¹ Mudiodio, kiokio ka tualenda dio kum'vibidila diaka ko, tuayindula vo dilutidi mbote mu sala yeto kaka kuna Atene. ² Tuatuma Timoteo, mpangi eto ye n'sadi ntuadi muna Nzambi mu mana matadidi nsangu zambote za Klisto, mu kulusiamisa ye kulufiawudisa mu diodio ditadidi minu kieno [ n'kanda mia n'kaka mivovanga: " tuafidisi Timoteo, mpagi eto ye n'sadi ntuadi mu Nzambi." ] ³ Tuasadidi mama mpasi vo kamosi ko vidusua zayi kua mpasi zozo. Kadi luzeye beno kibeni vo yimomo mafeti kutuluakila. ⁴ Mu kieleka, kiokio tuakala ye yeno, tuakala kulutelanga vo situakuamusua kua mpasi zasaka, ye mavangamene bonso luzeye. ⁵ Yi mukuma kiokio, kina vo kialendele dio vibidila diaka ko, yakala fila bantu bantela matadidi minu kieno. Ngatu vo n'tonti walutontele mu mpila yimosi, yevo salu kieto kiakituka kia mpamba. ⁶ Kansi Timoteo, kiokio katuka kua yeno, watunatina nsangu zambote za minu kieno ye za zola kueno. Watutela vo luakinu lunda kaka mabanza mambote mu yeto, ye luna ye nsatu za kutumona bonso mpe wuna nsatu zeto; ⁷ Ikuma, luzimpangi, vakati kua kiadi kieto kiawonso ye zimpasi, tuasiamusua kua yeno mukuma kia minu kieno. ⁸ Kadi wuwu tuna moyo, vo lutatamene nakekete muna Mfumu. ⁹ Kadi nga neyi tulenda vutudila matondo kua Nzambi mu kiese lutakutuvana va n'tuala ani e? ¹⁰ Fuku ye muini, tutakun'sambila mu ngolo zalutila mpasi katuvana luve lua mona zizi kieno ye kudika kiokio kikondolo mu minu kieno. ¹¹ Bika Nzambi eto ye yani kibeni Se dieto, ye Mfumu eto Yesu, badiatisa nzila eto kua yeno. ¹² Bika Mfumu kalukudisa ye kaluzadisa kua zolana yeno ye yeno ye kua bawonso, bonso tuvanganga mpe wo kua yeno. ¹³ Bika kavangila didi, mpasi mu siamisa n'tima mieno mpasi miakala miakondua belua muna kinlongo va n'tuala a Nzambi eto ye Se, kiokio kivutuka Mfumu eto Yesu kintuadi ye Ban'longo bani bawonso.