TE MUK'UL TSOBLEJ TA JERUSALÉN ¹ Ay cha'ox tul winiketik te k'otik ta bay Antioquía te talemik ta Judea, tal yak'bey snopik te jkermanotaktik, te jich la yalike: Puersa me ya sk'an awich'ik circuncisión ta abak'etalik jich bit'il la yal mantal te Moisese, teme ya ak'anik te ya xkolex ta sbajt'el k'inale. ² Jauk me to te Pablo sok te Bernabé ma ba jich ya snopik te bit'il te winiketike, jich kajik ta stsakbel sbaik ta k'op, jalajik ta yaanel, te ch'uunjeletik te ayik ta Antioquía la stsaik te Pablo sok te Bernabé sok xan yantik jkermanotaktik te ya xbajt'ik ta Jerusalén swenta yu'un ya xba sjojk'ibeyik te wolwanej puk k'opetik sok te ancianoetik te bit'il ay te k'op ayeje. ³ Jich la yich'ik tikunel bael yu'un te ch'uunjeletik ta lum Antoquía. K'axik bael ta sk'inal Fenicia sok ta sk'inal Samaria, k'ax yalbey yaiyik te jkermanotaktik te bit'il ay tsobol ta tul te yan lumetik te la sujt'esikix yot'anik ta stojol te Diose, spisil te jkermanotaktike binub nax yot'anik yu'un. ⁴ Te k'alal k'otik ta lum Jerusalén te Pablo sok te Bernabé, te ch'uunjeletik te stsoboj sbaik sok te wolwanej puk k'opetik sok te ancianoetike, binax yot'anik la yik'ik ta stojolik. Jich te Pablo sok te Bernabé jajch' yalbey yaiyik spisil te beluk la spas te Dios ta stojolik. ⁵ Jauk me to ay ch'aox tul te fariseoetik te xch'uunejikix te Jesuse, la stejk'an sbaik, jich la yalik: "Puersa me ya sk'an te ya yich'ik circuncisión te mach'atik yan lumetike sok puersa ya jkalbeytik mantal te ya yat'elinik spasel spisil te beluk ya yal te mantaliletik yu'un te Moisese." ⁶ Jich yu'un la stsob sbaik te wolwanej puk k'opetik sok te ancianoetik ta snopel jai ayej to. ⁷ Te k'alal jalajikix ta yaanel a, la stejk'an sba jajch'el te Pedroe, Jich la yal: ''Jkermanotak, te ja'exe ja na'ojik stojol te Dios la stsaon ta awolilik yu'un ya xba cholbey te lek yach'il k'op ta stojol te mach'atik ma jauk jlumaltike, jich me ya xch'uunik uuk. ⁸ Jich te Dios te sna'ojbotik jkot'antik ta jpisiltik, te la yak' ta ilel te xk'uxul yot'an ta stojol te yan lumetike, ta swenta te la yak'bey yik'ik ta yot'anik uuk te Ch'ul Espíritue jich bit'il te jo'otike; ⁹ Pajal jkileltik la yilotik sok te mach'atik yan lumetike. Jich la spasbey perdón yu'un smulik uuk ta swenta te bit'il la xch'uunike. ¹⁰ Jich yu'un, ¿bistuuk ya awilbeyik yot'an ta ora to te Diose, te ya awak'bey yijk'ats ta xch'uunel te nopojeletik te beluk ma ju' jku'untik xch'uunel sok uuk te jme'-jtatike? ¹¹ Jauk me to jch'uunejtik te la jkich'tikix koltayel yu'un jmultik ta swenta nax yutsil yot'an te Jkajwaltik Jesuse, jich te bit'il la yich'ikix koltayel uuk te yan lumetike." ¹² Jich ch'abik ta k'op ta spisilik te mach'atik stsoboj sbaike sok la yaiybeyik stojol sk'op te Bernabé sok te Pabloe te k'alal la xcholik te bit'il Dios la spas senyailetik sok chajp' at'eliletik ta swentaik ta stojol te mach'atik yan lumetike. ¹³ Te k'alal laj yot'anik ta k'op, jajch' ta k'op uuk te Jacoboe(Santiago): ''Jkermanotak, aiybon awaiyik stojol te beluk ya jkalbeyexe. ¹⁴ Te Simone la xcholbotikix jkaiytik te bit'il Dios la skoltay te mach'atik yan lumetike, swenta yu'un jich lum ya xk'ot uuk. ¹⁵ Janix jich ts'ibubil yu'unik te alwanejetik yu'un te Diose te jich la yale: ¹⁶ '' YA ME XCHA' TALON, SOK YA ME JCHA' JPAS XAN TE SNA DAVID TE JINEME; YA ME JACH MOEL SOK YA ME JLEKTES TE BELUK JINEM YU'UNE, ¹⁷ SWENTA YU'UN YA ME SLEIK TE JKAJWALTIK TE MACH'ATIK JILEMIK XANE, SOK TE YAN LUMETIK TE IK'BILIK TA JBIILE." ¹⁸ Jich la yal te Jkajwaltik te yak'ojix ta na'el stojol spisil in to ta namey k'inal. ¹⁹ Jich yu'un, te ya jkal te jo'one, ma me jmakbeytik sbe te mach'atik yan lumetike, te ya sujt'es yot'anik ta stojol te Diose. ²⁰ Janax aka jts'ibubeytik bael jun te ya jkalbeytik