¹ Fifiɛlɔ, nɔviwo,mi dogbéȡa ȡo miata, bé nɛ mia Axoétɔ yo nyɔ nɛ kankan kaba yi nɛ ya kpɔ dodoȡodji, sigbé létsi yilé lé miagbɔ nɛnɛ ² yi nɛ miakpɔ katutu lé nuvuinwɔwɔ gbɔ kudo amɛ gbégbléwo domɛ. ³ Vɔ Axoétɔ lɔ nyi nutéxoé watɔ bé nɛ ya lé mi ȡo té kudo ya ȡé mi ȡa so futɔlɔ simɛ. ⁴ Mi ȡo kankanȡédji lé Axoétɔlɔ mɛ ȡo miaŋti, bé milé nutsiwo mi to nɛ mia wɔɔ, yi mila gbé waa nutsiwo kpata mi biɔ mi wo dji. ⁵ Axoétɔlɔ nɛ kplɔ mia djiwo lé Mawu lɔnlɔn kudo Kristo yo djigbɔnȡɛ mɛ. ⁶ Fifiɛlɔ nɔviwo, mi lé mia biɔɔ lé Axoétɔ Yésu Kristo yo ŋkɔ, bé mi ŋgbé nɔ kadodo mɛ kudo dɔvétɔwo o, nutsi ŋdé sɔgbé kudo ȡoȡo tsi mí xɔ so mia gbɔ. ⁷ Bohun miȡo la ȡi mi. Ðo miŋdé zɔn abé kuviɔntɔwo nɛnɛ lé mia domɛ o. ⁸ Yi mi ŋdé ȡu amɛȡé yo nuȡuȡu fata o, bohun; mi wɔ dɔ sɛnsɛnȡé zan ku kédé ȡo mia hianhianwo ŋti bé nɛ mi ŋgbé trɔ zun agban nɛ amɛȡékpé o. ⁹ Ŋdé gɔmɛ yi nyi bé mi gbé mia amɛxɔxɔ o vɔ mi wɔɛ bé mia na mi kpɔȡéŋ bé nɛ mia ȡi mi. ¹⁰ Gatsimɛ yi milé mia gbɔ lɔ, minɔnɔ toxoɔ nɛ mi: " Bé nɛ amɛȡé gbé bé yéŋda wɔ dɔ o lɔ, ŋgbé ȡu nu tsan." ¹¹ Ðo mi sé bé amɛȡéwo lé mia do mɛ wo gbé bé yéowo ŋda wa dɔ yi bohun, wo yinɔ ȡo téxoé ȡé kudo ébuwo yi nɔnɔ adjé ȡaɔ bé nɛ yéwoa kpɔ viȡé. ¹² Ké nɛnɛ yo amɛwo lɔ, milé toxoɔȡo nɔwo lé Axoétɔ Yésu Kristo yo ŋkɔ mɛ bé wo nɛ djé dɔdji bé woa kpɔ wo hianhianwo gbɔ. ¹³ Yiŋtsia nɔviwo mia djiwo ŋgbé téȡa lé nunyui wawa gbɔ o. ¹⁴ Yi nɛ amɛȡé lé tsi ŋdé lé wawaɔ ȡo nutsiwo mi to nɛ mi olɔ, mi kpɔgbɔ bé mi ŋgbé ya ȡéka kudo amɛtsɛ o. ¹⁵ Mi ŋgbé gbé hamɛ nii sigbé mia futɔ nɛnɛ, vɔ mi xotoȡo nii sigbé mia nɔvi nɛnɛ. ¹⁶ Ŋtifafa yo Axoétɔlɔ ŋtɔ nɛ na mi ŋtifafa gasiagamɛ, lé gaxoxo ȡékpékpé mɛ. Axoétɔlɔ nɛ nɔ anyi kudo mia kpata. ¹⁷ Ŋdo gbé nɛ mi, ényɛ Pɔlu, ku alɔ tsinyɛ, nɛnɛ yi nyi asidodo woma nyɛwo nɛ; nɛnɛ yi ŋ'ŋlɛnɔ nu nɛ. ¹⁸ Axoétɔ Yésu Kristo yo amɛnuvévé nɛ nɔanyi kudo mi.