¹ Paulu, Silivanu ye Timoteo kuna Dibundu dia Tesalonika muna Nzambi Tata ye Mfumu Yesu Klisto. Bika n'lemvo ye luvuvamu biakala yeno. ² Tuvutulanga matondo ntangu zawonsono kua Nzambi mukuma kia beno bawonso, kiokio tukulutulanga muna sambu bieto. ³ Tubambukilanga moyo ntangu zawonso van'tuala a Nzambi Se dieto, salu kieno kia minu, zola kueno kua ngolo ye vuvu kieno kia luvibudulu muna mana makuiza kuna n'tuala mu Yesu Klisto. ⁴ Mpangi za zolua kua Nzambi, tuzeye vo yani walusola , ⁵ kadi nsangu zeto zambote zayiza kua yeno, ka mu m'vovo kaka ko, kansi mu lendo mpe, muna Mpeve a N'longo ye muna bidi dia vuvu. Mpila mosi luzeye mpe nkia mpila a bantu tuakala vakati kueno mu mukuma kia n'luta eno. ⁶ Luakitukidi n'tangini mieto ye mia Mfumu, wuwu kina vo luatambudi mambu mu lutokaneso lua yingi ye kiese kitukanga kua Mpeve a N'longo, ⁷ bonso mvutu, luakumini nona kia banwonso besi Makedonia ye besi Akaya bana bakuikila. ⁸ Kadi tuka kua beno, Mambu ma Mfumu mawakane, ye ka muna Makedonia ye muna Akayi kaka ko. Kansi nkutu, minu kieno mu Nzambi kiamuangane mu konso fulu . Mu diodio, katuna ye nsatu yavovela dio ko. ⁹ Kadi bawu kibeni bata nsangu, nkia mpila luatutambudila kiokio tuayiza kua yeno. Bavova neyi luabangumukina kua Nzambi, mu sisa nzambi za biteke ye sadila Nzambi a moyo ye ya kieleka. ¹⁰ Bavovanga vo lutavingilanga muana ani fete tuka muna mazulu, ndondo kafutumuna mu bafua. Yi Yesu, wukutukulanga muna nganzi zikuiza ku n'tuala.