¹ Bantu bayingi bakivana mu sokeka mu ndandani ya ntangu ya mambu masalama vakati kueto. ² Landila momo tuatambikisua kua bobo bakala mbangi za mona meso tuka kuna ngiatikilu ye bakuma bisadi bia mambu ma Nzambi. ³ Ikuma mono mpe yamona dio dia mbote mu toma yuvula tuka kuna ngiatikulu mpasi ya soneka nsangu za toma kubikua mukuma kiaku, Mbuta ya nene Teyofile. ⁴ Nzolele vo wazaya mu kieleka ndongolo zozo wabaka. ⁵ Mu ntangu Elode kakala n'tinu wa Yuda, vakala Nganga Nzambi yabokeleluanga Zakalia, wakala mu kimvuka kia zinganga za Abia. N'kento ani wakala yitu kia Aloni wakala ye nkumbu ya Elizabeti. ⁶ Bawu babole bakala bankua lunungu va meso manzambi, bakala zitisanga min'siku ye ntumunu zawonso za Mfumu bonso wufuene. ⁷ Kansi kebakala ye muana ko kadi Elizabeti wakala sita, bawu babole bakala bambuta beni mu tandu kina. ⁸ Lumbu kimosi Zakalia wakala salanga kisalu kiani van'tuala Nzambi, yakala ntangu yakimvuka kiani muvanga kio. ⁹ Landila fu kia kisalu kia kin'longi, mu nsololo ya Nganga nduna feti sala, wasolua mu wadi mukota mu nzo a Mfumu mu yoka bia mfuitisa (encens). ¹⁰ Lukutakanu lua wonso lua n'kangu luakala sambilanga va mbazi mu ntangu ya n'kayilu wa bia mfuitisa (encens). ¹¹ Mbasi ya Nzambi yammonikina , yatelama va lubakala lua zikua dia bia mfuitisa ( encens). ¹² Kiokio kamona Mbasi, zakalia wavizuka ye wamona wonga wayingi. ¹³ Kansi Mbasi yan'zayisa: " kumoni wonga ko, Zakalia, kadi sambu kiaku kiwakane. N'kento aku Elizabeti si kakuwutila muana wayakala ye si wam'vana nkumbu ya Yowani. ¹⁴ Si Kakala kua ngeye n'samu wa kiese ye wa mayangi, ye bayingi si bayangalala mu ngutukilu ani. ¹⁵ Kadi si kakala wanene van'tuala Mfumu, kalendi sala nua malavu ma ngolo, yevo bitatila ko. Si kakala wazalua kua mpeve tuka muna vumu kia ngudi ani. ¹⁶ Ye Ba Iseli bayingi si babangumuka kua Nzambi awu. ¹⁷ Si kadiata va n'tuala Nzambi, mu Mpeve ye lendo kia Elia, mu vutula n'tima wa Mase kua bana bawu ye tuadisa yimpumbulu mu diata bonso mu nduenga za bankua lunungu, mpasi mu vangila Mfumu n'kangu wuna kakubikilua." ¹⁸ Zakalia wavova kua Mbasi: " weyi nsinga dio zayile?" kadi ngina yanuna beni ye n'kento ame mpe wuna wanuna." ¹⁹ Mbasi wam'vutula: " Mono ngina yi Mbasi Babiliyeli, nduna telamanga va n'tuala Nzambi. yafidisu mu kutela ye kuzayisa nsangu zizi za mbote. ²⁰ Wuwu siwakuma baba, kuvova diaka ko nate lumbu kisinga lungana mabu mama, kadi kukuikidi mu m'vovo miame ko mina milungana mu ntangu yina. ²¹ N'kangu wakala vingilanga Zakalia ye bayituka vo wazingila beni kuna suku dia n'longo. ²² Kiokio kavayika, kalenda diaka kubavovesa ko, ye babakusa vo yani wamona mona meso kuna suku dia n'longo. Watatamana kaka kubavana bisinsu, ye wakala kaka baba. ²³ kiokio ntangu ani ya kisalu yamana, wavutuka kuna