¹ Pɔlu, Silvɛn, kudo Timoté, ȡoȡa Tɛsalonika yo hamɛa, lé Mawu mia Tɔ kudo Axoétɔ Yésu Kristo. ² Amɛnuvévé kudo ŋtifafa tsi so mia Tɔ kudo Yésu Kristo nɛ nɔ mia dji. ³ Mi kpɔtɔ lé akpé doɔ nɛ Mawu ȡo mia ta, nɔviwo, ȡolɔ élé djɔdjɔɛ, ȡoŋti mia xɔsé lé sinsinwɔ ȡo dji, yi amɛ ȡésiaȡé yo lɔnlɔn lé mia mɛ lé go gbankɔ ȡoȡa nɔviɛ gbɔ. ⁴ Yi ŋtɔtsan mia ŋtɔwo milé nuxo xoɔ kudo églo so mia ŋti lé Mawu yo hamɛ mɛ so mia djigbɔngbɔnȡɛ kudo xɔsé lé yomɛtsitsiwo kpata kudo nuxaxawo tsiwo milɔn xɔ ȡé akɔn. ⁵ Ðolɔ étsɛ nyi Mawu yo djési kɔtɔɛ sɔkuȡo Mawu yo djɔdjɔnyɛnyɛ djɔdjɔ, yi étsɛ ȡéfia bé mi djé nɛ Mawu yo fiɔȡuxoé tsinɛ mi kpéfun na tsan. ⁶ Elé djɔdjɔɛ bé Mawu nɛ do ŋzinzin amɛtsiwo léfun mi, ⁷ yi nɛ yafa dji nɛ mi lé mia xaxawo mɛ sigbé miawo tsan nɛnɛ, lé mia Axoétɔ Yésu yo trɔtrɔva lé yo ŋsin mɛ kudo mawodɔlawo. ⁸ Lé ézo ganȡé mɛ lɔ éla ȡo téxoé nɛ amɛtsiwo kpata ŋdé djési Mawu o yi ŋdé lé wawaɔ ȡo mia Axoétɔ Yésu yo nyanyuiɛ dji o. ⁹ Wo lakpéfun lé tsrɔntsrɔn yo tohinhin mavɔ lɔ lé Axoétɔ yo téxoé nɔnɔ godo yi lé yo djiȡuȡu yo ŋsɛn mɛ. ¹⁰ Nɛ éla va lé gbéxɔn gbé nɛ mawudɔlawo nɛ doé ȡé dji lɔ, bé nɛ amɛtsiwoé xɔ mia ȡaséȡiȡi sé lé mia mɛtsiwoé xɔɛ sé bé yéwoa kpɔɛ. ¹¹ Xɔn ŋti mi kpɔtɔ lé gbédoɔ ȡa nɛ mi, bé nɛ mia Mawua nɛ bu mi sigbé amɛtsiwo djé nɛ yo yɔyɔ lɔ énɛ, yi nɛ ya wɔ djidji nyui kudo xɔsé yo dɔwɔwɔ ȡésiaȡé lé ŋsɛn mɛ, ¹² bé nɛ Axoétɔ Yésu yo ŋkɔ ya kpɔ dodoȡédji so mia gbɔ, yi nɛ mia kpɔ dodoȡédji so gbɔ, sɔkuȡé mia Mawu yo amɛnuvévé ŋti kudo Axoétɔ Yésu Kristo tɔ.