¹ Yo ŋgbodomɛ lɔ mawudɔla atɔgɔn lɔ ku kpin lɔ. Ŋkpɔ woetrivi ɖeka gin so lilikpomɛ va anyigban. Wosɔ ahluimɛ yo vudo safle nii. ² Ehoun ahuimɛ yo vudo lɔ yi azizɔ ganɖe tole vudoa mɛ sigbe be kpɔnɔn dokpo ganɖe yo zizɔ. Ewoe kudo aya wotrɔ yibɔ to azizɔ tsi tole vudo lɔ mɛ. ³ Ebɔsuwo tole azizɔ lɔ mɛ yi kankan ɖo anyigban dji yi wona wo ŋsin tsiɖi akeklewo tɔ le anyigban dji. ⁴ Wo tonɔwo be wo ŋgbe wɔa nubaɖa alo agble anyigbandji gbewo O, alo atsi ɖekpekpe O; vɔ be wonɛ wɔ nubaɖa kudo amɛtsiwo wo ŋde ɖo Mawu yo djesi ɖo wo ŋgowonu O. ⁵ Wo ŋde nawo ŋsin benɛ wa wuwo O, vɔ be woa tsitɔwo le woetri amatɔ domɛ. Wo ayaɖuɖu lanɔn sigbe be aletsi akekle ɖunɔ amɛ nɛnɛ. ⁶ Le gbexɔngbe lɔ, amɛgbetɔwo ladji eku veveɖe ganke ela sidjo le wo gbɔ. ⁷ Ebɔwo ɖi esɔwo tsiwo djraɖo ɖɛ nɛ ahuayiyi. Enutsiwo le wo tamɛ le sigbe sika kuku yi wo ŋmɛ le sigbe amɛbetɔwo yo ŋkumɛ nɛnɛ. ⁸ Eɖa wotɔwo le sigbe nyɔnutɔ nɛnɛ , yi aɖu wotɔwo le sigbe djantawo tɔ nɛnɛ. ⁹ Woɖo akɔtakpoxɔnu sigbe gakpotɔ nɛnɛ, yi wo wadawo gbeɖiɖi le sigbe esɔkekevi gbogboɖewo tsi tuta ahuagbedji nɛnɛ. ¹⁰ Asikewo le wosi sigbe akeklewo wo sikewo nɛnɛ; le asike wotɔwo mɛ lɔ, wo kpɔ ŋsin benɛ woa wɔ nubaɖa kudo amɛwo le woetri atɔn domɛ. ¹¹ Wo amɛgan yinyi mawudɔla tsi kpɔnɔ ahluimɛ kudo yo nutrorowo mɛ. Yo ŋkɔ le Hebrigbemɛ yinyi Abandɔn yi Helagbemɛ yinyi Apoliɔn. ¹² Djɔgbevouin tutugbantɔ vayi. Kpɔ! Eve bubuwo gbe gbɔnɔ le enutsɛwo ŋgbodomɛ. ¹³ Mawudɔla adin gɔnlɔ ku ekpin, yi ŋse egbeɖe tsi tole sika vɔsa mɔkpliɛ yo dodomɛ, tsile Mawu yo ŋkumɛ. ¹⁴ Egbea tonɛ mawudɔlawo adingɔnlɔ be: " Tuka nɛ mawudɔlawo tsiwo wobla le Efrati yo tɔgan to." ¹⁵ Mawudɔla enɛ tsɛwo yi sɔgbe le gaxoxo xɔn pɛpɛmɛ, bexɔngbe, woetri xɔn mɛ kudo exoe xɔn mɛ yi wovo sɔnɛ anyigbandji dukɔn yo hinglinmɛ akpa etɔn yo gbangban. ¹⁶ Sɔdja tsiwo le esɔdji yo hinhlinmɛ le miliɔn katɔn.(200.000.000) Yi ŋse yo hinhlinmɛ lɔ. ¹⁷ Lexa yi ŋkpɔ esɔwo kudo amɛtsiwo ledji le axin ŋtegan mɛ ke: " Wo akpoxɔnu le sigbe kɔla dji ezotɔ nɛnɛ, eblɔ dovivitsi kudo ŋtsisiɖiɖi. Esɔwo yo tawo le sigbe be djantawo ta nɛnɛ, yi le wo numɛ lɔ, ezo le totoɔ kudo azizɔ kudo ezokan. ¹⁸ Amɛgbetɔwo yo akpa tɔnlia ku to funkpekpe tsɛ mɛ: Ezo, azizɔ kudo zokan tsinɛ le totoɔ le wo numɛ. ¹⁹ Ɖolɔ esɔtsɛwo yo ŋsin le wo numɛ kudo asike gbɔ. Le nyawototo mɛ lɔ, wo asike le sigbe edantɔwo tɔ nɛnɛ yi to wo tawo dji woto le nubaɖabaɖa waɔ kudo amɛwo. ²⁰ Dukɔn kpɛtɛwo, tsiwo ŋde ku to djɔgbevouin tsɛwo mɛ olɔ gbe djimɛtrɔtrɔ le wo nugblegble wawawo mɛ, wo ŋde dokpo gbɔngbɔn vɔnwo subɔsubɔ yi sika legbaviwo, ega, gadjiwo kudo ekpe kudo atsi kpakpawo: Enutsiwo ŋda tinŋ akpɔ enu O, alo ase enu, alo azɔn O. ²¹ Yi wo ŋde trɔ djimɛ tsan le wo amɛwuwuwo mɛɔ, wo azewɔwɔwo, le wo ahasivlowo, alo amɛtafutafu wo meɔ.