¹ Jac,mud a isal wo Nziem,ani wo mfum Yesu Klistu,mu makaan kwim a mwel mama kel mu manto-manto: Mbwed! ² Ba kuun ba me,li tal amon ne bini li kel mu isse,li bi tal mu imek ki ba li si bini ku nkul. ³ Li yaba ne imek kin ke likwikil li bini li tswala ku ikas mbwun. ⁴ Si ilwim ne ikas mbwun kin ikwisi imbe-imbe isal i kio mu mpil bini li kal bad ba bwed,ani ikwisi ku ibwed iwine idjimin ilo imo. ⁵ Kid ne mud mu mo mu nked a bini akel we nga maken,akwe ku luum ku kel Nziem,nde wun wo wa ani iwun bokut,nde amu wu-wa. ⁶ Si nde aku luum andi likwikil iwine ma med,munda wun wu kel andi ma med,afeen mimpwisi mi nzel me bise mufeel nto ani nto. ⁷ Mud a ifa kin,akaan itiemen ne azi-zwa ilo imo ku kel mfum Nziem. ⁸ Akel mud wo wun tiemene,akel imbe mu ma nzil ma nde. ⁹ Mukuun wun wo zinghe mu iku mikimis,ami kumis mu iku mu iseen inde. ¹⁰ Si ba mvwam ba kal mu isse kid ne Nziem a mu si ku ngwel ye bad ba nkim munda mvwam afhi-fha bun bo fha dwid le intunt. ¹¹ Tel li tswu andi mbaa,iwimis madwid,bintuntu bi bwa,ibod i nde li imini,kobun mvwam afha si mu nked a isal inde. ¹² Isse ikal ku kel wun wo kasa mbwun kid ne ba mu mek,nde awu-wol mpu ye lizing yin ye kenes Nziem ku kel ban ba muzolo nde. ¹³ Nto mud mumo we kid ne ba mu mek,akaan iliel ne Nziem nsi kobu mu nzil ye ma mbi,nde si akaan mu imek mud munkim. ¹⁴ Kons mud aka ba mumek kid ne nde abi si mu ilwidil lizol le nde ngako. ¹⁵ Munda izol kin kid iwil ku mbwun a nde,ibudo lisum,lisum kid ne li mukedel, li budo lifhu. ¹⁶ Li kaan mu iku bi fhud,ba kuun ba me ba lizol. ¹⁷ Lizol lo liso Lili lwidil ibod,li kel imbeli fa ku yul ku kel Nziem wo ibini,ku kel nde wun,a sobo we abamana we si manda ma nde. ¹⁸ Nde ali bwid mu mpil ye lizol li nde,mu nzil ye nda ye ibini mu mpil ne bis likal bad ba iso mu bilo bé kes nde. ¹⁹ Li yaba ba kuun ba me ba lizol,kons mud akal wo yi yilam mu iywil,mu imo,mu iwun ywil mpud. ²⁰ Munda mpud ye mud,ikwise we masong ma Nziem. ²¹ Itsin kio kin,li bad mu iku bi bebes ani mu iwun lwidis mu maken ma bi mu bike-bike nda yin yi ba li lweng bini,yi kwi mu igulus lizing li bini. ²² Li sa mu bisal nda ye Nziem,li kaan mu iku biwa na mu iywil,mu iku li fhud bini ba ngako mu mantiemen ma bi. ²³ Munda kid mud mumo ywil nda Nziem si ayi si mu bisal akel amon ne mud wo tala mbwis a nde mu indyil. ²⁴ Ku ngwel a ku bital,le win ande,le djimin mbal mo ne nde akel isi nki. ²⁵ Si wun wo bed dis mu ma ngil ma ibini,ani ikas mbwun,akel we mud wu ba kwi mu idjimin,si nde wun ba musa mu bisal.Akal mu isse mu bisal bi nde. ²⁶ Kid ne mud mu mo a kwikil ne nde akel mud a Nziem,si nde akel nga munwa,nde abi fhu-fhudo,inziem inde ikel ke mpaam. ²⁷ Inziem ke ibini ku madis ma Tad Nziem,aki kio: Isedes baan ba nsion andi ba mifhul- mbel ba bakad mu minia mi bo ani mu iku bikeb munda manda ma nsi ntod ma kaan iku li bebes.