¹ Bungangi, ngita lubambula mbundu, bampangi, nsamu wu mboti yi lusamunina, nde wulutambula ye mu wawu lutelameni. ² Yi muna nsamu n'gogu nde lubakidi lugulusu, go lulendi kuikila mu mpamba. ³ Kadi yi lusampula muna mfunu wu kedika mana mayi tambula: I mu masumu metu nde Klisto kafuila bonsu butedi masonama. ⁴ Wuzikua, ye mu kilumbu kitatu, wu fuluka mu bafua bonsu butedi masonama. ⁵ Wu monika ku Kefa, bosi ku kumi ye zodi. ⁶ Wu monika diaka lutila ku nkama tanu zi bampangi mu ntangu mosi. Bakulu bana mpi bakini luzingu, kansi bankaka baledi tulu. ⁷ Buna wumonika ku Yakobi ye ku bantumua bakulu. ⁸ Ku nsuka, wumbonikina, bonsu nde ku muana wubutuka mu ntangu yi mbi. ⁹ Kadi munu ngina wunduelu mu bantumua. Kifueni ku bambokila ntumua, mu diambu yi kuamisa dibundu di Nzambi. ¹⁰ Kansi muna nlemfu wu Nzambi, ngina bonsu bungina ye nlemfu yani kumunu kawukala wunkatu ku. Mu kedika, yisala mungolu lutila bakulu. Ka munu ku, kansi nlemfu wu Nzambi wuna mu munu. ¹¹ I buna, kani dikala nde munu kani go bau, tala matuta longa ye ma lukuikila. ¹² Bungangi go Klisto wuteluanga bonsu wufutumuka mu bafua nkumbu yi mosi, bue bantu bankaka ga kati ki benu balendi goga nde ka kuna lufutumuku mu bafua ku? ¹³ Kansi go lufutumuku mu bafua kaluna ku, buna go Klisto mpi ka futumuka ku. ¹⁴ Go Klisto ka futumuka ku, malongi metu mampamba ye kiminu kienu kimpamba. ¹⁵ Ye betu tu monekeni nde tu mbangi zi luvunu ku Nzambi, mu diambu dina tuta kimbangi ki luvunu, kita nde wufulukisa Klisto, kansi ka ganga bo ku. ¹⁶ Kadi go bafua ka ba futumuka ku, kani Klisto mpi ka futumuka ku. ¹⁷ Go Klisto ka futumuka ku, minu kibetu ki mpamba ye lukinu diaka muna masumu mabenu. ¹⁸ Buna bo bafua muna Klisto bawu mpi ba vididi. ¹⁹ Go kaka nde muna luzingu lo tusilanga kivuvu muna Klisto, mu bantu bakulu, si tukala bantu ba kiadi. ²⁰ Bungangi, Klisto wufutumuka mu bafua, wunteti mu bawu. ²¹ Kadi, go lufua luyisa muna muntu, imuna muntu mpi lufutumuku luyisa. ²² Kadi, bonsu mu Adami bakulu tufuanga, mpila mosi mu Klisto, bakulu situ kala moyu. ²³ Kansi konsu muntu muna menga mayani mosi: Klisto yunteti, ye landila bo bena mu Klisto si ba kala moyu mu mvutuka Mfumu. ²⁴ Buna, si bukala nsuka, bu sekesi vutula Klisto kimfumu ku Nzambi Tata yani. Diodio bu sika kunguna nsinsa wakulu, kimfumu ye lulendu. ²⁵ Kadi si ka yala yi kuna si ka tudila mintantu ku nsi bitambi biyani. ²⁶ Ntantu wunteti si wufuasuka ye lufua. ²⁷ Kadi "wutula biakulu ku nsi bitambi biyani". Kansi ba ka goga nde biakulu bin'ganukina luve, dina dikedika nde yu un'gana biakulu kena wufua ku. ²⁸ Ye bu sikikala nde bima biakulu sa bin'ganukina luve, buna muana yani kibeni si ka baka luve ku yani wun'gana biakulu. Dina sidikuma mpasi nde Nzambi ka kala makulu mu biakulu. ²⁹ Mampila nkaka, nki si kikuma ku bawu bata ki botikisa mu bafua? ³⁰ Ye mu diambu dinki, tunina ntangu zakulu mu kiwonsa? ³¹ Bampangi, benu lunina kiesi kibetu mu Yesu Mfumu betu, ngita dio goga: