PABLO AY TA ÉFESO ¹ Te k'alal ay ta lum Corinto te Apoloe, te Pablo yak ta k'axel ta sjoylejal sk'inal te muk'ul lumetike, jich ak'ot ta bay lum Éfeso sok le' la sta cha'ox tul a te nopojeletike. ² Te Pablo jich la yal: "¿La bal awich'ik te Ch'ul Espíritu te k'alal la ach'uunike?" jich la sutik: "Ma la jkich'tik, te jo'otike ma jkaiyojbeytik sk'oplal te beluk a te Ch'ul Espíritue." ³ Te Pablo jich la yal: "¿Mach'a ta swenta te ich' ja' te la awich'ike?" Jich la yalik: "Ja te bit'il la yak' ich' ja' te Juane." ⁴ Jich la sut te Pabloe: "Te Juane la yak' ich' ja' ta swenta te yakuk sut yot'antike. Ja la yalbey te ants-winiketik te ya me sk'an xch'uunik te mach'a ya xtal ta patilale, ja bi ja te Jesuse." ⁵ Te k'alal la yaiyik stojol te ants-winiketik spisil in to, la yich'ik ja' ta swenta sbiil te Jkajwaltik Jesuse. ⁶ Jich yu'un te k'alal la skajan sk'ab te Pablo ta stojolik, te Ch'ul Espíritu tal ta stojolik sok kajik ta k'op ta yantik k'opetik sok kajik ta yalel te sk'op te Diose. ⁷ Ay lajchay tul winiketik te k'ot ta stojolike. ⁸ Te Pabloe och bael ta bay te sinagoga, oxeb u te ma ba xiw k'opoj le'a, la yaiy bijteswanej sok la xcholbey te ants-winiketik te bit'il ay sk'oplal te ajwalinel yu'un te Diose. ⁹ Jauk me to ay cha'ox tul judioetik te la stulantesik te yot'anike sok ma la sk'an xch'uunik, jajch'ik ta sbol-k'optayel ta stojol te ants-winiketik te mach'atik la xch'uunikix te Cristoe. Jich te Pablo te k'alal la yaiy stojol te beluk la yalike ma la sk'an sjoin sbaix sok, jich la yijk'tey jilel, k'ejel la yik' bael te mach'a la xch'uunike. Kaj ta snojp'tesel ta jujun k'aal ta bay te snail te nop june te le' ya yaiy nojp'teswanej a te tul winik te Tirano sbiile. ¹⁰ Jich k'ot ta pasel cheb ja'wil, swenta yu'un spisil te mach'atik te kuxinemik ta sk'inal Asia te yakuk yaiyik stojol te sk'op te Jkajwaltike, te Judioetik sok nix te Griegoetike. ¹¹ Te Diose la yak' ta ilel yu'el ta stojol te Pabloe, ¹² ja yu'un te xchuk'il sok te xchujch'ut' te lapbilix yu'une, ya yich'beyik bael ta stojol te mach'atik ayik ta chamele jich ora nax ya xlekubik jilel sok ya xlok'ik bael te bol espírituetik ta stojolik. ¹³ Jauk me to ay cha'ox tul te judioetik te yakalik ta k'axel ta jujun pam lum, ta slok'esel te pukujetike. Ja ya stuuntesbeyik te sbiil te Jesús swenta yu'un jich ya yich'ik yu'elik ta slok'esel a te pukujetike, te k'alal ya yalike: "Ta swenta sbiil te Jesús te ya xcholbey sk'oplal te Pabloe, ya jkalbat mantal te ya xlok'at bael." ¹⁴ Te mach'atik jich la spasike ja te juk tul te snich'nab te wolwanej sacerdote yu'un te judioetike te ja sbiil Esceva. ¹⁵ Te bol espíritue jich la sut: "Te Jesús ya jna'bey sba, sok nix te Pabloe; jauk me to ¿mach'aatik a te ja'exe? ¹⁶ Te winik te ay pukuj ta yot'ane wiltel ta stojolik te mach'atik yakik ta slok'esel te pukujetike sok la yich'ik tsakel sok bayal majel la yich'ik yu'un. Jich yu'un lok'ik bael ta anel ta bay te nae, t'anatik lok'el sok exnajemik bael. ¹⁷ Spisil pujk' bael te beluk k'ot ta pasele, la yaiyik stojol te Judioetike sok nix te Griegoetik te nainemik ta bay lum Éfeso. Bayal xiwik yu'un ta spisilik, jich kajik ta yich'el ta muk' te sbiil te Kajwaltik Jesuse. ¹⁸ Janix jich bayal te ch'uunjeletik tal xcholik te smulik swenta yu'un jich ya yalik ta jamal te beluk ma lekuk spasojike. ¹⁹ Bayal te mach'a yat'elinej spasel te beluk chajp'nax ta ilele, la yich'ik tel te jun te bay la snopik spasel spisil in to sok kajik ta xchik'el ta stojol te ants-winiketike. K'alal kaj yajteyik te jayeb stojol te junetike, ja lok' lajuneb yoxwinik ta mil (50,000)ta sejp' te platae. ²⁰ Jich yu'un te sk'op te Kajwaltik pujk' bael melel la yilik te ay yu'ele. ²¹ Te k'alal ts'akajix ta spasel