¹ Ikele andi mud mu mo wo mbee ye Césalee, nkwum ande ike Colné, ibwil ke ba suda ites ke nkam, ke bad ba Itali. ² Akele mud wo sama Nziem, mud wun wo fukame ku kel Nziem andi nzo nde yo iso. Awe nzim a fhun ku kel ba yuda ani isam Nziem tel lo liso. ³ Mu matel ma wa ma ipel, le mwen mu wili a mon ne mu ileel, wanzio a Nziem aya ku kel nde. Wanzio le mu liel ne:"Colne!" ⁴ Colne, nde le kidi mu nda ye wanzio wun, le tswil(aywi buum): Nki kobunu!" Wanzio le mu liel ne:" Bisaam ani makab ma nze be wa nze ku kel bad ba munia, bi neme amon kab li ba wun kuu mu idjimin ku madis ma Nziem. ⁵ Tel li tum bad mu mbee ye Joppee munda ba ya mu tswal Simon wu ba yemene si Piel. ⁶ Akal nzo mo andi wo yile bi baan be ba niam, nkum a nde Simon, nzo nde munkwa nzel mungwa. ⁷ Tel a kyi wanzio wun wo mwe andi nde, ⁸ Colne le yemen bad ba nde ba isal bwel ani suda mumo wo seme Nziem mu nked a bad baba liel min mio miso mimi lwid, le ba twin ku Joppee. ⁹ Akia ipel, mu matel ma siaman, bun bu ba kele bo munzil, li ba twe mu nkwa mbee, Piel le led ya nghe shie munda isaam. ¹⁰ Nzal li imu kwed, azwele ne adia ilo imo. si tel ba mu lemene bo bilo be idia, nde le lwi mu iyutuk. ¹¹ Le mwen yul ya li fiele, sak li bilo li iyi kimin, ilo imo amon ne mpaan mu nen bad ba ishim mu manto ma na. ¹² Munked ikele ani ba niam ba makol ma na bo baso, ba niam baba ko kwe ya nghe dum, ani ba mwin ba yul. ¹³ Nda mo li imu liel ne:"tsud, Piel, dus, dia!" ¹⁴ Piel ne:" Lo, mfum, munda me man ndia we nto ilo imo ke mbuin to ke masum." ¹⁵ Si mu mbal ye ywel, nda le bud mu yil ne:" Bin bi mwen Nziem ne bibi bwed, kaan iku bi yemen ne bibi mbyin." ¹⁶ Manda man ma bwi mbal tud, sak lin lili fudu ku yul. ¹⁷ Tel lin, Piel akele mu nswen itsin mu iyab ne ileel kin iswe nki, Tal, bad twim Colneku ngwel a iyab nzil ye nzo,li bi twe ku mwil a nzo. ¹⁸ Bo li ba yemen mu nda ye ngol, li ba fwil kid ne simo si wu ba yemene Piel ake ako yan. ¹⁹ A koyan, Piel a tiemene fudu mu ileel kin, mpev li imu liel ne:" Tal bad ba tud ba ifwil, tsud, ya ²⁰ Kimin, kwe andi bo. Kaan ibad bwum mu ikwe andi bo munda me ba twim." ²¹ Kobun Piel le ikimin, le ba liel ne:" Me nkel wun wu li ya sa bini, munda nki bini li yi?" ²² Bo li ba fidil ne:" Mumo mu nked a bad nkam, nkwum a nde Colne, mud wo imbe, wo selele Nziem, bad ba kaan li ba yuda ba mutshile imbang ibwed, ba mu lwengku kel wanzio a santu wo Nziem munda ba ya ifudul mu nzo nde mu mpil ne ba zwa nsia mbwed ku kel nze." ²³ Ko bun Piel le mu yemen mu ikod ani izing andi nde bo. Bwis li bi kie, nde le tswid, le win andi bo. Ba mo mu nked a bakuun ba Joppee li ba fi ba djid. ²⁴ Tsu lili lwini, li ba twe ku Cesalee. Colne ake aba zeel, ake le yemen ba nkal-kuun ani ba nduu ba nde ba mbwun. ²⁵ Tel a kwed Piel, Colne le win ku nkul a nde, le fi bwa ku makol munda iku musaam. ²⁶ Piel, le