¹ Sɔ yi dji lɔ, ŋkpɔ djiŋkusi yéyé kudo anyigban yéyé, ɖo djiŋkusi xoxo kudo anyigban xoxo ɔ wo lava yi, nɛnɛké axu tsan ŋda gbé nɔn anyi o. ² Ŋkpɔ édu kɔkɔɛ, yerusalem yéyé, tsi so djiŋkusi lé Mawu gbɔ, édraɖo sigbé nyɔnu tsi yi lé dja yi asuxué xa nɛnɛ. ³ Ŋsé égbe gangan ɖé so éfiɔ zikpiɛ dji yi tobé; kpɔ! Mawu yio nɔnxué lé kudo agbétɔwo yila nɔn agbé kudo wo. Wo la nyi akɔta yétɔ yi Mawu ŋtɔ la nɔn anyi kudo wo yi la nyi Mawu wotɔ. ⁴ Ela tutu ɖasi lé ŋkuvi dji nɔn wo yi éku ŋda gbé nɔn anyi o, vévé sésé ŋda gbé nɔn anyi o, avifanfan ŋda gbé nɔn anyi o, ayaɖuɖu ŋda gbé nɔn anyi o. Enu xoxo tsan lava yi. ⁵ Amɛ tsi yi nɔn anyi ɖo éfiɔ zikpi dji tobé ; "kpɔɖa, ŋwa énu yéyé tsɛwo". Yi nube; " ŋlɛn enu tsɛwo ɖo enyɔn tsɛwo nyi enyɔn xɔ asiwo". ⁶ Tsi yi sɔ kpi" enu tsɛwo nyi wawa. enyɛn yi nyi alpha kudo omega, tɔtɔdji kudo vɔvɔɛnu. Amɛtsi sikɔ tsi lɔ, na nan ési agbétɔɛ yi la nu gbalo gbalo. ⁷ Yi amɛtsi la ɖudji lɔ éla nyi énu nɔamɛsitɔ lé énutsɛwo mɛ yi na nyi Mawu yétɔ yi yétsan la nyi évinyɛn. ⁸ Vɔ nɔn amɛtsiwo yi wógbé, amɛtsiwo yi ŋdé lé alɔdjiwo, énu baɖawaɔwo,amɛwutɔwo, énu gbégbléwatɔwo, madjikiwatɔwo, vodusɛntɔwo kudo nusukantɔwo kéŋkéŋ, wo texué yi nyi ézomavɔ kudo vévé sésé mɛ, yi nyi éku évégɔnlɔ. ⁹ zéɖéka lé mawudɔla amadrɛmɛ yi goŋgoŋ, yi hɛn kɔkpo amadrɛ tsiwoe ɖɔ kudo édɔ amadrɛ ŋgbédémɛtɔwo yi nubé;"va efiɛ, na sɔ asuɖétɔlɔ fia, nyɔnu alɛngbɔviɛtɔ. ¹⁰ Fifiɛ lɔ, ekplɔŋ to gbɔgbɔnmɛ sɔ yi etɔ gangan tsi yi edji ɖéka dji yi sɔ edu kɔkɔɛ lɔ sɔfiaŋ, yérusalɛm, tsi yi so djiŋkusi lé Mawu gbɔ. ¹¹ Yerusalɛm do kanfu kanfu Mawutɔ yi klɛnklɛn yétɔ lé sigbé sikanu xɔasiwo xa nɛnɛn, sigbé sika kpé tsi yi kpɔnɔn énu xa yi gbé nyɔn wu sika. ¹² Eɖo égli ganɖé tsi yi edji yi ɖo éhɔn wuive kudo mawudɔla wuive tsiwo yi kpɔnɔ éhɔn lɔwo dji. Ŋyikɔ akɔta wuive israeli viwo nyikɔ wo ŋlɛn ɖo éhɔn