¹ fifiɛ ȡe ŋde koŋ yudatɔ sɔ leŋkɔ nɔ amɛ tsi ŋde nyi yudatɔ o lɔ,alo viȡe ŋde le evo soso me? ² viȡe tsɛwo sugbɔ ŋtɔ .tutugbɔ lɔ yudatɔwo Mawu sɔ yio nyɔ do ashi na. ³ tsi wodomɛtɔ ȡewo ŋde wa nutexue ȡe? yiŋtsi eyɛ ȡefia be Mawu tsan la gbe nutexue wawa? ⁴ oo ! yeɛ ŋda djɔ kpɔ gbeȡeo. ne amɛ gbetɔ ȡeshiaȡe zu adjeȡatɔ tsa lɔ, Mawu yɛ lɔ , nyawo kpoe inyi godoo. woŋlɔe daȡɛ be: "ne exonuxo lɔ tɔwo ne djɔ. ne eȡo kdjo nɔ lɔ, wola so enyɔ nɔwo godoo". ⁵ ke fifiɛ nenyi be enu madjɔmadjɔ ,tsi mia amɛgbetɔwo miwanɔ yi nanɔ be nudjɔdjɔɛ , tsi ɔMawu wanɔ laze faa ȡe, keŋde mia tɛŋ nu le go tsɛme ? ȡe mila nube Mawu wanu madjɔmadjɔ, neheto nɔmia ?(ŋle nyɔ yɛ biɔ, shigbe letsi amegbetɔ xonɔ nuxo xa ene.) ⁶ gbeȡe! ne Mawu nyi nu madjɔmadjɔ watɔ ȡe, lede ila tɛŋ ȡokodjo nɔ xixeame? ⁷ nele lexa be ahiɛn nusu kakame yi Mawu yio nyawo zenɔ le faa, be woa kafui ȡe, ke ŋde ŋtsi wola gbebuŋ nuvɔwatɔ? ⁸ nele lexa ȡe, ŋde ŋtsi mida nɔ nuvɔ waɔ kpo, be nunyi nanɔ totowɔ le meɔ? meȡewo le adje ȡawɔ ȡo miashi xoxo, be eyɛ inyi mia nyɔ tsi nuwɔ mile. nye ŋde to neneɔ, wodo huɛ nɔ amɛtsi u enyɔ xɔ lɔ, wotɔ djɔ. ⁹ ke fifiɛ lɔ, miɔ yudatɔwo miatɔ nyɔwu abuwo tɔa? oo, ŋde nyɔwu le akpa ȡe kpikpio ȡe! miȡeme toŋkɔ vayi xoxo, be yudatɔ kudo amɛtsi ŋde nyi yudatɔwo kpata le nuvɔ yio ŋsɛ gɔmɛ. ¹⁰ Mawuȡo kpe dji be: "ameȡe ŋde le, tsi le djɔdjɔɛɔ. oo ȡeka pɛɛ tsa ŋde leo. ¹¹ meȡe ŋdele, tsi senɔ nugɔmeɔ,yi ȡeka pɛ tsa ŋdeleo, tsi dji nɔ Mawu yio nɔ. ¹² wokpata wo bu mɔ; wokpata wode gba, ȡe ŋdele, tsi wua nɔ nunyuio. ȡeka pɛ tsa ŋdeleo. ¹³ wo hlome le nuvo daȡe, shigbe yɔdo tsi le nuvo xa ene . woblenɔ ame ŋɔnuiŋɔui kudo wo aȡe. wo nyɔwo le shigbe dan yio aȡi xa ene le aȡe dji nɔwo. ¹⁴ fixodo kudo veve xɛlixɛli ȡɔ nume nɔwo tanŋ. ¹⁵ wole dushiɔ , tuta amɛwugbe. ¹⁶ ne wodjo le yiyiɔ lɔ, wogbe axuedo kudo veve sese daȡo ŋgbedemɛ. ¹⁷ woŋde nya letsi wola nɔ agbe le ŋtsifafa me ȡo, ¹⁸ yi Mawu vɔvɔ ȡe kpekpe ŋdele ŋkuvidji nɔwo. ¹⁹ fifiɛ minya be nutsiwo, seɛ nu lɔ, metsiwo le seɛ gɔme yio towo na, ne amɛ shiame na gbɔdji enyɔ xɔxɔ ȡo ye ȡeki dji, bena Mawu naȡo kodji nɔ xixeɛme kpata . ²⁰ woŋdabu ame gbetɔ ȡe kpikpi le Mawu yio ŋme be ele djɔdjɔɛo, be ewa sedji ŋtsio, ȡo esɛ lɔ ȡekpo yi inanɔ mi djenɔshi be nuvɔ le yiɔ. ²¹ kefifiɛ lɔ, woȡe letsi Mwu bu ame be ele djɔdjɔɛ sɔfia, yi eyɛ ŋde to esɛ dji vaɔ. esɛ ŋtɔ kudo Mawu yio gbefa ȡetɔwo ȡe nukafu le eyɛ ŋtsi. ²² Mawu bunɔ ame shiame tsi xɔ kristo dji se be ele djɔdjɔɛ. ŋdedo vovo toto ȡekpikpi wo meɔ. ²³ ȡo ame shiame wa nuvɔ, yi woda tɛŋ va Mawu yio ŋtsi kɔkɔɛ gbɔ. ²⁴ vɔ Mawu ve wo nu, buwo be wole djɔdjɔɛ, shigbe nunana nene, tsi kristo yesu tu fɛ ȡo wonu ŋtsi. ²⁵ Mawu ŋtɔ toŋkɔ sɔ kristo ȡo anyi be, toyio kume lɔ wua sɔ mia nuvɔwo ake mi, ne woxɔ dji se kpo. eyɛ ȡefia be Mawu wanɔ nudjɔdjɔɛ, ȡo egbɔ djiȡɛ bkɛwu eŋɛ ȡaba xu nuvɔ tsiwo mi wa san lɔ dji. ²⁶ ewa estɛ be yiaȡefia, le egbɛ ŋkeke tsɛwo me be yeŋtɔ lɔ yele djɔdjɔɛ,yi yebunɔ ametsi xɔ kristo dji se be ele djɔdjɔɛ ²⁷ ke fifiɛ ȡe, ŋde koŋ miaŋ gbesɔ xo adegbe? ŋȡe ŋdegbeleo. susu ŋde tayɔ? tsi mi wa seɛ dji ŋtsi ya? kpao, ke tsi mi xɔse ŋtsi yɔ. ²⁸ nyɔ tsii tsi misɔ tɔte inyi be wobu ame be ele djɔdjɔɛ, nenyi be exɔ, kristo dji se, ŋde nyi be tsi wa seɛ dji ŋtsi yɔ. ²⁹ alo wawu ȡe, yudatɔwo ȡeȡeo tɔ kpo inyi Mawu lɔa yi ŋde nyi ametsiwo ŋde nyi yudatɔwo xa tɔwoa? ɛɛ, enyi wotsa wo Mawu daa! ³⁰ nene Mawu ȡeka kpoe le. yɛi labu ametsiwo nyi yudatɔwo be wole djɔdjɔɛ le wo xɔse ŋtsi, yike labu ametsiwo n!ŋde nyi yudatɔwo be wole djɔdjɔɛ le wo xɔse nu ³¹ ke ŋde nyi ȡe misɔ xɔse sɔle seɛ ȡeɔ daȡɛɔ? gbeȡe! ke boŋ mile seɛ ȡo te sɛsɛȡe.