TE JESUSE JA MUK' YU'UN TE MOISESE. ¹ Jich yu'un, jkermanotak te ch'ultesbilexe, te ja'exe jun pajal ik'bilatik yu'un te Jkajwaltike. Ja me ya xbajt' ta awot'anik ta sna'uleyel te Jesuse, te ja muk' wolwanej puk k'op sok te ja muk' sacerdote yu'un te beluk jch'uunejtike. ² Melel ja jun yot'an ta stojol Dios te ja tsaot yu'une, jich te bit'il Moises te jun yot'an la yak' sba ta abatinel ta sna te Diose. ³ Melel te Jesús la yich' ak'beyel bayal xan yutsilal a te bit'il te Moisese, melel te mach'a ya spas te wol nae k'ax jich ya yich' ak'beyel yutsilal a te bit'il te nae. ⁴ Melel spisil te naetik te pasbile ay mach'a spasoj, jauk me to te mach'a spasoj spisile ja te Diose. ⁵ Jich te Moisese jun yot'an la yak' sba ta abatinel ta sna te Diose. Ja la yalbey sk'oplal te beluk ya yich' alel te pajel chaweje. ⁶ Jauk me to te Cristo ja Nich'anil te ak'bil swentain te sna te Diose. Te jo'otike ja snaotik k'oem, teme jun jkot'antik ta xch'uunele sok te smuk'ul jkot'antik te stalel aye. ⁷ Ja swentail, te Ch'ul Espíritu te jich ya yale: ''YOTIK TO, TEME LA AWAYBEYIK TE SK'OPE, ⁸ MA ME ATULANTESIK TE AWOT'ANIKE JICH BIT'IL LA SKONTROINONIK TE ACHICHMAMIKE, TE K'ALAL YORAIL TE YILJIBAL YOT'ANIK TA TAKIN JOCHOL K'INALE. ⁹ JA K'OT TA PASEL YU'UN TE ACHICHMAMTAK TE LA YILBONIK JKOT'ANE, SOK TE LA YILBONIK TE JKAT'EL CHA'WINIK (40)JA'WILE. ¹⁰ JICH YU'UN, TE JO'ONE BOLOB JKOT'AN TA STOJOL TE ATS'UMBALIKE. JO'ON LA JKAL: ''SPISIL ORA JOWEJEM TE YOT'ANIKE. MA LA SNA'BONIK TE JBEE." ¹¹ JICH K'OT TA PASEL TE BELUK K'AXEL LA JKAL TE K'ALAL ILINONE: "MAYUK BI ORA YA X-OCHIK TA BAY ICH' LEWA JKU'UNE.'' ¹² Tsajteya me abaik, jkermanotak, mayuk me mach'a ay ta awolilik te mayuk xch'uunjel yot'anike, te ya sk'esbaik lok'el ta stojol te kuxul Diose. ¹³ Jauk me to, jech muk'tesbey abaik awot'anik ta jujun k'aal, jich bit'il albil, ''YOTIK TO''; swenta yu'un ma me ayuk mach'a ya xtulnaj yot'an ta skaj te lo'layel yu'un te mulile. ¹⁴ Melel k'atbujotikix ta sjoy te Cristoe, teme k'axel jun jkot'antik ta stojol jich bit'il ta xjajch'ibale, jich nix ta slajibal. ¹⁵ Ja ta swenta te jich albil jilele: ''YOTIK TO, TEME LA AWAYBEYIK STOJOL TE SK'OPE, MA ME TULANUK YA AWAK'IK TE AWOT'ANIKE JICH BIT'IL TE LA SKONTROINONIK TE ACHICHMAMIKE.'' ¹⁶ ¿Mach'a te la yaiybey stojol sk'op te Dios te patil la skontroinike? ¿Ma ba jaukik te mach'atik lok'ik tel ta Egipto ta swenta te Moisese? ¹⁷ ¿Mach'atik a te cha'winik ja'wil ilinem te Dios ta stojolike? ¿Ma ba jauk ta stojol te mach'atik la sta smulik te lajik jilel ta takin jochol k'inale? ¹⁸ ¿Mach'atik a te k'axel la yich'ik albeyel te ma x-ochik ta bay te ich' lewa yu'une, ma ba jaukik te mach'atik la sk'axintayik mantale? ¹⁹ Le' ya jkiltik a te ma ju' yu'unik ochel ta bay te ich' lewa yu'un te Kajwaltike ta skaj te ma la sk'anik xch'uunike.