yi fuanga konsu kilumbu. ³² Nki nsendu wumunu wutadila kimuntu, go yi nuana ye bibulu kuna Efeso, go bafua kaba futumuka ku? " Tudia ye tunua, kadi si tufua". ³³ Ka tukiguni ku: " Bakundi bambi bafuasanga bifu bimboti. ³⁴ " Tukala ba lembama! Tu zinga muna nsungama! Ka tu tatamana mu ku zola masumu ku. Kadi bankaka ga kati kibenu ka bazeyi Nzambi ku. Ngogedi bo mu kulu muesa nsoni. ³⁵ Kansi muntu mosi gogedi : "Bafua bue si ba futumukina? Mu nki nitu si ba vutukila? ³⁶ Benu ka luzeyi ku! Konsu kima ki kunini ka kilendi tukisa ntombu ku go ka kifuidi ku. ³⁷ Konsu ki kunini, ka nitu yi fueti mena ku kansi si kikala nkeni yi bule go mpi konsu nkeni. ³⁸ Buna Nzambi si ka ngana nitu yo ka zoledi kuani, ye mu konsu kanda, si ka gana nitu yi fuanakana. ³⁹ Nsuni wakulu, kawuna bumosi ku, kansi mpila nkaka nsuni wu muntu ye mpila nkaka nsuni wu bibulu, wu nkaka wu zinuni ye wu nkaka mu mbisi zi masa. ⁴⁰ Kuna mpi ye nitu zi kizulu ye nitu zi ki ntotu. Kansi ntemu wunkaka mu nitu zi ki zulu ye wunkaka nitu zi kintotu. ⁴¹ Kuna mpi ntemu wuntangu, ye wungonda, ye wu nkaka mu ntetembua; ye ntetembua yimosi yina disuasana ye ntemu wunkaka. ⁴² Buna dina bumosi muna mfutumuka yi bafua. Bina bikunama bifua, ye bisa bi futumuka mu kufua. ⁴³ Yikunama muna mvuezolu ye sa yi futumuka yi nzitusu, yi kunama muna nyololo ye si yifutumuka muna ngolu. ⁴⁴ Yikunama nitu yi kimuntu, si yifutumuka yi kimpefi. Gu kuna nitu yi kimuntu, kuna mpi nitu yi kimpefi. ⁴⁵ Ibuna disonama : " Muntu wunteti, Adamo, wukituka wu moyu". Muntu wu nsuka Adamo wukituka Mpefi yi moyu. ⁴⁶ Kansi yi yina yi kimpefi ka yina yi nteti ku, kansi yo yina yi kimpefi yisidi kunima. ⁴⁷ Muntu wunteti wutuka muna ntotu, wuna ntotu,yu wunzodi muntu wuku zulu. ⁴⁸ Bana buna yu wutuka mu ntotu, buna mpi budina bawu batuka ku zulu. ⁴⁹ Ye buabuna nde ntotu, buna mpi budina bawu batuka ku zulu. Ye buabuna nde betu tutanata kifuani ki ntotu, si tunata mpi kifuani ki zulu. ⁵⁰ Ma ngogedi, mpangi nde nsuni ye menga ka bilendi baka difua di kimfumu ki Nzambi ye ki nsuekila mpi kondua ku ki nsuekila. ⁵¹ Tala, yiluzayisa mpimpita: si katufua betu kulu ku, kansi betu kulu si tu soba. ⁵² Mu fi ntangu finduelu, mu mbueta mesu, muna tulumbeta di nsuka. Tulumbeta si dibula, ye bafua si ba futumuka kondua ku kiketa, ye yo yifua yi vuata nsumuka. ⁵³ Kadi difueni nde nitu yina kiketa yi vuata konda ku kiketa, ye yo yifua yi vuata nsumuka. ⁵⁴ Kansi go nitu yi kondua kufua si yi vuata kondua ku kufua, yakulu yifua yi vuata kondua ku fua, buna si bulungana ngogo wusonama nde : " Lufua luminukini ku ndungunu." ⁵⁵ " Lufua ndungunu aku kue yina? Lufua nsendi zaku kue zina?" ⁵⁶ Nsendi zi lufua, i masumu, ye ngolu zi masumu yinsiku. ⁵⁷ Kansi nlemfu wu ganuka ku Nzambi, wutu gana ndungunu muna Mfumu beto Yesu Klisto. ⁵⁸ Ibuna, ba mpangi batondama, lusiama, ka lunikuka ku, lusala mu mamboti muna kisalu ki Mfumu, luzaya nde kisalu kibenu si ka kikala ki mpamba ku muna Mfumu.