nzo ani. ²⁴ Kunima fintangu ntangu n'kento ani aelizabeti wabaka n'kayilu. Wakisueka ngonda tatu, wakala vovanga mu yani kibeni: ²⁵ " Tala mavangidi Mfumu mu mono, watudidi meso mani mu mono mu n'lemvo mu sukisa momo ma mvangidinge nsoni va n'tuala bantu." ²⁶ Mu ngonda ya n'sambanu ya vumu kiani, Mbasi Gabiliyeli wafidisua kua Nzambi mu Mbanza ya Ngalili ya bokeleluanga Nazaleti. ²⁷ Kua muana nduba walembi zaya yakala wakala nzitikila ya muana yakala babokelenga Yosefi, musi kanda dia Davidi. Muana n'kento ndondo yi Malia. ²⁸ Wayiza kua yani ye wan'tela: " Yenge kiaku, ngeye Nzambi kavangidi n'lemvo wa nene, Mfumu wuna yaku." ²⁹ mu mambu momo wavizuka n'tima ye wakiyuvusa nki mbote ya mpila yoyo yizolele songa. ³⁰ Mbasi yan'zayisa: " kukadi ye wonga ko, Malia, kadi ngeye tambudi n'lemvo va meso ma Nzambi. ³¹ Tala si wabaka lukawu lua muana yakala ye si wam'vana nkumbu ya Yesu. ³² Se kalala wa nene ye si kabokelelua muana Nzambi. Si kam'vana kiti kia kitinu kia Davidi n'kulu ani. ³³ Si kayala nate kua yele m'vu mu nzo ya Yakobi ye kitinu kiani kaki kala ye nsuka ko. ³⁴ Malia wavova kua Mbasi: " Weyi si dia vangamena kadi kizeye yakala kue?" ³⁵ Mbasi ya vutula ye yan'zayisa: " Mpeve a N'longo se kakala yaku ye lendo kia ndondo lutidi zangama se ki fuka kini kiani. Yi dina muana se kawutuka se kakala wa n'longo, se kabokelelua muana Nzambi. ³⁶ Ye tala, Se diaku dia n'kento Elizabeti wabakidi lukawu lua muana mu kinu kiani. Wuna kala mu ngonde ya n'sambanu ya lukawu luani. Yani wakala bokelelua sita. ³⁷ Kadi Nzambi kalembananga diambu ko." ³⁸ Maliya wavova : " Ngina selo kia Nzambi. Bika mawonso mavanagama kua mono bonso wuna nsangu zaku!" yidiawu Mbasi wan'sisa. ³⁹ Mu ntangu yina, Malia wayenda n'sualu kuna mbanza mosi ya kala va mongo yina muna mbanza ya Yuda. ⁴⁰ Wakota muna nzo ya zakalia ye wavana mbote kua Elizabeti. ⁴¹ kiokio Elizabeti kawa mbote ya malia , muana wazakama muna vumu kiani. Elizabeti wafuluka ye Mpeve a N'longo. ⁴² Waboka ye vova mu ndinga ya ngolo: " ngeye wuna walusakumunu vakati kua bakento bawonso ye bika m'butu wa vumu kiaku wasakumuka, ⁴³ weyi divangamene kua mono vo ngudi a Mfumu ame kuafete kuizila kua mono? ⁴⁴ Kadi kiokio mbote yiwakane mu matu mame, muana zakamene mu vumu kiame. ⁴⁵ Nkua mayangi kena ndondo kuikidi; kadi mono banzayisi ma Mfumu si malungana mu ntangu awu. ⁴⁶ Yikuma Maliya wavova: " muela ame sanisina Mfumu ⁴⁷ ye Mpeve ame yangalele mu Nzambi, Mvuluzi ame. ⁴⁸ Kadi yani tudidi meso mu selo kiani kia n'kento, ingete mbandu zawonso si zakumbokelela nkua mayangi. ⁴⁹ Kadi mpungu tulendo wavangidi ma nene kua mono. Nkumbu ani yina wa n'longo! ⁵⁰ N'lemvo ani wukuizanga kua bawonso bakum'vuminanga mu mbandu ka mbandu. ⁵¹ Yani wasongele ngolo za koko kuani ye wamuangisi bobo