¹ Kadi luzeye beno mosi, luzimpangi vo ngizulu eto kua beno kayakele ya mpamba ko. ² Luzeye vo tuateka mona mpasi ye tuamuesua nsoni zayingi kuna Philipo. Tuabaka lusiamusu mu Nzambi eto, mu kululonga nsangu zambote za Nzambi vakati kua yitantu yayingi. ³ Kadi lusiamusu lueto kaluatuka mu mvidukusu, kana mu nsumukunu, kana mu luvunu ko. ⁴ Kansi nkutu, mu mpila mosi tuatambukila kua Nzambi mu kutuvana nsangu zambote, yi wowo mpe tuvovelanga. Katuvovanga mu diambu dia yangidika bantu ko, kansi mu yangidika ndondo fimpanga n'tima mieto. ⁵ Kadi ka lumbu kimosi nkutu ko tuasadila mpova zaleba, bonso luzeye, vo ngatu za kuluvilangesa mu nzinunu, Nzambi wunina dio mbangi, ⁶ ngatu vo sosa n'kembo wa bantu, wutuka kua beno yevo kua ban'kaka. Nga tualenda lomba mu kingolo lusadisu wuwu tuna Ntumua za Klisto. ⁷ Kansi nkutu, tuakala mpila mosi tualembama va kati kueno bonso ngudi wuta siamisa bana bayani kibeni. ⁸ Iwowo, tuakadila ye nzola mu beno. Tuakala ye kiese mu kayana ye beno, ka n'samu a mbote wa Nzambi kaka ko, kansi mpe ye tuzingu tua beto kibeni, kadi luakuma ba m'funu beni kua beto. ⁹ Kadi, luta bambukila moyo vo, zimpangi, salu kieto ye mpasi zeto: mpimpa ye muini beto tuakala sala, mu lembi kala zitu kua kana mosi mu beno. Mu ntangu yoyo, tuakala kululonga nsangu zambote za Nzambi. ¹⁰ Luna mbangi, ye Nzambi mpe kumosi, neyi tuadiatila mu wun'longo, mu singama, ye mu mpila yakondua kua sembua kua beno lua kuikila. ¹¹ Mu mpila mosi, luzeye neyi mosi-mosi mu beno, bonso Se ye bana bani, tualulongele ye lusiamisi. ¹² Tualutelele kimbangi vo lufete diata mu mpila yifuene kua Nzambi, ndondo kulubokelanga mu kitinu ye n'kembo wa yani kibeni. ¹³ Yi mukuma kiokio, tuvutudilanga ntangu zawonso matondo kua Nzambi, vo mu ntangu luatambula nsangu za Nzambi kua beto, zozo luawa, luatambudila zo ka bonso mambu ma muntu ko. Kansi nkutu, luatambula mo bonso mena ludi kibeni, mambu ma Nzambi. Yi mambu momo mpe meta sala vakati kua beno lukuikilanga. ¹⁴ Kadi beno, luzimpangi, luakituka min'tanginini mia mabundu ma Nzambi mena muna Yuda mu Klisto Yesu, kadi luamuesua mpasi zimosi kua mpangi za beno kibeni za nsi, mpasi zimosi zozo bamuesua kua bayudayo. ¹⁵ Yi bayudayo bavonda Mfumu Yesu ye mim'bikudi. Yi bayudayo batukula. Kabayangidikanga Nzambi ko. Kansi nkutu, n'tantu mia bantu bawonso. ¹⁶ Bakutukakidilanga mu longa bana kabena bayudayo mu bavuluzua. Yidiawu, basakisanga masumu ma yawu kibeni ntangu ka ntangu . Nsuka-nsuka, nganzi zifete kubabuila Kuna nsuka. ¹⁷ Tuakala tuavambana ye beno, luzimpangi mu fintangu-ntangu, mu kin'suni kansi ka mun'tima ko.Tuakala kibeni ye nsatu ya kulumona. ¹⁸ Kadi, tuakala ye nsatu ya kuiza kua beno, mono Paulu, ntangu zayingi, kansi satana watukakidila dio. ¹⁹ Kadi nki yi vuvu kieto kuna sen'tuala, yevo kiese kieto, yevo kolowa kieto kia ntoko va n'tuala Mfumu eto Yesu, kiokio kasinga kuiza e? Nga ka yiyeno ye ban'kaka koe ? ²⁰ Kadi beno luna n'kembo eto ye kiese kieto.