mu tswidis, le mu liel ne:" tsud me si nkel mud." ²⁷ Tel amwe nde andi Piel, nde le kwed, le mwen bad ba fhun ba bwi-nsi mbel mo. ²⁸ Nde le ba liel ne:" Bini ba ngoka li yeb ne ba mee ku kel mu yuda mu ibwa-nsi mbel mo ani munzis to mu iku mutal, si Nziem ya nswene li kwi we mu iyemen nto mud mu mo wo mb yin to wo masum. ²⁹ Itsin kio kin ki ndjil me tel a nzemen nze. Nze a nzemen munda nki?" ³⁰ Colne le fidil ne:" Matsu ma na ma lwid mu tel lolin li mo, tel le wa, me aseme mu nzo me, tal si mud mumo a tswid, a bwed biko be beel, ³¹ Le mwe ne:" Colne, bisaam bi nze, Nziem abi ywil, Nziem si a tiemen makab ma we nze ku kel bad ba munia. ³² Kobun, tum ku Joppe, ba yemen mud wun wu ba yemene Simon, wu ba yemen si piel. Nde a zinghe ku nzo ye mud mu mo wo yile bi baan be ba niam, nkwum a nde Simon wo zinghe mu nkwa nzel a mungwa. ³³ (Me a twim mud ku kel nze ntam a fhun we si nze kid ku ibwed mu mbel mo iya. Kobun tel li, likel bise baso mbel mo ku nkul a Nziem munda iywil manda ma iliel Nziem mu iya li liel ku kel bis.) ³⁴ Ko bun Piel le fiele munwa, le liel ne:" Ku ibini, me nzieb ne Nziem akaba we bad. ³⁵ Si mu bad bo baso, wun wo mu bada, a mu sama, ani isal ma mbwed, akel wu mubwed nsil ku kel nde. ³⁶ Bini li yeb nsia ye twim nde ku kel bad ba Isayel, mu iku ba liel nsia mbwed ye ngemb mu nzil ye Yesu klistu wu kel mfum wo mud nde muso. ³⁷ Bini li yeb bini ba ngako, nki manda ma lwid mu Judee, sa fa ku Galilee ku ngwel ye mbotik ye lweng Zwan. ³⁸ Nda nen yin yi tel Yesu wo Nazaleth isi-nki Nziem a mu beb mpev a santu andi ngol a nde, a wine mu ikid ma mbwed, ani iwemes bo baso baba kele mu mishi me satana, munda Nziem akele andi nde. ³⁹ Bis le kel ba mbang ba bilo bio biso be sel nde bibi bwed mu ntod ye ba yuda ilud ku Yeluzalem. Yesu wun wu ba dwis bo, mu iku mukas ya ngie muti. ⁴⁰ Mud wun, Nziem bo mu futumuk ku ngwel ye matsu ma tud le mu tisil ku madis ma bad. ⁴¹ Kel we ne ku kel bad bo baso si ku kel ba mbang baba pwen Nziem ku iso, ku kel bis baba di ani inwa andi nde ku ngwel ye lufutumuk li nde ku ba fhu. ⁴² Nde bo litwim mu ilong ku kel bad ani mu ita imbang ne Nziem a mu pwen ne nde akal zusi wo bad baba mwe ani baba fha. ⁴³ Mu nzil ye nde bis ba mbikudi li ta imbang ne mud nde muso wo kwikile ku kel nde, awol ndolul ye masum mu nkwum ye nde. ⁴⁴ Tel li kele ne Piel a bud mo, mpev a santu le ikimin ya nghe mitswe mimi bad ban babaywile nsia yin. ⁴⁵ Bad baba kele mu ibwil kin, ke bad baba kwikile baba tsid, ban baba yi andi Piel, li ba yituk munda kab le mpev a santu lili bwi si ku kel ba mimpan. ⁴⁶ Munda nde bo ywil mi mpan ba mo mu minwa me mpev ani ikumis Nziem. Piel le fidil ne: " ⁴⁷ Li kwi mu i mee mbotik ye mania ku kel ban baba wel mpev a santu amon ne bis?" ⁴⁸ Ko bun nde le ba twim ne ba ba bwetek bo li ba mu lwim ikal ndaam ye matsu andi nde.