bena ye mabanza ma kikundidika. ⁵² wabuisidi bana ba mi n'tinu va yiti yawu ya kitinu ye wazangudi bobo bena balembama. ⁵³ wayadisi m'fue mia nsatu mia mambu mambote. Kansi wavutula zimvuama moko ma mpamba. ⁵⁴ Wayiza sadisa Isaeli, sadi kiani, mpasi mu kuba songa n'lemvo ani ⁵⁵ ( bonso ka vova kua Mase meto) kua Abalayami, ye kua kanda diani mu ntangu zawonso. ⁵⁶ Maliya wakala mu nzo ya Elizabeti tezo kia ngonda tatu. Bosi kavutuka kuna vata diani. ⁵⁷ Wuwu ntangu yawuta yifuene kua Elizabeti ye wa wuta muana wa yakala. ⁵⁸ Mfinangani zani, Se ye ngudi ani bawa vo Mfumu songele sinsu kia n'lemvo ani wanene kua yani; bayenda yangalala ye yani. ⁵⁹ Muna lumbu kia nana, bayenda kun'zengesa kiyakala. Bazola kum'vana nkumbu ya Zakalia, Se diani. ⁶⁰ kansi ngudi ani wavova: " nkumbu ani Yowani" ⁶¹ Ban'zayisa: " kavena muntu mu kanda diaku wuna ye nkumbu yoyo ko." ⁶² Basalanga sinsu kua Se diani mpasi bazaya weyi kazolele bam'bokelela. ⁶³ wa lomba fimeza ye wasoneka mambu ema: " nkumbu ani Yowani."Bantu bawonso bayitukua. ⁶⁴ Vana vawu nuani wakala kimpuanza ye lubini luani luakutuka. Wavova ye wakembela Nzambi. ⁶⁵ Yikuma, bawonso bakala vuandanga va kinzungidila kiawu babuilua kua wonga. Ye mu tini kiawonso kia mongo wa Yuda, bavovela n'samu wowo. ⁶⁶ Ye bawonso balunda wo muna n'tima miawu ye bakala vova: " Nani wana muana ndondo se kakale?" kadi koko kua Nzambi kuna yani. ⁶⁷ Zakalia, Se diani, wafuluka ye Mpeve a N'longo, wabikula ye wavova: ⁶⁸ " Bika kasakumuka Mfumu, Nzambi ya Isaeli, kadi wizi zietela n'kangu ani ye lungananese mpulusu ani. ⁶⁹ Wutunatini ngolo za mpulusu muna kanda dia Davidi, selo kiani. ⁷⁰ Yi momo kalonga mu nua mia m'bikudi miani mia n'longo mu ntama. ⁷¹ Yina mpulusu yita kutukutula kua beni zeto ye mu moko ma bawonso ka bakutuzolanga ko. ⁷² Wasongele nkenda zani kua Mase meto ye wabambukidi moyo mu nguizani ani ya n'longo. ⁷³ Landila m'vovo mia nzengolo ya nzambi ani kasala kua Abalayama Se dieto, si katuvana luve, ⁷⁴ ku nima kutu botola muna moko ma mbeni zeto, mu lenda kun'sambila kondua kua wonga, ⁷⁵ muna kin'longo ye muna lunungu ku nsi a meso mani, mu luzingu lueto lua m'vimba. ⁷⁶ Ye ngeye muana ame, si wabokelelua m'bikudi wa ndondo waluta zangama, kadi si wadiata ku n'tuala Mfumu mu kubika ngizilu ani ⁷⁷ ye vana kua n'kangu ani nzayilu ya mpulusu mu nzila ya n'lemvo a masumu. ⁷⁸ Nzambi eto kutu lolokanga mu nkenda zani zaluwalakazi. Muna nkenda zozo, si keza bonso ntangu kiokio kavayikanga, mu tukuka kua beto tuka muna zulu. ⁷⁹ Si kakiesesa bobo bena muna tombe ye muna kini kia lufua, mpasi kadiatisa ntambi zawuo mu nzila ya luvuvamu." ⁸⁰ Mukuma kia muana, wakala kula ye wakala kuma ngolo mu Kimpeve. Wakala vuandanga muna makanga nate mu lumbu kayantika kisonga kua n'kangu a Isaeli.