¹ Jich yu'un, ya me sk'an jtsajtaybatik jich me mayuk mach'a ya xch'ay jilel a te k'alal ya yich' tael te beluk yaloj te Diose, te ijk'teybil ta jwentatik te yakuk x-ochotik ta bay te ich' lewa yu'un te Diose. ² Melel la jkich'tikix albeyel te lek yach'il k'ope, jich nix te bit'il la yich' alel ta stojolike. Jauk me to mayuk sk'oplal bajt' yu'unik te mach'atik la yaiyik stojol te sk'ope, melel ma la xch'uunik jich bit'il te mach'atik la xch'uunik te mantale. ³ Melel te jo'otike, te mach'a jch'uunejtikix te mantalile ya me x-ochotik bael ta banti ya jkich'tik te lewae, jich bit'il yaloj: "TE K'ALAL ILINEMON A, LA JKAL TA JAMAL, MAYUK BIN ORA YA XJU' X-OCHIK TA BAY ICH' LEWA JKU'UN.'' Jauk me to, te Diose laj yot'an ta at'el te k'alal laj yot'an ta spasel te balumilale. ⁴ Melel ay banti ts'ibubil ta sjun te Dios te jich ya yal ta swenta te sjukebal k'aale: ''TE DIOSE LA YICH' LEWA TA SPISIL YAT'EL TA SJUKEBAL K'AAL.'' ⁵ Jich la yal ta yan buelta: ''MAYUK BIN ORA YA X-OCHIK TA BAY ICH' LEWA JKU'UN.'' ⁶ Melel, ay to sk'an te ya x-ochik cha'ox tul ta ba ay te ich' lewae, jauk me to ay bayal te israelitaetike, te la yaiyik stojol te lek yach'il k'op ta sneelal toe, ma ba ochik stukelik ta skaj te la xk'axinteyik te mantale, ⁷ Te Diose la slebey yan buelta sk'alelal te jich la yalbey sbiile: ''YOTIK TO.'' K'axemix bayal k'aal te k'opoj ta swenta te Davide, jich te bit'il albil ta sneelal toe: ''YOTIK TO TEME YA AWAYBEYIK STOJOL TE SK'OPE, MA ME TULANUK AWAK'IK TE AWOT'ANIKE.'' ⁸ Te jauk la yak'beyex awich'ik lewa te Josueje, te Diose ma ba la slebey yan sk'alel te jichuke. ⁹ Jauk me to ay to jun k'aal yu'un te ich' lewa te k'ejbil xan yu'un te slumal te Diose. ¹⁰ Melel te mach'a ya x-och ta bay ich' lewa yu'un te Diose, janix jich ya yich' lewa yu'un te yat'elike, jich bit'il la yich' lewa te Diose. ¹¹ Jich yu'un, yakuk me jk'antik te ya x-ochotik ta bay te ich' lewae, swenta yu'un mayuk mach'a ya xyal te bit'il yalik te yantik yu'un te ma la xch'uunik te mantale. ¹² Melel te sk'op te Diose kuxul sok bayal yip stukel, sok k'axem to xan ya xbojwan te bit'il espada te cha' mejch' yee. Ja in to ya x-och bael ja to k'alal ya set' k'axel te ch'ulelale sok te espíritue sok ta k'alal yutil te baketike. Ya xju' yu'un ya sna' te beluk ya snop ta sjol sok te beluk ya sk'an ya spas te ants-winiketike. ¹³ Melel mayuk te beluk pasbil te mukbil ta stojol te Diose. Jauk me to, spisil jamal ya yil ta sit stukel te mach'a ya xk'o jkak'beytik kuenta te jkat'eltike. ¹⁴ Jich yu'un, ay muk' sacerdote jku'untik te mach'a baem ta ch'ulchane, ja te Jesús te snich'an te Diose, junuk me jkot'antik te bit'il yakotik ta xch'uunele. ¹⁵ Melel te jo'otike mayuk muk' sacerdote jku'untik te ma sna'botik jkolilbatik yu'un te teb jtaeltike. Yan bi ay sacerdote jku'untik te la yich' ilbel yot'an jich bit'il te jo'otike, jauk me to ma la sta smul stukel. ¹⁶ Jich yu'un noptsajukotik bael sok smuk'ul jkot'antik ta smuk'ul snaktijib te Dios te bayal yutsilal stukele, jich ya jkich'tik k'uxtayel yu'un, sok ya jtatik yutsil yot'an yu'un te k'alal ay jwokoltike.