¹ Ikuma ngita siamisa, tekela konso kima, bisambu, ndilu za mvutu, ye mvutudulu za matondo mukuma kia bantu bawonso, ² mukuma kia min'tinu ye bawonso bena mu kisalu kia luyalu, mpasi vo tuakala ye luzingu lua vuvama ye luadingalala, mu mpedoso ye zita kua wonso. ³ Didi dina dia mbote ye dia zolakana va n'tuala a Nzambi m'vuluzi eto. ⁴ Yani zolele vo bantu bawonso bavuluzua ye baluaka ku mbakusulu ya kieleka. ⁵ Kadi kuna kaka ye Nzambi yimosi, ye kimpovela kimosi kaka va kati kua Nzambi ye muntu, Yesu Klisto, ⁶ ndondo wakiyekola yani kibeni bonso n'kayilu mukuma kia bawonso, yi kiokio kimbangi kiatewa mu ntangu ya fuanakana. ⁷ Yi mukuma kiokio mono yatudulua n'longi ye ntumua. Ngitavova kieleka ye kita vuna ko. Ngina n'longi wa bapakanu mu minu ye mu kieleka. ⁸ Nzolele nkutu vo bantu basambilanga mu konso kua fulu, mu ndangununu ya moko ma n'longo kondua kua nganzi ye mpaka. ⁹ Mpila mosi, nzolele vo bakento bavuatanga mu mpila yifuanakane mu kimpombo ye kukiyala. Kabakivani mu kanga nsuki, ye wolo, ye lunga, yevo min'lele mia ntalu ko; ¹⁰ kansi bavuata bina bivuilu kua bakento basonganga wunsongi mu mavanga mambote. ¹¹ Nga n'kento kafete longoka mu kondua kua mazu ye mu n'lemvo wawonso. ¹² Kivene n'sua kua n'kento mu longa yevo mu yala muana yakala ko, kansi kafete kala wavuvama. ¹³ Kadi Adamu wateka vangua ntete, bosi Eva. ¹⁴ Ye ka Adamu ko wavukumunua, kansi n'kento wavukumunua yani wawonso mu nsumukunu. ¹⁵ Kansi, si kavulusua mu ngutulu a bana, vo batatamane muna minu, ye zola, ye mpedoso ye mabanza ma velela.