¹ Nin nin ke mi wo tsi yi nyɔnu wo mi bɔbɔ non mia suwo; nin amɛɖe wo le wwomɛ ŋde wanon ɖo enyɔn lɔ dji tsan lɔ tɔ walɔ nyɔnu tɔ min lɔ ela se tonu san enyɔn lɔ. ² Ɖo wo la kpɔ wotɔ wo kɔkɔ mia tɔ min tɔ walɔ ashi xɔxɔ mia tɔ mɛ. ³ Mi ŋgbe nyɔn ɖo agbaŋgba kueɖa xoxo alo shika nuwo; alo enudodo alɔkpa alɔkpa o; ⁴ vɔ ayexamɛtɔ tsi yi dji ezannumaɖutɔ kugbɔngbɔn fafa ku blɛo tsi xɔ ashi le mawu wo ŋkuvi ta. ⁵ Yi nin nin nyɔnu kɔkɔɛ wo tsi we sɔ kaɖodji nan mawu wo la ze kudo nyɔnu tsi we sɔ wo ɖeki sɔ bɔbɔ non wo suwo tsan. ⁶ Nin nin Sara bunɔn Abraham nin yi yɔ nyui be axuetɔ. Mio wo nyi evi nyɔnu yetɔ gbɛ; nin mi wa ŋtsi nyɔn alo mi ŋde tsaka to vɔnvɔn mɛ. ⁷ Ŋsunon edu kudo ashio ku nunyanyan; ɖo wo nyi kpeɖoŋtɔ nyɔnu hawo ma ɖoŋsin; yi na trɔ djeshi be wowɛ nyi kpeɖo ŋtsitɔ agbeɛ nan nan tɔ. Mi wa xɔn non ŋɖe ŋgbe grɔnmon non gbe doɖa mia tɔ. ⁸ Sɔ yi dji lɔ; tamɛ bukpɔ ɖeka mɛ mia non aku ŋshishi alɔn mia nɔnnuiwo shibe enon ɖeka viwo xa yi mia senungɔnmɛ yi la sɔ mia ɖekio sɔhue. ⁹ Mi ŋgbe sɔ evui ɖo evui texue mi ŋgbe zun amɛ ɖo wo zun mio. Vɔ sɔ tovonɔnxɔna mi xoɖɛ nyi; ɖo enu xɔn ŋtsi wo yɔ mi ɖo nin keŋ gbɔxue mi la ɖo man man ɖo yayramɛ. ¹⁰ Min tsi dji la lɔn agbe yi la kpɔ azan adoduiɛ lɔ nin hin aɖe yetɔ ɖo enyɔn baɖa ŋtsi yi ya gbe hin enu yetɔ ɖo enyɔn bleamɛ wo toto ŋtsi. ¹¹ Nin djidji le enu nyannyran ŋtsi nin yawa enu adodui nin ya dji ŋtsi fafa akplɛdo. ¹² Axuetɔ ŋkuvi le amɛ djɔdjɔɛ dji yi eto yetɔ le gbedoɖa wotɔ sekɔ. Vɔ enu vui watɔ ŋde kpɔ non ŋmɛ mon axuetɔ tɔ. ¹³ Minɖe yi la do vevi ses non mi nin mi djro enu adodui la wa? ¹⁴ Vɔ non mi ɖu aya ɖo djɔdjɔɛ nyi nyi ŋtsi wo yrami. Mi ŋgbe vɔnwo yi mi ŋgbe tsakawo. ¹⁵ Sɔ yi dji a mia kɔ klisto ŋtsi; axuetɔ nyi enuveve le miwo dji wo mɛ.Ele gbesɔsɔ la xɔ gbe non amɛ tsi la buvevi donu le mawumɛ. Mi wa enu xɔwo le bɔbɔbɔ ku amɛ bubu mɛ. ¹⁶ Mi ɖo ayexa adodui non amɛ tsi we le mi zunkɔ ɖo non non mɛ adodui tsi mi ɖo le klisto mɛ yi le nuxo xokɔ sɔ mia ŋtsi shibe enubaɖa watɔ mi nyi xa wua ɖu ŋkpin. ¹⁷ Enyɔn nin nyi edjro mawu tɔ nɔn mia ɖu aya awa enu adodui hube mia wa enuvui. ¹⁸ Klisto tsan ɖu aya ɖeka non enuvuiwo; yi tsi nyi amɛ djɔdjɔɛ ;eɖu aya non miwo tsi nyi amɛ madjɔ madjɔɛ wo yi la kplɔmi sɔ yi mawu gbɔ. Yi wo hui le gbazamɛ; vɔ etrɔ sɔ gbɔngbɔn le agbe. ¹⁹ Legbɔngbɔn mɛ; evɛ nu enyɔn non gbɔngbɔn tsi we legakpamɛ wo. ²⁰ Tsi we ŋde se tɔ nu gatsimɛ mawu wo gbɔngbɔn xɔ xɔle te le azan Noe tɔ gbe yi tsi yi dja gban tɔdji huɔn lɔ. Xɔ yi mawu rlɛn akɔta vitunkui eklan amɛnyi le eshimɛ. ²¹ Exɔn yi nyi kpɔɖoŋtsi nyronnyron ɖo tɔmɛ tɔ tsi la rlɛn mi ɖagbe vɔ ŋde kɔklɔ gbaza tɔ yɔ vɔ tsi nyi enu adodui wawa ɖaɖa mawu gbɔ non fɔn soku Jesu klisto tɔ. ²² Yi le ɖushi xue non mawu sɔ gatsimɛ yi eyi djiŋkushi yi dɔlawo atsɛkpakpatɔwo kudo ŋsin wo kekeŋ bɔbɔ nyi.