima biakulu. ¹⁹ Kadi bukala bumboti ku Nzambi nde kimfumu kiyani kiakulu kikala muyani. ²⁰ Ye vutula nguisani yibima biakulu ye yani kibeni mu muana. Nzambi wuvutula yengi mu menga gana kulunsi diyani Nzambi wuvutula nguisani yibima biakulu ye yani kibeni, kikala bina ga ntotu ata bima bina muna zulu. ²¹ Ye nge diaka, mu ntangu mosi, lukala banzenza ku Nzambi ye lukala bambeni bani mu mayindu ye mu mavanga mambi. ²² Kansi butusidi, wutu tambula mu mfuilu yani mu nitu yani yikimuntu. wusala mawu, mpasi nde katusonga ba nlongu, kondua lusembu, ye kondua bela ga ntuala yani. ²³ Go luta zingila mu minu, lusikalala ye lukangama ye kondua vutuka manima mu kivuvu kingolu kinsamu wumboti wuna luwa. iwuna nsamu wumboti bazayisa ku bantu bankulu ba butuka kunsi yi ntangu. ²⁴ Bungangi ngita yangalala muzimpa zimunu mubenu ye ngita fuanikisa munitu munu mana makondolu mu mpasi zi Klisito. muzola kunitu yani wuna dibundu. ²⁵ Ye mudibundu diodio nginina kisielu, bonsu kiyeka ki Nzambi kika gana mudiambu di benu, mulungisa nsamu Nzambi. ²⁶ Yi n'gogu kedika kilundama kikala kisuama tuka muna tangu zina ye zimbandu kansi butusidi, kina kizayakana kubawu ba kuikilanga mu yani. ²⁷ Ikubawu Nzambi kazola songila biki mvuama ki nkembu ye makedika kisuasana ga kati ki mimpani nde Klisto wuna mubenu, kivuvu ki nkembu wukuisa. ²⁸ Iyani tusamunanga, tuta siamisa ye kulonga bantu bankulu mu nduenga zakulu, mpasi nde musonga kubantu bakulu bafuana mu Klisito. ²⁹ Mudiambu dina yi salanga, ye kunuananga mu ngolu zani zisalanga mungolu ku munu.