¹ Amɛshiamɛ tsi xɔɛse bé Yesu yí nyí Kristo lɔ, wó dji so Mawu mɛ. Amɛshiamɛ tsi yí lɔn étɔ lɔ, élɔn mɛ tsi yí wódji so étɔ lɔ mɛ. ² Le éxɔn mɛ mi nyá bé mi lɔn Mawu viwó, nɛ mí lɔn Mawu, yí mí sɔ yo séɛwó do dɔwoawoa mɛ. ³ Ðo nú yí ŋti lɔ, Mawu yó lɔnlɔn yí nyí bé woalé wó sélɔwó mɛ ɖo ashi; yí yó séɛwó ŋdé vé o. ⁴ Ðo nú yí ŋti lɔ ameshiamɛ tsi wó dji só Mawu mɛ lɔ, éȡu xixéɛ dji. Nú tsi mi sɔ ȡu xixéɛ dji lɔ, yi nyi miá xɔsé. ⁵ Mɛȡé yí nyi mɛtsi yí ȡu xixéɛ dji, nɛ ŋdé nyi mɛ tsi yí xɔɛsé bé Yesu yí nyí Mawu vi o? ⁶ Yesu tsɛ yí vá kú eshí kú ehun; ŋdé nyi kúdo eshi ȡeȡe kpo vɔ kúdo eshi kú ehun. ⁷ Ðo énú amɛtɔn yí ȡí ȡase só yíŋti : ⁸ gbɔngbɔn, eshi kúdo ehun, yí wó ametɔn wó woa ȡeká. ⁹ Nɛ mi le amɛgbétɔ yio ȡaséȡiȡi xɔ lɔ, Mawu yó ȡaséȡiȡi klo wú. Ðo Mawu yó ȡaséȡiȡiɛ yí nyí bé : éȡi ȡasé só viɛ ŋti. ¹⁰ Mɛ tsi xɔ Mawu viɛ dji se lɔ, éxɔ ȡaséȡiȡi tsɛ do yéȡoki mɛ; mɛ tsi ŋdé xɔ Mawu dji sé o lɔ é sɔ Mawu sɔ wɔa adjéȡatɔ, ȡo ŋdé xɔ ȡasé tsi Mawu ȡi ȡó viɛ ŋti dji sé o. ¹¹ Ðaséȡiȡi lɔ, yí nyí bé Mawu na mi agbe mavɔ, yí agbe mavɔtsɛ lɔ le eviɛ mɛ. ¹² Mɛtsi shi éviɛ le lɔ, agbe leshi, mɛ tsi shi Mawu viɛ ŋdé le o lɔ, agbe ŋdé leshio. ¹³ Wó ŋlui nutsɛwó nɔn mi nɛ miá nyá bé agbe mavɔ le miashi, miɔnwó amɛtsiwó xɔ Mawu viɛ ŋkɔ dji se. ¹⁴ Kánkánȡodji tsi le miashi le yɛ mɛ yí nyí bé nɛ mi biɔ ŋȡé kpikpi le yó lɔnlɔnnu mɛ a éseni nɔn mi. ¹⁵ Nɛ mi nya bé éle to ȡoɔ mi le nútsi biɔ mi le lɔ, mi nya bé nu tsiwo keŋkeŋ biɔ mi le lɔ esun nɔn miashi. ¹⁶ Nɛ amɛȡé kpɔ nɔnviɛ woa nuvɔn tsi lá kplɔɛ yi kú mɛ lɔ, é lado gbeȡa yi Mawu lá na agbe nɔnvi xɔn. Nɛnɛ é le nɔn amɛshimɛ tsi yó nuvɔn ŋdé kplɔɛ yi kú mɛ o lɔ. Nú vɔn ȡe le tsi kplɔnɔn amɛ yi kú mɛ. ŋdé nyi só núvɔn xɔn ŋti ŋ biɔ só mia gbɔ bé mi ádógbeȡá na o. ¹⁷ Sédjidada ȡeshiaȡé lɔ nuvɔn woawoa yɔ. Núvɔn ȡé li tsi ŋdé kplɔ na mɛ yi kú mɛ o. ¹⁸ Mi nya bé amɛshiamɛ tsi wó dji le Mawu mɛ lɔ ŋdé woanɔn núvɔn. Yí mɛtsi wó dji le Mawu mɛ lɔ, Mawu kpɔ nɔn wó dji le vɔnȡitɔ yó ŋkúmɛ yí vɔnȡitɔ ŋda teŋ tɔ alɔ wó o. ¹⁹ Mi nyá bé Mawu mɛ mi só, vɔ xixéɛ mɛ keŋkeŋ le abosanŋ yó ŋsɛn gɔmɛ. ²⁰ Vɔ mi nyá bé Mawu viɛ vá, yí yi na mi núnyan bé miadjeshi nyawótótó lɔ, yí mi le nyawótótóɔ mɛ le viɛ Yesu Kristo mɛ. Mɛ tsi nyí Mawu nyɔntéxoétɔ kúdo agbemavɔ. ²¹ Ðéviwó mi nɔn azɔgé, nɔn vodúwó (légbáwó).