lɔ wo dji. ¹³ Ehɔn amɛtɔn le éwuézéxué, amɛtɔn lé étagbé, amɛtɔn le afɔdé, yi amɛtɔn lé éwuéyixɔ. ¹⁴ Egli éduɔtɔ ɖo gɔmɛɖokpe wuive tsi dji nyikɔ wuive apotriwotɔ alɛngbɔviɛtɔ ŋlɛnŋlɛn ɖo. ¹⁵ Amɛtsi yi le nuxo xoɔ kudoŋ lɔ eɖo djidjimɛ ketsi sikatɔ tsi wo la sɔ adjidjré eduɔ lɔ, ehuɔnlɔwo ku egliɛ lɔ. ¹⁶ Eduɔlɔ ɖo djidjrémɛ ɖekaŋmɛ pɛpɛ sɔ yi djidjimɛ kudo kpokpui mɛ nyi ɖekaŋmɛ. Esɔ ketsiɛ sɔ djidjre eduɔlɔ, djidjimɛ, kpokpuimɛ kudo édjiyiymɛ wo nyi ɖekaŋmɛ, gbadjamɛ lɔ nyi kavetakpo téxué éwo, téxué wuive (12000). ¹⁷ Egbé djidjré egli yétɔ tsi yi nyi awaka kaetɔn tsi enɛ (144). tsi yi nyi djidjrémɛ agbétɔ kudo mawudɔlawo tɔ. ¹⁸ Egliɛ nyi ekpé xɔasi yi eduɔ nyi sika kɔga ts&i lé sigbé kɔkpo kɔga xa. ¹⁹ Gɔmɛɖokpé egliɛ tɔ nyi atsɔɖonu ekpé xɔasi vovowotɔ. ŋkɔtɔ nyi (jaspe) evegɔn lɔ nyi (saphir) etɔngɔn lɔ nyi (lalcedoine) enɛgɔn lɔ nyi (emerode) ²⁰ atɔngɔn lɔ nyi (sardonyx) adɛngɔn lɔ nyi (sardonie) adrɛgɔn lɔ nyi( chrysolithe) enyigɔn lɔ nyi (beryl) asiɖekɛgɔn lɔ nyi (topaze) ewogɔn lɔ nyi (chrysoprase) wuiɖekagɔn lɔ nyi (hyacinthe) yi wuivegɔn lɔ nyi (amethyste. ²¹ Ehɔn wuiveɛwo nyi djenu wuivewo, ehɔn ɖeka nyi djenu ɖeka. Eduɔ mɛ mɔnwo nyi sika kɔkɔɛ ɖeɖe sigbé kɔkpo tsi yi kɔnɔn ega xa. ²² Nyɛ ŋdé kpɔ tsɔtsixɔ ɖé lé eduɔ mɛ o ɖo axuétɔ Mawu ŋtɔɛ nyi tsɔtsixɔ kudo alɛngbɔviɛ lɔ xɔ. ²³ Do eduɔ ŋdé ɖo ehian nɔn klɛnklɛn ewué kudo wluétsi tɔ o ɖo kanfu kanfu Mawutɔ ŋtɔ yi nyi klɛnklɛn nɔn eduɔ lɔ yi alɛngbɔviɛ nyi zotsi eduɔtɔ. ²⁴ Akɔtawo zɔnɔn azɔnlɛn to klɛnklɛn lɔ mɛ. éfiɔ anyigban dji tɔwo lasɔ kɔkɔɛ wotɔwo asɔ ni. ²⁵ Wo ŋda tunɔn ehɔn yétɔwo lé kédéwo. nɛnɛnké ézandodo ŋdé lio. ²⁶ Wo la sɔ kanfu kanfu kudo bubu akɔtawotɔ asɔ va yi eduɔ mɛ, ²⁷ yi enu makɔmakɔ ɖé ŋda ɖomɛ kpɔgbeɖe o. Ŋkpɛn nu watɔwo kudo amɛblétɔwo ŋda yi o. Vɔ amɛtsiwo nyikɔ yi woŋlɛn ɖo agbé woma alɛngbɔviɛ lɔ tɔ mɛ.