te at'elil yu'un te Pablo te ak'bot yu'un te Jkajwaltik ta lum Éfeso, te Pabloe la snop ta yot'an te ya xk'ax ta bay sk'inal Macedonia sok ta bay sk'inal Acaya melel ya xbajt' ta Jerusalén; jich la yal: "Teme la jkot'an k'axel le'a, ya xboon ta bay lum Roma." ²² Te Pablo la stikun bael ta bay Macedonia te Timoteo sok te Erasto te ja cheb nopojeletik yu'un, ja te sjo'tak ta at'ele. Yan stukel jil ta bay sk'inal Asia jun chebuk k'aal. ²³ Janix jich ora jajch' muk'ul k'op yu'unik te mach'atik ch'uunjeletik ta bay lum Éfeso. ²⁴ Ja la sjajch'es k'op te tul winik te Demetrio sbiile te ja ya x-at'ej ta spasel te platae, ja ya spas te lok'ombaetik yu'un te yaj kananik te Diana sbiile, ja la yak'bey yat'el te mach'atik ya x-at'ejik ta plata. ²⁵ Jich la stsob spisil te yaj at'el sok jich la yalbey: "Winiketik, ja na'ojik me te bayal tak'in jlok'ejsotik a te banti yakotik ta at'ele. ²⁶ Te ja'exe awilojikix sok awaiyojik stojol, te ma jauk nax ta bay lum Éfeso sok nix ta bay sjoylejal sk'inal te Asia, te Pablo yak ta stak'uyel sok yak ta yik'el bael bayal ants-winiketik te ya yalbey te ma ba dios te pasbilik ta sk'ab te ants-winiketike. ²⁷ Sok ma ba janax ay jwokoltik yu'un teme la jch'aytik te jkat'eltike, janix me jich uuk te templo yu'un te muk' antsil dios Diana, mayuk me sk'oplal ya xk'ot. Jich yu'un ya me xch'ay te muk' sk'oplale, te ja ich'bil ta muk' ta spisil sk'inal Asia sok ta spamal balumilal." ²⁸ Te k'alal la yaiyik stojol spisil in to, lijk'sjolik ta bayal sok kajik ta aw, jich la yalik: "¡Ja muk' stukel te Diana yu'un te Éfesioetike!." ²⁹ Ta spamal te lume ma la sna'ik te beluk ya spasike, bajt'ik ta ora nax ta bay yawil muk'ul tsoblej. Yu'un stsakojikix a te sjoytak ta beel te Pabloe, ja te Gayo sok te Aristarco, te talemik ta bay Macedonia. ³⁰ Te Pabloe k'anuk och sk'opon te tsobol ants-winiketike, jauk me to la yich' komel yu'un te nopojeletike. ³¹ Janix jich la yich' tikunbeyel k'op yu'un te cha'ox tul sjo'tak te Pabloe te yich'ojik yat'elik ta bay sjoylejal sk'inal Asia te manchuk ya xbajt' ta bay te muk'ul yawil te tsobleje. ³² Ay cha'ox tul te ants-winiketik te kajik nax jich ta awe, melel ma la sna'ik te beluk ya spasike. Bayal ta tul te ma sna'ojik te beluk la yich'ik ik'el ta tsobleje. ³³ Ay cha'ox tul te judioetik te la stenik k'axel te Alejandro yu'un yakuk xk'opoj ta stojolik, jich te Alejandro la spasbey senyail sk'ab te yakuk xkomik ta k'op swenta jich ya xchol a te beluk k'ot ta pasele. ³⁴ Jauk me to te k'alal la sna'ik stojol te ja judio winik, spisilik majnax kajik ta aw, cheb ora jalajik ta yalel: "¡Ja muk' stukel te Diana yu'un te Éfesioetike!" ³⁵ Jich te secretario yu'un te lume k'alal la skom te ants-winiketike, jich la yal: "Winiketik yu'un Éfeso, ¿Mach'a ants-winik te le' ay ta bay lum te ma sna'oj te ja jkanantik te muk' antsil dios Diana sok te ja slok'omba te koem tel ta ch'ulchane? ³⁶ Jpisiltik ya jna'tik stojol, ya me jk'an te lamaluk nax ayexe sok mayuk me beluk ya awalik janix jich ma me jowiluk nax te beluk ya apasike. ³⁷ Melel te winiketik te la awik'ik tel le' to ma elek'etik yu'un te temploe sok ma yakik ta sbol k'optayel te muk' antsil dios jku'untike. ³⁸ Jich yu'un, te Demetrio sok te mach'atik sjo'tak ta pak'jome teme ay beluk ya sk'anik chajp'anel yu'une aka bajt'ukik ta stojol te chajp'anwanejetike sok aka sk'oponik. Jich me ya stak' ya skoltey sba ta tulutul. ³⁹ Yan teme ya ak'anik awalik xan yantik k'opetike, ya me sk'an te ya yich' chapel ta komon tsoblej. ⁴⁰ Melel ya me stak' jkich'tik tsakel yu'un te beluk k'ot ta pasel ta ora to. Mayuk me beluk ya stak' jkaltik yu'un teme la jkich'tik jojk'ibele." ⁴¹ Te k'alal laj yot'an ta k'op, la stikum bael te ants-winiketike.