¹ Tel li ku kel bini ba mvwam,li lil ngol itsin minia mimi ya ku kel bini. ² Imvwam i bini ibwel,biko bi bini ba ngako ba bi di. ³ Wol li bini ani nzim a bini bi bwi mabil,mabil man mama ta imbang i bini,bi dia nud a bini amon ne mbaa,bini li wel bi mvwam mu tsu le nsuk. ⁴ Tal lifud le bad ba isal baba kiele mbud mu mangwun ma bini,ban ba li ti bini buum,ta milaal,milaal me bad ban li mi twe ti ku matswi ma mfum wo liyaal. ⁵ Bini bu lizinghe mu nsi ntod bini bu li mwen ma mbwed ani isse ke ifa ani ifa,ya li wilku ma mbwun ma bini amon ne tsu li di misun. ⁶ Bini li mwen ku ibi,bini ya li dwis bad ba bwed,bini ya li ba dwis si bo ba likid we nto ilo. ⁷ Likal mu ikas mbwun,ti kun ko ya mfum,tal mud wun wo bwuno mikal,azele mbud yin yi mbwed ye tisil maan,mu ikas mbwun kin mu izele,ti kun ku ibwel yo mvul ye mutsa ani ye mwaa. ⁸ Bini si li kal mu izel mu ikas ma mbwun ma bini,munda iya ke mfum itwe ya nto-nto. ⁹ Li kaan mu iko bokoto mu nked a bini,ba kuun,mu mpil ne ba kaan iku li semes: Tal zusi akel ya miil a nzo. ¹⁰ Li wol,ba kuun ba me,amon ne mban ye minia ani ye ikas mbwun,bun bo kid ba mbikudi mu nkwum ye mfum. ¹¹ Tal,bis li mo ne,baba kel mu lizing li bwed,ban baba nikam mu izel kio iso,bini bu li ywi ba mo mu ikas mbwun ke Yobi,bini si bu li mwen ku nsuk a mio Nziem amu wi nki,munda Nziem akel nga ngieb ani ikas mbwun. ¹² Ku nkul ye bilo bio biso,ba kuun ba me,li lol WE Nziem ku yul to mu nsi ntod,to mu mpil ye nkim we. Si ikisi ibin ikal ikobun,imaa i bini si ikal ikobun,mu mpil ne bini li kaan ibwa mu isemes. ¹³ Bad baba mo mu nked a bini ba kel mu minia? Ba saam, baba mo mu isse? Ba yim bishaam be Nziem. ¹⁴ Mud mu mo mu nked a bini akel mubiel? Ayemen ba kwud ba Nzo Nziem,ba kwud ban ba saam munda nde, mu iku mu bab meel mu nkwum ye mfum. ¹⁵ Bisaam be likwikil lin,ligu-gulus mubiel wun,Nziem amu si-seen; kid ne nde ake sel masum,ba mu lilolul ku kel nde. ¹⁶ Li fungun masum ma bini ban ani ban,li sama si ban mu da ban mu mpil bini li kal ba wam. Bisaam bi ngol be mud mu bwed bi kel bibi lwid ngol. ¹⁷ Eli akel mud ifa imo andi bis,a seme ifhun munda mvul akaan ino,mvul si inwe we mu maan ba mvul ba tud ani ba ngon ba siaman. ¹⁸ Ku ngwel nde le bud saam mbal nkim,yul lili twim mvul,maan li ma bwid mbud ayo. ¹⁹ Ba kuun ba me,kid ne mud mu mo mu nked bini abi kiele nde ngako mu masong,si mud munkim yi mufudul. ²⁰ Ayab ne wun wo ya fudul mud a masum mu nzil yin ye bed nde a gulus mwe ku lifhu afyi masum si ma fhun.