¹ Lumbu kiantete kia lumingu, ayenda ku nduamu munsuika wangolo, anata mafuta mansunga momo makubika. ² Awana vo tadi diakindumunua va ntuala ndiamu. ³ Kina vo akota, ka amona nitu a Mfumu Yisu ko. ⁴ Diayiza vo kabazayako nki bafueti vanga mudiambu diodio ye mukintulumukina, mayakala molo batelamene va ndambu awu mu yinkutu ya lezima. ⁵ Kina vo akento amona wonga, akulula zidi yawu va n'toto, kansi bakubatela:" Mu diambu dia nki lutasosela wamoyo mu ba fua? ⁶ Kena diaka vava ko, kansi yani wafulukidi. Lubambuka moyo mumpila kalutela, kiokio kakala ntete ku ngalili, ⁷ ye wavovelenge:" Muana Muntu kafueti giekolua va moko ma ankuamasumu, kafueti komua, ye kafuluka mu lumbu kia n'tatu." ⁸ Bakento ba bambuka moyo mu mpova zozo, ye bavutuka basisa ndiamu. ⁹ Bayenda muangasa mambu ma wonsono kua kumi ye zole ye bantu ban'kaka. ¹⁰ Bobo bavovelenge mambu momo kua minlongoki bakala Maliya wa Magadala, Zuani, Maliya ngudi a Yakobi, ye bakento ban'kaka bakala yawu. ¹¹ Kansi nsangu zozo za zola kuma kua minlongoki kondua kua ngindu, ye kabakuikila bakentoko. ¹² Kansi Petelo telamene, ye lemokene ku ndiamu. Wakuluka ye watala, wamona yanikibeni binkutu bia meme bilezimanga. Petelo wayenda kua yani, wakiyuvula mu mambu momo maluaka. ¹³ Ye tala, mulumbu kiokio kaka, a wole vakati kuawu bayelenge kuvata dibokodoluanga Emmawusi, diakala kuanda ye Yelusalemi dia makumasambanu ma stadia. ¹⁴ Ayambidingi yawu ye yawu mu mawonsono maluta. ¹⁵ Vakala vo kiokio banuanisingi mabanza ye guivazana biuvu, Yisu yani mosi wafinama ye wadiata nzila ntuadi ye yawu. ¹⁶ Kansi meso mawu makala makangua mukun'zaya. ¹⁷ Yisu wakubatela: Nkia mambu luta vovela beno babole mundiatulu eno?" Batelama vana mukiadi kiangolo. ¹⁸ Wumosi, wabokodolua Kleopasi, wavutula kua yani:" Ngeye mosi wuna, ndondo wuta kuenda ku Yelusalemi kondua kuazaya mambu mezidi mulumbu kiki?" ¹⁹ " Nkia mambu?" Yisu kabayuvula. Ye bavutula kua yani:" Mambu matadidi Yisu muisi Nazaleti, wakala mbikudi wa lendo musalu ye mu mpova vantadisi a Nzambi ye vantadisi ya n'kangu wa wonsono, ²⁰ ye bonso bueyi ngudi zanganga ye min'tuadisi mieto ban'giekola mukunzengela tumbu kia lufua ye ban'koma. ²¹ Tuna ye vuvu vo sikiakala yani wukulanga Isaeli. Inga, ye kundambu ya mawonsono mama, ye wuwu lumbu kian'tatu tuka mambu momo mawonsono ma viokela. ²² Kansi diaka akento an'kaka vakati kua beto, atusivikisa kibeni, ayenda munsiuka miangolo ku ndiamu. ²³ Kiokio kabamona nitu ani ko, ezivova vo zimbasi zikuba vayikidi ye ku atela nsangu vo wuna moyo. ²⁴ Antu an'kaka akalayeto ayenda ku ndiamu, ye awana mambu bonso akento akubatela. Kansi yani, kabam'mona ko." ²⁵ Idina Yisu wuku atelele:" O antu akondua