¹ Pol,ntum mu mo wo Yesu Klistu mu lizol le Nziem, bad ba busantu ba Nziem ku Efez baba kel bad ba masong mu Yesu Klistu. ² Lizol li kal andi bini ani ngemb mu nkwum a Nziem Tad a bis ani ye mfum Yesu Klistu. ³ Ne Nziem wu kel Tad wo mfum a bis Yesu Klistu ikal andi likum! Nde wo li wi lisakumun lo liso le bu santu mu ma mbel mama yul mu nkwum ye Klistu. ⁴ Nziem a li pwen mu nkwum ande baa le kes nde ntod, mu mpil ne bis likal ba santu iwine ilwili ku madis ma nde. ⁵ Nziem bo li ken munda iku li wol amon ne baan ba makuu mu nzil ye Yesu Klistu, bun bu kel ma mbwed ma lizol li nde. ⁶ Imwaan ke bis ke makuu lifud li lo,ikumis ke lizol li nde li bwed ke li wi nde inkaam ku kel wun wo zwel nde. ⁷ Mu Yesu Klistu, bis li wel iloluk mu makil ma nde ani ndodokol ye masum, bun bu kel lizol le imvwam i nde. ⁸ Nde ake a tsemen lizol liso lin ya nghe bis mu maken mo maso ani mu iyab. ⁹ Nziem bo li swi itsin ke insi-nswi ke lizol li nde, bun bo zwel nde bun bo swi nde ko kel Klistu. ¹⁰ Isal ke Klistu ikele munda ikwisi tel, munda ivus bilo bio biso, bilo bio biso ku yul ani mu maan, mu nzil ye mfum mumo mu Yesu Klistu. ¹¹ Mu Klistu,ba li yemene amon ne imvwam, mio min ba bi ken munda bis sa ntam, bun bo yili wun wo sel bilo bio biso bun bu kel itsin ke lizol li nde. ¹² Nziem ali yemene ba mvwam mu mpil ne bis li kal bad ba iso mu imu shil mbwun mu ibaal andi Klistu, kobun bis likal mu ikumis mu likum li nde. ¹³ Mu Klistu bini si,tel liywi bini nda ye ibini, nda Nziem ye liguluk li bini, bini si ya likwikil ko kel nde, li kele ba lisi idiim ke kenes mpev a santu. ¹⁴ Mpev a santu ikel bi ba swe ku nkul munda imvwam ke bis ti kun ku li wol bilo bin bio biso, mu issem likum li nde. ¹⁵ Munda iko bin, ba tel le ywi me ne ba kel mu imo mu likwikil li bini ku kel mfum Yesu Klistu ani mu lizol li bini munda ba santu bo baso bad ba Nziem. ¹⁶ Me nzese we mu iwa Nziem melesi munda bini mu iku Lisa mu bisaam bi me. ¹⁷ Me nkel mu isaam ne Nziem wo mfum a bis Yesu Klistu, Tad wo likum, a li wa mantiemen ma bi nsuu ani nteel yi iyab manda ma nde. ¹⁸ Me nkel mu isaam ne madis ma ma mbwun ma bini ba ma kiele mu mpil ne bini li yab nki bi kel likwikil lin le li yemen nde,ani mu imvwam ke likum li nde mu nked bad ba santu ba Nziem. ¹⁹ Ani mu bisaam bi me, me lwomo ne bini li yab yan ya bee binen be ngol a nde ko kel bis ba likwikil,bun bu kel isal ngol ye nde. ²⁰ Mu ngol aso yo yin ye sel Nzieme mu Klistu tel afutumuk nde mu lifhu,le mu bwis nsi mu kuu li nde le itad mu ma mbel ma yul. ²¹ Le mu bwis Klistu nsi mu inaan ya nghe bi mfum bio biso ani liyaal ani ngol ani inied bad ani ma nkwum mo maso ma ba swen, Klistu abi-bial kid we ne na mu ina iso ki, si mu bi na bibi ya ku nkul. ²² Nziem asi bilo bio biso ku nsi makol ma Klistu, a mu wi mu Nzo-nziem amon ne mfum ya nghe bilo bio biso. ²³ Nzo nziem ikel nud a nde, lizol le wun wo wilise bio biso mu bilo bio biso.