¹ Lɔnlɔntɔwó, míŋgbe xɔ gbɔngbɔnwó keŋkeŋ djise o, mí do gbɔngbɔnwó kpɔ, nɛ miá nyan tsi só Mawu gbɔ; nyɔnudaȡɛtɔwó adjeȡatɔwó wó géȡo xixɛ mɛ. ² Xixéɛ mɛ mí la djeshi Mawu yio gbɔngbɔn le; ³ yí tsi nɛ ŋdé hun mɛ bé, Yesu so Mawu gbɔ o lɔ, gbɔngɔbn tsi nyi Kristo yio futɔ, tsi mi sé yio vava, tsi le xixéɛ mɛ xoxo vɔ. ⁴ Mí nyi Mawu tɔ, éviɛ vévéwo, yí mí ȡu gbɔngbɔnxɔnwó dji, ȡo mɛtsi le miá mɛ lɔ e wúgan mɛ tsi le xixéɛ mɛ. ⁵ Gbɔngbɔnxɔnwó nyi xixeɛ mɛtɔ, yɛŋti lɔ enú tsio keŋkeŋ wó to nɔn lɔ nyi xixe tsɛ mɛ tɔ, yí xixeɛ ȡo eto wó. ⁶ Mi nyi Mawu tɔ, mɛ tsi djeshi Mawu lɔ, eȡo nɔn éto mí. Le xɔn mɛ lɔ, mi do djeshi nyawotótó yio gbɔngbɔn, nyawomatómató yio gbɔngbɔn. ⁷ Lɔnlɔntɔwó, mí lɔn miá nɔnnuiwó, ȡo Mawu nyi gbɔngbɔn, améȡeȡekpikpi tsi woanɔn lɔnlɔn núwó lɔ, wó dji le Mawu mɛ, yi djeshi Mawu nyaó nyaó tɔ. ⁸ Mɛ tsi ŋdé lɔn na amɛ o lɔ, ŋdé djeshi Mawu o, ȡo Mawu nyi lɔnlɔn. ⁹ Eyɛ mɛ Mawu ȡé yio lɔnlɔn fia mi le, yi dɔn eviɛ akoŋgo ȡoȡa xixeɛ mɛ, bé né mian nɔn agbe tó yɛ mɛ. ¹⁰ Etsɛ mɛ yi lɔnlɔn lɔ le : ŋdé nyi miɔnwó yí lɔn Mawu o, vɔ lɔ yɛ yí lɔn mi, í ȡo eviɛ ȡoȡa, shigbe vɔsa nɛnɛn ȡo mian núvɔnwó ta. ¹¹ Lɔnlɔntɔwó, nɛ Mawu lɔn mi lɔ, miɔn tsan mi ȡo lá ȡo lɔnlɔn nɛ mian nɔnuiwó. ¹² Amɛȡe ŋdé kpɔ Mawu kpɔ. Nɛ miɔn mi ȡo lɔnlɔn nɔn mian nɔnuiwólɔ, Mawu yió lɔnlɔn lá nɔn mia mɛ, yí lɔnlɔn xɔn la de blébu le mian mɛ. ¹³ So xɔn ŋtsi lɔ, mi la nya bé mi le mɛ, yí yɛ tsan le mian mɛ, nutsi ŋtsilɔ ená mi yio gbɔngbɔn. ¹⁴ Yi mi kpɔ, mi ȡo kanȡodji bé mian tɔ lɔ éȡo éviɛ ȡoȡá nɛ ya va xɔnɔn mi le xixeɛ mɛ. ¹⁵ Mɛ tsi hu mɛ bé Yesu nyi Mawu yio ví lɔ, Mawu lá nɔn mɛ, yí yɛ tsan la nɔn Mawu mɛ. ¹⁶ Yí mi djeshi lɔnlɔn tsi Mawu sɔ lɔn mi, yí mi xɔ lɔnlɔn xɔn dji se. Mawu nyi lɔnlɔn, mɛ tsi le lɔnlɔn mɛ lɔ, ele Mawu mɛ, yí Mawu tsan le mɛ. ¹⁷ Nɛnɛ lɔnlɔn lɔ de blibo le mian mɛ nɛ, ȡo mi ȡo kanȡodji blibo bé le kodjosósó yó ŋkekeɛ dji lɔ, shigbe letsi yí le nɛnɛ lɔ, nɛnɛ ké miɔnwó tsan mi le xixeɛ mɛ. ¹⁸ Vɔnvɔn ŋdé le lɔnlɔn mɛ o, vɔ lɔnlɔn tsi le blibo lɔ, éȡé nɔn vɔnɔvɔn djo, ȡo lɔ vɔnvɔn le shigbe bé todɔndɔn nɛnɛn. Mɛtsi vɔn nɔn lɔ, lɔnlɔn ŋdé le blibo le mɛ o. ¹⁹ Mi lɔn na mɛn, ȡo Mɔwu lɔn mi tútúgbɔn. ²⁰ Nɛ amɛȡé tó bé : yé lɔn Mawu vɔ ŋdé lɔn nɔnviɛ o lɔ, núsúkantɔ yí nyi; mɛ tsi ŋdé lɔn nɔnviɛ tsi kpɔ yi leo lɔ, lé yi la teŋ lɔn Mawu tsi ŋdé le kpɔkpɔwɔ lɔ? ²¹ Yí mi xɔ esé tsɛ só egbɔ bé amɛ tsi yí lɔn Mawu lɔ éȡo lá lɔn nɔnviɛtsan.