ngangu ye wowo ntima mia mpasi mukuikila mawonsono metavovo mim'bikudi! ²⁶ Kadina dia mfunu ko vo Klisto kamona mpasi za mambu momo, ye wakota mu n'kembo ani?" ²⁷ Ye, tuka Mose ye kua mimbikudi mia wonsono, wayantika ku asasila mu masonukua momo makubatadidi. ²⁸ Kiokio aluaka va mbela vata diodio ayelenge, azola benda kua nda kibeni. ²⁹ Kansi ban'kuamisingi munsualu, avova:" Kala ye yeto, kadi mpimpa yi finamene ye lumbu kikumini ku n'suka." Ye wakota, mukala ye yawu. ³⁰ Kiokio akala va meza ye yawu, wabaka dimpa ye kiokio kamanisa vutula matondo, wabukuna dio, ye waku bavana dio. ³¹ Ye meso mawu mazibuka ye ban'zaya, kansi wavila va ntadisi awu. ³² Ye avova yawu ye yawu:" N'tima mieto kamita vanga mpasi ko mukati kuayeto kiokio katu vovesenge munzila ye kutu sasila masonokua?" ³³ Atelama vanafulu muntangu yoyo, avutuka ku Yelusalemi, ye amona kumi ye mosi, ye bobo bakala kintuadi ye yawu, ³⁴ Avova:" Mfumu fulukidi kibeni ye monekene kua Simoni." ³⁵ Ye atelenge nsangu za mambu momo makuba luakila munzila, ye bueyi Yisu kakubasongela muntangu yoyo kabukuna dimpa. ³⁶ Kina vo avovelenge mambu momo, Yisu yani mosi wukisongele vakati kia yawu, ye waku atelele:" Luvuvamu luakala ye yeno!" ³⁷ Kansi kina vo akala ye kinkenda ye azala ye wonga, ayinda vo amona mpeve za mbi. ³⁸ Yisu wukuatelele:" Mudiambu dia nki luzengomokenene, ye mudiambudia nki buivu bita tomboka mun'tima mieno? ³⁹ Lutala moko mamu ye malu, diambote. Lunsimba ye lutala. Mpeve kayina kani ye nsuni ko ye visi, mpila luta kumbuena." ⁴⁰ Ye kiokio kavova wuna, waku basongela moko mani ye malu. ⁴¹ Kiokio kabakala kuikikilanga mu mambu momo ko mukiese ye gitukua, Yisu wukuba telele:" Luna ye kima kia dia vava?" ⁴² Ban'natina mbizi ya kalangua. ⁴³ Yisu bakidi yo, ye didi vantadisi awu. ⁴⁴ Wakuba tela:" Yi momo yalutelelenge, kiokio yakala ye yeno, yakulutela vo nga mafueti lungana mambu mawonso masonama mu nsiku mia Mose, mu mimbikudi, ye mu minkunga." ⁴⁵ idina wabazibula mpeve, mpasi vo babakisa masonokua. ⁴⁶ Ye wabatela:"" Ena diasonama vo Klisto sikamona mpasi, ye sikafutumuka mubafua mulumbu kia ntatu. ⁴⁷ Ye mpasi vo mviludulu a madiela ye ngiambudulu a masumu ya longua munkumbu ani mu makanda mawonso, yantikila ku Yelusalemi. ⁴⁸ Luna mbangi za mambu momo. ⁴⁹ Ye tala, si ya fidisa kua yeno kiokio Se diamu kalusila. Kansi beno, lukala mu mbanza nate ye siluata lulendo lua muzula." ⁵⁰ Ye Yisu wa banata nate ye ku Betania. Wazangula moko, ye wa basakumuna. ⁵¹ Vayiza kiokio kaba sakumuningi, wabasisa ye wazangulua mu mazulu. ⁵² Kiokio bamanisa kunsika, bavutuka ku Yelusalemi mukiese kia wonso. ⁵³ Bakelenge ntangu zawonsono mukinlongo, kembela ye sakumuna Nzambi.