te ma me sti'ik ti'bal te ma lekuk k'oem sk'oplal ta swenta smajt'an te lok'ombaetike, sok te ma me yaiyik mulwej, sok te ma sti'beyik sti'balul te chambalam te ts'otbil nax snuk' te milbile, sok te ma slajinik te xch'ich'ele. ²¹ Melel ta namey k'inal ay ta alel ta stojolik te jujun lumetik te mantaliletik yu'un te Moisese, sok ya yich' ilel te mantalil ta bay sinagogaetik ta jujun sk'alelal ich' lewa. ²² Jich yu'un lek la yaiyik te wolwanej puk k'opetik sok te ancianoetik sok spisil te ch'uunjeletike, jich la stsaik bael te Judas te yan sbiil Barsabás sok te Silas, te ja wolwanejetik yu'un te ch'uunjeletike, swenta yu'un te ja ya sjoinik bael te Pablo sok te Bernabé ta Antioquía. ²³ Jich yu'un la sts'ibuyik te june te jich ya yale: ''Jkermanotak ja'ex te yan lumexe, te ayex ta lum Antioquía sok ta sk'inal Siria sok ta sk'inal Cilicia ya jpatbeyex awot'anik, jo'otik te wolwanej puk k'opetik sok te ancianootik sok te tsobol te ch'uunjeletike. ²⁴ La jkaiytikix stojol te ay cha'ox tul winiketik te jajch'emik bael le' to, te ma tikunbilik bael jku'untik te la yak'beyex amel-awot'anik yu'un te beluk la yak'batik anopik sok te la ya'an awot'anik yu'une. ²⁵ Jich yu'un la jchaptik te ya jtikuntik bael jkermanotaktik ta atojolik yu'un ja ya sjoin bael te jkermanotaktik Bernabé sok Pablo te bayal k'ux ta jkot'antike, ²⁶ te ja yak'oj sbaik ta lajel ta swenta te Jkajwaltik Jesucristoe. ²⁷ Jich yu'un la jtikuntik bael te Judase sok te Silase, janix me ya yalbeyex awaiyik spisil te beluk la jts'ibuytik baele. ²⁸ Melel ja lek la yaiy te Ch'ul Espíritu sok janix jich jkot'antik uuk te mayuk yan mantalil te ya jkak'beyex ach'uunike, janax te banti tulan sk'oplale: ²⁹ Ma me xa ti'ik ti'bal te ma lekuk sk'oplal k'oem ta swenta te smajt'an te lok'ombaetike, te xch'ich'ele sok ma me sti'beyik sti'balul te chambalam te ts'otbil nax snuk' te milbile, ma me awaiyik mulwej. Teme ya akom abaik ta spasel in to, lek me xkuxinatik abi. Janax la jts'ibuytik abi jkermanotak." ³⁰ Jich la yich'ik tikunel bael, k'alal k'otik ta lum Antoquía, la stsob sbaik spisil te jkermanotaktike sok la yak'beyik ta sk'abik te ts'ibubil june. ³¹ Te k'alal la sk'oponik te beluk ts'ibubilbele, bayal bujts'naj yot'anik yu'un te beluk albotik le'ae. ³² Te Judas sok te Silase, te ja wolwanej alwanejetik, jalajik ta stak'uyel sok la yak'beyik bayal yip yot'anik te jkermanotaktike. ³³ Te bit'il jalajikix jun chebub k'aal le'a, jich ak'otik sujt'el yu'un spisil te jkermanotaktike, la yalbeyik te ayuk lamal k'inal yu'un te Dios te ya sujt'ik bael ta stojol te mach'atik tikunbilik tel yu'une. ³⁴ Jauk me to te Silase la snop te ya to xjil ta Antioquía. ³⁵ Janix jich te Pablo sok te Bernabé le' jilik uuk a, la sjoin sbaik sok te tsobol yantik bijteswanejetik sok la xcholik te lek yach'il k'ope. ³⁶ K'axix jun chebuk k'aal a, te Pablo la yalbey te Bernabé: ''Sujt'kotik bael ta ora to, kunik ba jkiltik te jkermanotaktik ta bay te jujun muk'ul lumetik te banti la jcholtik te sk'op te Jkajwaltike sok le' ya jkiltik a teme lek ayike. ³⁷ Te Bernabé la sk'an yik' bael sjoin te Juan ja te Marcos te yan sbiile. ³⁸ Jauk me to te Pabloe la yal te ma spas ya yik' bael sjoin te mach'a ijk'tayotik jilel yu'un ta bay sk'inal Panfilia te ma la sk'an sjoin bael ta spasel te at'ele. ³⁹ Jich yu'un ma pajal la snopik te Pablo sok te Bernabé, jich la yijk'tey sbaik, te Bernabé la yik' bael sjoin te Marcose, ochik ta barco, jich abajt'ik ta Chipre. ⁴⁰ Yan te Pablo ja la stsa te ya sjoin bael te Silase, jich te jkermanotaktike la sk'oponik te Jkajwaltik swenta yu'un yakuk xjoinot bael yu'un te yutsil yot'ane, jich abajt'ik. ⁴¹ K'axik bael ta sk'inal Siria sok ta sk'inal Cilicia, k'ax smuk'tesbeyik yot'anik te ch'uunjeletike.